Чиңiстерге кӧстеглiглер
26.11.2025
Хабарлар
Игорь Катаев (пастағы рядта сол саринаң ӱзiнҷiзi) паза Станислав Андриановский (iкiнҷi рядта сол саринаң ікінҷізі) сыйыхтас тузында
Спорт. Тренер Игорь Катаев 2022 чылдаң боксча тренер полып iстенче
Хакас тренер
Хакасиядағы боксерлар орындағы чонны чидiглернең тӧремiл ӧрiндiрчелер. Амғы туста ӧӧн спорт «чылтызына» Сергей Слободянны санирға чарир. Саяногорсктаң сыххан оол, чоннар аразындағы турнирлерде медальлар утып, пiстiң республиканы ырахха сабландырча. Аның арғызы Давид Гогичаевтi махтирға кирегӧк. Боксер 17 кiчiг хырласта Россия чемпионадында кӱмӱс призер полыбысхан. Ол «Сила удара» наа дисциплинада позын турыстыра кӧзiткен. Спортсменнер – саблығ тренер Николай Дружининнiң ӱгренҷiлерi. Николай Фёдоровичнең хада пiр залда тоғынча хакас специалист, боксча Россияның спорт узы Игорь Катаев. Чир-суғҷыбыстың устаанынаң саарбахтар марығларда сыйыхтығ орыннарға сыхчалар.
Игорь Катаев Ағбанда 1996 чылда тӧреен. Бокс секциязынзар аны пабазы Валентин Васильевич пазындыр салтыр. Оолахха ол туста 6 ла час полған. Хакас тренер чоохтапча:
– Пабам спортха сабыл парған кiзi тирге чарир. Ол позы кӱрескен. Минi спортсмен ползын тiп сағынған. Сӧбiреде iкӧлеңмiс. Пиҷем пар. Катаевтер саны кӧп нимес. Родтың иң саблығ кiзiзi композитор Нина Викторовна Катаева полча, неке. Ол музыкада паза ӱгредiгде тирең iс артысхан. Санапчам, пабам минiң ӱлӱзiмнi орта ухаанҷылап пирген. Мин бокста позымны таап алғам. Пастағы тренерiм – Владимир Анатольевич Буц. Ол пу спорт кӧрiмiне хынызымны тыытхан. Анаң – 2009-2013 чылларда – Иван Владимирович Володиннiң холында узымны таптаам. Школа тоосхан соонда Новосибирсксер ӱгренерге парыбысхам. Боксты тастабаам. Сибирьнiң кiнiнде миннең хада тоғынған Россияның саблығ тренерi Валерий Александрович Мотькин.
Игорь Катаевтiң таниинаң, саарбах тузында ол танығлығ чидiглерге читпеен. Чир-суғҷыбыс Сибирь первенствозында чиңic тутхан, Россия мариинда араласхан. Ол 17-18 частығда, 52 килограмм пасчатханда, кӱзiне кiр сыхтыр. Андадох спорт узына нормативтi толдырыбысхан. Хакас оол пастап Хызылчарда иртчеткен профессор В.Н.Борисовтың хумартхызына чарыдылған тиксі Россия турнирiнде алтын медаль холға кирген, анаң Сибирь чемпионадында утып алған.
Игорь Валентинович чооғын узаратча:
– Мин ир кiзiлер аразында хомай нимес тудысхам. 56-60 килограмм кӧдiрiмнерде киректерiм чахсы пар сыххан. Анзы даа ӧӧнi нимес. Узым ӧс сыхханда, миизiм дее наа оңдайнаң тоғын cыххан. Бокста иң пурнада табырах сағыстығ поларға кирек полтыр. Иң улуғ чидиим – 2018 паза 2019 чылларда Россия кубогында азах меетке сыхханы. Ол кӱмӱс медальлар мағаа алтыннаң пызыңнапчалар. Хомзынысха, 2019 чылдох кинеп парғам. Иңнiме операция иткеннер. Ол сылтағнаң марығлазарға тоос салғам.
Игорь Катаев, Новосибирскте чуртап, iкi пӧзiк ӱгредiг алып аларға маңнантыр. Пастағы ӱгредии хоостыра ол тренер-ӱгретчi полча, iкiнҷi специальнозынҷа – инженер-геодезист. Чиит кiзi, спортта кирегi килiспезе, пӱдiрiг сферазында тоғынарға пӧгiнтiр. Че тренерлер паза арғыстары iзестiг оолны бокстаң позыдарға хынмааннар. Новосибирсктегiлер дее, ағбандағылар даа аны тренер поларға чӧптептiрлер. Чахсы сағынып алған соонда Игорь Валентинович тӧреен чирiнзер айланарға чаратхан. Ол чоохтапча:
– Иван Владимирович Володин тоғыснаң полыс пирген. 2021 чылда кӱскӱзiн аны Хакасия федерациязының устағҷызына таап алғаннар. Тренерiм позының ӱгренҷiлерiн мағаа пирiбiскен. Пiлдiстiг, тимде палаларнаң тоғынарға хай-хай оой. 2022 чылда пiстiң республика боксча тиксі Россия турнирiн удурлаан. Аны «Спартак» Россиядағы физкультура-спорт пірігізі иртiрген. Арға-мӧрійде 14-15 частығ саарбахтар устарын кӧзiткеннер. Ӱгренҷiлерiмнең iкi кiзi азах меетке сыххан. Максим Боргояков чиңic тутхан, Анатолий Майнашев кӱмӱс призер полыбысхан. Оларның чидiглерi мағаа кӱс хосханнар, орта чолҷа парчам тiп киречiлееннер. Толя спорттаң парыбысхан полза, Максим Олимп резервi училищезiнде (техникумында) ӱгренче, мағаа тренировкаларда полысча.
