«Саянмолоко» ООО-ның сығарызы ӧсче
26.11.2025
Хабарлар
«Саянмолоко» ООО-ның ӧӧн директоры Валерий Левицкий, Хакасия пазы Валентин Коновалов паза Саяногорск город пазы Евгений Молодняков сӱт урҷаң цехта
Экономика. Пу кӱннерде сӱт ас-тамаа сығарызынаң айғасчатхан «Саянмолоко» предприятие сӱт урҷаң ӱзiнҷi линиязын пайрамни азыбысхан
Аны азарында Хакасия пазы Валентин Коновалов, Саяногорск город пазы Евгений Молодняков паза предприятиенiң ӧӧн директоры Валерий Левицкий араласханнар.
Наа цехта пӱӱнгi кӱнге килiстiре оборудование турғызылған, ол санда ПЭТ-бутылкалар ӱбӱрҷең автомат, оларны чуғҷаң паза сӱт урҷаң униблок, этикеткалар чапсырҷаң машина. Пiр часха линия алты тонна сӱттi бутылкаларға урыбызар оңдайлығ.
– Полипропилен бутылкаларға сӱт урҷаң iкi линия пар. Пастағы линия пiр час аразына алты тонна сӱт урыбысча, iкiнҷiзi – ӱс тонна. Олар, маңат таа ползалар, сигiс чыл тоғын салғаннар. Линия тоғызын профилактикаа даа тохтат полбинчабыс. Сӱт паза сӱттең тимнелген ас-тамах кӱннiң кирек нооза. Ағаа хоза, пiс сӱттi наа орыннарда садарға пӧгiнчебiс. Пӱӱнгi кӱнде сӱттi Улан-Удэға читіре апарчабыс. Ӧӧнiнде сӱт чох iскеркi саринзар сатчабыс, ол санда Иркутcксар. Аннаңар ас-тамах хайраллаҷаң орынның ӱстӱнде, iкiнҷi хадылын хозып, 440 квадраттығ метр улуғ цех пӱдiрiбiзерге чаратхабыс. Анда сӱттi, кефирнi, ряженканы паза cӱттең тимнелген пасха даа ас-тамахты бутылкаларға урҷаң ӱзiнҷi линияны турғыс салғабыс. Ол Италияда сығарылған. Аның пӱдiриине паза оборудование аларына 300 миллион салковай хорат салғабыс.
Амды сӱттең уламох кӧп ас-тамах сығарарбыс. Пу линия пiр часха сӱт ас-тамаан алты муң бутылкаа урыбызар.
Пiс чахығлар хоостыра тоғынчабыс. Пiрееде завод хараа-кӱнӧрте тоғынча, пiрееде кӱнде – сигіс час.
Пiр кӱнге ортымахти 280 тонна сӱттең аймах ас-тамах тимнебiсчебiс. Пос фермазынаң пiс 70 – 80 тоннаа кӧп сӱт сығарчабыс, хайзын Алтайзар, Хызылчарзар сатчабыс. Сӱттi iдӧк орындағы фермерлердең паза пос хоныхтарынаң iкi кооператив хоостыра садысчабыс. Чайғыда кӱнде 50-ҷе тонна сӱт алчабыс, – чоохтаан хабарҷылар-ға «Саянмолоко» ООО-ның ӧӧн директоры Валерий Левицкий.
Предприятие пiр кӱнде 60 тонна сӱт хайнадыбысча, 80 тонна ӱр хайнатхан сӱт (алты айға теере хайраллалчатхан) сығарыбысча. Предприятиеде iдӧк пiр кӱнге 50 –100 тоннадаң хатығ сыр сығарылча, кефир, ряженка, пис-сигіс тонна ӧрiңме паза эҷiгей, йогурттар тимнелче. Прай пу ас-тамах Хакасиядаң пасха регионнарзар апарылча.
«Саянмолоко» ООО-да ӱзiнҷi линия пайрамни азылған соонда Хакасия пазы предприятие тоғынҷыларын алғыстаан. Аның таниинаң, Хакасия хыраҷыларынаң, малҷыларынаң, ас-тамах тимнеҷең промышленность тоғынҷыларынаң хаҷан даа сабланҷаң.
– Пӱӱн ол – пик, сын, нандырығлығ тоғынарға пiлчеткен кiзiлернiң ӧмезi. Предприятие чахсы ас-тамах сығарызынаңар ла сағынминча, че iдӧк тоғынҷыларынаңар, социальнай пастағларға хайығ айландырып. Тоғызыңар, чахсы ас-тамах сығарчатхан ӱчӱн алғызым читiрчем, – таныхтаан Валентин Коновалов.
Завод 1983 чылда тӧстелген. Пӱӱнгi кӱнге «Саянмолоко» предприятие Сибирьде сӱт ас-тамаан сығарчатхан килкiм предприятиелернiң пiрсi полча. Амғы туста анда 400 азыра тоғынҷы iстенче.
Ирткен чылда предприятие «Россияның иң чахсы 100 ниме-ноозы» марығда нинҷе-де дипломға турысхан. Аның ас-тамаа «Семёнишна» бренднең сығарылча, хайзын Хакасияда ла нимес, пасха даа регионнарда таныпчалар.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
