Cӧп-сап чығҷаң орыннар пӱдiрiлче, контейнерлер алылча
28.11.2025
Хабарлар
Хакасияның чир-чайаан ис-пайы паза экология министрi Владимир Лебедев
Чыылығ. Хакасияның правительство туразында республика пазы Валентин Коноваловтың устаанынаң похсахты сығара тартарына чарыдылған чыылығ ирткен
Анда ӧнетiн техника, похсах чығҷаң орыннар тӧстирiне паза контейнерлер аларына чарыдылған сурығлар кӧдiрiлгеннер.
Ӱртӱн айының пастағы кӱнiнең сығара «Аэросити-2000» ООО регион операторы Саяногорск городта, Пии, Шира, Орджоникидзе паза Асхыс аймахтарында тоғызын тохтатхан. Аның орнына 2026 чылға теере «Экопарк» акционерлер пiрiгiзi регион операторына турғызылған. 2024 чылның чарыс айынаң сығара пу компания iдӧк iкiнҷi паза пизiнҷi орыннарда сӧп-сапты сығара тартча. Амды муниципалитеттерге «Аэросити-2000» ООО-ның похсах чығҷаң контейнерлерiн садызып аларға алай оларның орнына контейнерлер ал саларға кирек. 2026 чылның кӱрген айы тоозылғанҷа алында регион операторы полған компания контейнерлерiн апарыбызар.
Хакасияның чир-чайаан ис-пайы паза экология министрi Владимир Лебедевтiң чооғынаң, 9 муниципальнай пӱдiсте субсидия полызиинаң сӧп-сап чығҷаң 36 орын тӧстелген, 134 контейнер, 30 бункер алылған. Асхыс аал чӧбiнең 10 бункер, Тӧӧ пазы посёлок чӧбiнең тоғыс бункер, Ағбан городнаң 74 контейнер садызарына хоза чӧптезiглер идiлгеннер.
«Аал хонии промышленнозының комплексi» хазна программазы паза «Аалларның тиксi тилiзi» федеральнай программа хоостыра 5,8 миллион салковайға субсидия позыдылған. Ол ахчаа сӧп-сап чығҷаң 92 орын пӱдiрiлген, чыл тоозылғанҷа 335 контейнер, 55 бункер алылар. Че анзы кирексiнiстi чаппинча.
– Контейнер орыннарын тӧстирiнҷе план 94 процентке толдырыл парған, контейнерлер аларынҷа пӧгiн – 93 процентке. Чыл тоозылғанҷа план толдырыл парарға кирек. 2030 чылға теере сӧп-сап чығҷаң орыннарның саны 1018-ке чит парарға кирек, контейнерлер – 1201.
Муниципальнай пӱдiстер контейнерлер аларына паза оларны турғызар орыннарны пӱдiрерiне бюджеттерiнде ахча кӧр саларға киректер тiп сыбыра чоох апарчабыс. «Аэросити-2000» ООО, регион операторынаң парыбысханда, контейнерлерiн артыс салған, оларнаң тикке тузаланар оңдай пар. Че килер чылда iди полбас, аннаңар пу сурыға хайығ саларға кирек, контейнерлер чох халбас ӱчӱн. Аннаңар муниципальнай пӱдiстерге ол контейнерлернi садызып аларға алай арендаа аларға кирек, – теен Владимир Лебедев.
Программа хоостыра iдӧк 20 миллион салковайға ӧнетiн техника алылған.
Килер чылда проект-смета пiчiктерiн тимнирiне 20 миллион салковай кӧрiл парған. Проект тимнирiнҷе тоғыс апарылча.
Шира аймаана паза Харатасха полигоннар пӱдiрерiне паза нааҷыласха ахча позыдылған. Прай тоғыстар толдырыл парғаннар. Килер чылға проект-смета пiчiктерiн тимнирiне 60 миллион салковай кӧрiл парған. Харатас городта паза Шира аймаанда полигоннар пӱдiрiлче паза пу пӧгiнге ахча пирiлген.
Саяногорск городта, Асхыс, Шира, Орджоникидзе, Пии паза Боград аймахтарында контейнерлер чидiспинчеткеннеңер, оларны садызарға алай «Аэросити» ООО-даң арендаа аларға пӧгiнчелер. Саяногорск пазы Евгений Молодняковтың чооғынаң, город 300 контейнер ал салған, пӧгiнде – хоза 60 контейнер алары. Боград аймаа «Аэросити» ООО-даң контейнерлернi садызарға пӧгiнче. Асхыс аймаа контейнерлернi, садысханҷа, арендаа аларға сағынча.
Чыылығда iдӧк чуртағҷыларның профилактика тоғызына хайығ салылған. Таныхтирға кирек, чуртағҷылар iзiг кӱлнi сӧп-сап чығҷаң контейнерлерзер урған сылтаанда, контейнерлер паза похсахты сығара тартчатхан машиналар кӧйiбiсчелер.
Сом Илона Каковани
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
