Чуртағҷыларға истіг оңдайлар
05.12.2025
Хабарлар
Нааҷылалған кiннi пайрамни азарында
Наа кін. Хакасия чуртағҷыларына чарытхыны гарантиялығ читірчеткен пірігіс «Росатом Энергосбыт» АО республика чуртағҷыларынаң тоғынҷаң кіннерні амғы тусха килістіре нааҷылапча
2 улуғ хырласта нааҷылағ тоғыстары толдырылған соонаң тоғызынҷы кін ізіктерін асхан. Ол Ағбан городта Пушкин орамазындағы 165-ҷі турада орныхча. Тура город ортызында турча, мында автобустар даа чахсы чӧрче. Пірігіс искіриинең, пу кінзер тиксі республикадаң иң кӧп чуртағҷы айланча. Кінні пайрамни азарында улуғ аалҷылар араласханнар: Хакасия пазы Валентин Коновалов, «Росатом Энергосбыт» АО чарытхы читірчеткен компанияның ӧӧн директоры Алексей Горчаков, компанияның ӧӧн директор орынҷызы паза хакас пӧлиинің устағҷызы Андрей Негрич.
– Хакасияда Росатом Энергосбыт клиенттернең тоғынар оңдайларны сыбыра чахсыландырча, наа офистер асча паза полызығлар санын алғытча. Анзы регионның коммунальнай инфраструктуразының тилізіне паза чон амырына кирек, – таныхтаан Валентин Коновалов.
– Ағбандағы кін піске уламох танығлығ. Ол регион кінінде орныхчатханынаң на нимес, че ідӧк андар кӱнде иң кӧп чуртағҷы айланчатханынаң танығлығ – 400-600 кізі. Че офис хайда даа азылза – Хакасия кінінде бе алай ыраххы аалда ба, піс тураа, андағы коммуникацияларға, мебель талластырарына паза тыхтағ идеріне уғаа сиргек хайчабыс. Пістің клиенттерге сурығларын пӧгерге чахсы паза истіг ползын тіп кӱстенчебіс, – теен Андрей Негрич.
Чоохтирға кирек, компания чуртағҷыларнаң тоғынҷаң кіннерні пір кӧрімніг итче. Ӧӧн ӧңнер – ах, тигір кӧк паза пора. Кіннің иркiнін алтазох, кізіні чарых, чылығ паза алғым пӧлік удурлапча. Ізіктің сол саринда администраторлар одырчалар, олар чуртағҷыларға хайда ниме орныхчатханын кӧзітчелер паза сурығларнаң хайдағ специалистсер айланарға чӧптепчелер. Тиксі кінде чуртағҷыларнаң тоғынҷаң сигіс кӧзенек кӧріл парған: пис кӧзенекте специалисттер чуртағҷыларға чарытхы читірерінҷе аймах-пасха сурығларны пӧгерге полысчалар, ӱс кӧзенекте кассалар орныхча, анда чарытхы паза сӧп-сап сығарызы ӱчӱн тӧлеглер комиссия чох алылча. Кізінің сидік сурығ полза, аннаң ідӧк алынҷа тоғынҷаң пӧлік кӧріл парған. Аннаң пасха, пу кінзер пірігістерге айланарға чарир, оларнаң тоғынҷаң алынҷа пӧлік тимнелген.
Компания палалығ кізілердеңер ундутпаан. Кічіг аалҷыларға аймах ӱтертістер кӧрілген пулуңас тимнелген: хоостирға столыҷах паза одырчых, кӧп аймах ойыннығ интерактивнай стол паза пасха даа ниме-ноо. Олғаннарны пулуңаста ачых-чарых Атомхаски удурлапча. Ол компанияның ӧӧн матыры полча. Тиксі алза, залда кӧп нымзах одырчых турғызылтыр, истіг одырып, теесті сахтап аларға чарир. Сағыпчатхан туста ідӧк орындағы хоосчы, Россияның хоосчылар пірігізінің кізізі Татьяна Корневаның Ағбан городха чарыдылған хоостарынаң танызып аларға алай пірее хакас оңдайлығ сыйых алып аларға чарир. Устарны пірігіc позы таапча.
Пастағы тустаң ала компанияның кіннерінде улуғ частығларға саннығ технологиялар школазы тоғынча, школа ӱгренҷілеріне чарытхыны ӱзӱрлирінҷе уроктар иртiрiлче, студенттерге – профессиянаң таныстырчатхан экскурсиялар паза пасха чӧрімнер, чапсых киректер.
Ағбандағы кінні азарында Абаза город пазы Валентина Филимонова араласхан. Пу чағында «Росатом Энергосбыт» анда ідӧк нааҷылалған кінні азарға пӧгінче. Пӱӱнгі кӱнде Хакасияда компанияның чуртағҷыларнаң тоғынҷаң кіннері паза участоктары прай городтарда паза аймахтар кіннерінде орныхчалар, ідӧк тайғадағы Тӧӧ пазы посёлокта пар.
Пайрам аалҷылары кіннең тиксі танысханнар паза мыннаң мындар пу кӧcтегҷе хада-пірге тоғысты узарадарға молҷааннар.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
