Аймах кӧстеглерҷе опытнаң ӱлескеннер
28.11.2025
Хабарлар
Республиканың экономика тилiзi министрiнiң орынҷызы Александр Мяхар (ортызында) «Хакасия матырлары» проект араласчылары Игорь Арчимаевнең паза Евгений Воронковнаң
«Хакасия матырлары» проект. Республиканың экономика тилiзi министерствозында пу проект араласчыларынаң тоғазығ ирткен
Министерствода СВО ветераннары, «Хакасия матырлары» проект араласчылары Евгений Воронковнаң паза Игорь Арчимаевнең тоғазығ иртiргеннер. Аның ӧӧн пӧгiнi – полған аймах кӧстеглерҷе опытнаң ӱлезерi: бизнес, экономика, хазых хайраллиры, че тиксi алза – республика чуртазын чахсыландырары.
Тоғазығда хазна устаа паза СВО ветераннарының анда тоғынарынҷа сурығ кӧдiрiлген. Ӧӧнiнде пiр чӧпке килгеннер: пiс прайзыбыс пiрге халых пiрiгiзiнiң кiзiлерi, хайзында кiзi турыстыра, хорғыс чох чуртирға, позын хазна тилiзiнде араласчатханын пiлiнерге кирек.
Тоғазығ араласчылары республика чуртазындағы аймах сфераларға амғы наа технологияларны кирер оңдайларны ӱзӱргеннер, оларның санында полғаннар имнег киреенде инновацияларны тилiдерi, хазых хайраллир системаны истiг идерiн кӧдiрерi, тилекейдегi опытты паза, программа обеспечениезiн кирiп, Хакасия чуртағҷыларына иб аразындағы сурығларны пӧгерiн нииктирi. Олох туста прайзы оңарған, тилiс наа технологияларнаң палғалысча, анзы, тiзең, экономиканы алнынзар тибiретче.
Алынҷа хайығ айландырылған проект араласчыларының чуртазында полған киректерге. Iди Евгений Воронков предприятиелерде кризистең тоғыр устаандағы позының чолын сағысха кирген, Игорь Арчимаев хазых хайраллир системадағы чахсы опыдынаң ӱлескен. «Хакасия матырлары» проектте Игорь Арчимаевтiң кураторы полча Хакасия пазы Валентин Коновалов, Евгений Воронков Хакасияның ис-пай паза чир хайызығлары министерствозында стажировка иртче. Оларның кӧстеглерi пасхалалза даа, че тоғазығ, процесске аймах ведомстволарның кiзiлерiн тартып, удур-тӧдiр хозым идiп паза полызызып, пiрге команданаң прай сариларын тоғындырарға кӧстепчеткен пiлiс пирче. Ол хазна устаан тӱзiмнiг идерiнiң ӧзенi полча.
Тиксi республика, пiрге хазна, кiзiнiң кӱзi ӧӧнi полча – андағ тезистернi пiр ле хати таныхтабаан Хакасия пазы паза олар регионның чуртас-экономика тилiзiнiң стратегиязында кӧзiдiл парғаннар.
«Хакасия матырлары» проект араласчылары: Игорь Арчимаев – «Восток» пос кӧңнiнең чааласчатхан штурмовой бригаданың хирургия службазының пастығы, чааҷы имҷi, ӧнетiн чаа операциязында ӱс командировкада полған.
Евгений Воронков – ӱгретчi, психолог, устағҷы, пӧзiк ӱгредiгдеңер iкi дипломы пар. Пос кӧңнiнең СВО апарылчатхан зоназар парыбысхан, анда Соледар кӧстеенде разведкада служба ирткен паза палығлатхан.
Сом Хакасияның экономика тилiзi министерствозының пресс-службазыни
Автор :
Елизавета Белова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
