Хаҷан даа полызарға тимделер
05.12.2025
Хабарлар
Владимир Тохтобин «Чиңіске тікчебіс!» волонтёрлар ӧмезінең хада
5 улуғ хырласта – Пос кӧңнiнең полысчатханнарның кӱнi. Пу чағында Хакасияның правительство туразында ӧнетiн чаа операциязы араласчыларына, пicтiң фронтха паза армияа полысчатхан чуртағҷыларны таныхтааннар
Пу танығлығ кирек Пос кӧңнiнең полысчатханнарның кӱнiне чарыдылған. Хакасия пазы Валентин Коновалов 45 чир-суғҷыбысха Хакас Республика правительствозының алғыстас пiчiктерiн читiрген паза ӧнетiн чаа операциязы араласчыларына полысчатханнары, республикада пос кӧңнiнең полызарын тилiтчеткеннерi паза чуртаста ӧткiн кӧрiстерi ӱчӱн алғызын читiрген.
– Удур-тӧдiр полызар кибiр пiстiң хазнабысха хаҷан даа пик чӧлег полған. Сiрер пасхазына пӧзiк ат ӱчӱн нимес, чӱрееңер хығыртии хоостыра полызарға кӱстенчезер.
Пiстiң республикада пос кӧңнiнең полызар пастағларға кӧптең кӧп кiзi пiрiкче, волонтёрлар ӧмезiне хозылча. Пос кӧңнiнең полысчатхан кiзiлер аймах кӧстеглерде араласчалар, хайзылары полызығ кирексiпчеткеннерге аймах хабазығлар читiрчелер. Хазнаның ӧӧн кӧстеглерiнiң пiрсi – ол ӧнетiн чаа операциязының чааҷыларына полызары. Аннаңар сiрерге тоғызыңар, ӱгренiзiңер ле нимес, че iдӧк кӱстерiңнi хоратчатханыңар, хыриндағы кiзее полызарға кӱстенчеткеніңер ӱчӱн алғызым читiрчем. Хазииңар пик ползын, наа киректерге кӱстерiң читсiн. Ӱлӱкӱннең! – алғыстаан волонтёрларны Валентин Коновалов.
Хакасия пазының орынҷызы Владислав Мингела, волонтёрларға алғыстазын читiрiп, СВО араласчыларына полызарында илееде кiзi араласчатханнаңар таныхтаан.
– Арғыстар, тоғызыңар ӱчӱн улуғ алғыс! Пiстiң чааҷыларға сiрернiң полызииңар уғаа кирек. Сiрер чыыпчатхан, тимнепчеткен ниме тузында паза кирек орынзар читче, мындағ оңдайнаң чиңiстi чағыннатчазар, – теен Владислав Мингела.
Хакасия правительствозының алғыстас пiчии 45 кiзее читiрiлген, ол санда аймах киректе iстенчеткен, волонтёр ӧмезiне кiрчеткен, пос киреенең айғасчатхан кiзiлер.
Ағбандағы 20№ школаның технология ӱгретчiзi Владимир Тохтобин «Чиңiске тiкчебiс!» волонтёр ӧмезiнде ӧнетiн чаа операциязы пасталғаннаң сығара араласча.
– Ӱгренҷiлернең паза школа тоғынҷыларынаң хада «Чиңiске тiкчебiс!» волонтёр ӧмезiне шаблоннар паза станоктар тимнепчебiс. Пу тоғыста полған на класстаң 2-3-ер ӱгренҷi араласча, школа тоғынҷыларынаң сыбыра 3 кiзi полысча.
Пiс, чӱленҷең сетьтернi палғир ӱчӱн, ленталарны кисчең станок тимнебiскебiс. Мының алнында ленталарны Ағбан пилтiрiнде, Харатаста кисчеңнер. Оларны пеер ағылғанҷа кӧп тус ирт парҷаң. Пiрееде ол ленталарның сині килiспеҷең. Пiс аймах синнiг ленталарға кисчеткен станок тимнебiскебiс, ам ол тоғысты тохтат салғабыс.
Волонтёрлар снайперлернiң «Леший» халадын пiр неделя тимнеҷеңнер. Пiс ӧнетiн станок тимнебiскебiс, амды ол халатты идерiне iкi ле кӱн хорадылча. Iдӧк носилкалар тимнирiне шаблоннар иткебiс. Амды пластиктең носилкалар тимнепчебiс. Ирткен чылда 100-ке чағын носилка ит салғабыс. Пу кирекнең оолағастар ла айғасчалар. Iдӧк свечiлер итчебiс. Пылтыр 1200 свечi тимнеп салғабыс. Пӱӱл санаалахпыс. Пiс, «Чиңiске тiкчебiс!» ӧменең паза Ах чарыхтар Константиннің паза Еленаның тигiрибiндегi волонтёрларнаң хада-пiрге тоғынып, оларға ӧнетiн чаа операциязы араласчыларына аймах нимелер чапчаң тимнирiне станоктар, шаблоннар итчебiс, – теен Владимир Тохтобин.
Республика пазы Валентин Коновалов, СВО араласчыларына ӧткiн полысханнары ӱчӱн, «Благо Творю», «Чуртирбыс», «Ангелнiң алтын холлары», «Саяногорсктағы спИцназ», «Чиңiске тiкчебiс!», «Альянс сети», «Чааҷыға чылығны сыйлап пир», «Ангелнiң чӱрее» волонтёрлар ӧмелерiнiң кiзiлерiне, «Россия ипчiлерiнiң социальнай-демократическай пiрiгiзi» халых пiрiгiзiнiң кнезi Людмила Миндибековаа паза СВО араласчыларына ӧткiн хабасчатхан идiнҷектер Виктор паза Оксана Реукиннерге Хакасия правительствозының алғыстас пiчiктерiн читiрген.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