Пӱӱнгi кӱнде Игорь Валентинович Республиканың аймах оңдайлығ харбазығлар спорт школазында паза Олимп резервi училищезiнде (техникумында) істенче. Тиксi алза, аның 70 ӱгренҷi. Хакас тренер палаларны секцияа 8 частаң алчаттыр. Секция Кравченко, 11/З адресче орныхча. Анда боксерларға чахсы оңдайлар тӧстелген: чахсы зал, спорт тирии читкiҷе. Аның ӱчӱн нандырча федерация. Спорт пiрiгiзі Аршаннардағы хара тас аныҷаң разрезнең пик палғалыс тутчаттыр. Ӧӧн спонсор чорыхтарға ахча позытча, спорт кип-азаан, оборудованиенi садызарға полысча.
Чиит чемпион
Амғы туста Игорь Катаевтiң 8 ӱгренҷiзi улуғ турнирлерде тӧремiл араласча. Олардаң иң iзестiг боксерлар – Амина Абдулазизова паза Станислав Андриановский. Абахай Амина 81 кг кӧдiрiмде тудысчаттыр. Чиит хыс 2024 паза 2025 чылларда Россия первенствозында хола медальлар утхан. Амды ол 19 – 22 частығ юниоларның аразында кӱс сынирға тимненче.
Станислав Андриановскийнi тренер пiснең чоохтазыға хада алып алған. Чиит чемпион Ағбанның 11 № школазында 9-ҷы класста ӱгренче. Станислав – пӧзiк, сылағай, пик пӱдiстiг саарбах. Аны, Игорь Катаевтi чiли, бокс секциязына пабазы пирiбiстiр. Ол чоохтапча:
– Пабам Юрий Геннадьевич ӧткiн хылыхтығ кiзi. Аның устаанынаң аймах спорт кӧрiмнерiнең айғазарға маңнанғам. Бокста 11 частаң кӱс сынапчам. Секцияа чӧрерге кӧңніме кiрче. Тренировкалар неделяда алты хати иртчелер. Чахсы салтарлар 2023 чылда кӧзiдерге пастаам. Ол чыл улуғ хырлас айында СССР-ның саблығ тренерi Борис Грековтың хумартхызына чарыдылған тиксі Россия турнирiнде чиңiс тутхам.
Аннаң сығара Станислав Андриановский марығлардаң медальлар чох айланминча. 2024 чылда ол Сибирь первенствозында алтын медаль холға кирген паза «Арға-мӧрійнiң иң чахсы боксеры» атха турысхан. Абхазияда ирткен чоннар аразындағы турнирде саарбах, чиңic тудып, спорт узына кандидатха нормативтi толдырыбысхан. Боксерлар пылтыр чарыс айында марығластырлар. Халғанҷы чидиинеңер чоохтаза, Станислав Россияның саблығ тренерi А.П.Аксёновтың хумартхызына чарыдылған тиксі Россия арға-мӧрійiнде чемпион полыбысхан. Марығ 27 чарыстаң 2 кiчiг хырласха теере Краснодар крайында парған. Хайди таныхтаан спортсмен, турнир ағаа уғаа сидiк ирткен. Чарым финалда ол пӱӱлгi Европа первенствозының чиңiсчiзi Владислав Кутнийнең тоғасхан нооза. Чидiг ӱчӱн Андриановскийнi Россияның пiрiктiрiлген командазынзар кир салғаннар. Iдӧк чарғыҷылар, спортсменнiң пик хуйағына морсынып, аны «Турнирнiң иң чахсы боксеры» атнаң таныхтааннар.
2026 чылда 10 – 18 кӱрген айында Станиславты Сочиде сборларға сағыпчалар. Кирек килiссе, саарбах кӧрiк айында Санкт-Петербургта чоннар аразындағы марығда аралазар. Боксер школада чахсы ӱгренчеттiр. Аның ӧӧн пӧгiнi – сыныхтағларны турыстыра тудыбызары. 9 класс соонда спортсмен Олимп резервi училищезiнде (техникумында) ӱгренерге сағыс тутча.
Чооғының халғанҷызынзар Игорь Катаев теен:
– Тренер полып тӧртiнҷi чылы iстен парирбын. Салтарлар пар, че хабазығ чох чемпионнарны тимнирге оой нимес. Пiске федерация чахсы полысча, Николай Фёдорович Дружинин миннең хада опыдынаң сыбыра ӱлесче. Ӱгренҷiлерiмнiң паба-iҷелерiне, хада хонғаным Кира Александровнаа паза оолғым Макарға алғызым читiрерге сағынчам. Сағаа киртiнчетселер, кiзiнiң кӧңні кӧдiрiлче, аннаңох кӧп тоғынарға, чонға туза ағыларға кӱстенчезiң. Пiс Хакасиядағы бокстың тилiзi ӱчӱн нандырчабыс, аннаңар чиңiстер тударға хайди даа кирек.
Сом Игорь Катаевтiң архивiнең
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
