Ӱзӱрігде – тиріглер паза маллар
20.11.2025
Хабарлар
Чыылығ. Хакасияда малны хадарар правилоларны сайбааны паза чиптер турғызарына тоғырланғаны ӱчӱн нандырығ тударынҷа хатығласты тыытчаң оңдай ӱзӱрілче
Хакасия пазы Валентин Коноваловтың устаанынаң Хакас Республикадағы право сайбағлары профилактиказынҷа ведомстволар аразындағы комиссияның теестегі чыылии ирткен. Анда право хайраллаҷаң органнарның кізілері, республикадағы министерстволарның паза ведомстволарның устағҷылары араласханнар. Чыылығда ідӧк «Хакасия матырлары» регион проектінің араласчызы Цырен Димчиков араласхан.
Комиссия тоғызы хоостыра тиріглернің закон хыйыстыра айланызы сферазындағы паза маллар хадарылбинчатханынаң палғалыстығ саайларҷа сайбағларны азынада тохтадар сурығлар кӧрілген.
Чыылығ тузында Хакасияда тиріглернің закон хыйыстыра айланызы сферазындағы тиксі сайбағлар саны хызырыл парғаны таныхталған. Че іди дее полза, ол сидіксініс ам даа ағырсымнығ.
Тиріглернің закон хыйыстыра айланызы сферазындағы сайбағларны азынада тохтадар кӧстегнең аймах мероприятиелер комплексі чуртасха кирілче. Оларның аразында: тиріг хайраллалчатхан оңдайларны план хоостыра сыныхтиры, тирігні пос кӧңнінең ағылчатханнарға республика бюджедінең ахча тӧлелчеткенінеңер чуртағҷыларға искірері.
2025 чылның пастағы чарым чылында иртірілген тоғыстың салтарларынҷа, чуртағҷылар 8 тиріг ағылғаннар (оларға тиксі 42 000 салковай тӧлелген).
Таныхтирға кирек, санға алылбаан алай табылған тирігні ағылғаны ӱчӱн чуртағҷылар тӧлег ле албинчалар, олар уголовнай паза административнай нандырығдаң позыдылчалар.
Тирігні пос кӧңнінең ағыларына Росгвардияның Хакас Республикаҷа Устанызының лицензия-чарадығлығ тоғыс пӧлиинзер айланарға кирек.
Аннаң пасха чуртағҷылар тирігні паза ухтарны СВО кирексіністеріне пирібізерге оңдайлығлар. Андағ айланысты онлайнҷа ӧнетін сервис пастыра пирібізерге чарир.
Нинҷе-де чыл изере Хакасияда аал хонии маллары, хадарылбин пос оттап чӧрчеткені ағырсымнығ сурығ полып халча. Андағ маллар сылтаанда чолларда саайлар полча, поездтерге экстреннай оңдайнаң тохтирға киліcче, ис-пайға паза урожайға ӱрег иділче.
Искіріг-чарыдығлығ тоғыс апарылчатса даа, ээлер мал хадарарынҷа законодательствоны сайбирын узаратчалар. Пу чылның 10 айына тимір чолларда паза автомобиль чолларында аал хонии маллары сылтаанда 200 азыра саай пол парғаны санға алылған. Чолдағы саайларда 1 кізі (16 часха читкелек пала) ӱреен, 6 кізі палығлатхан. Кӧбізі киректерде маллар чип чох полғаннар, аның сылтаанда оларның ээлерін табар паза пыролығларны ілезіне сығарар оңдай чох полған.
Хакасияның тимір чолларында паза автомобиль чолларында маллар сылтаанда полчатхан саайларны азынада тохтадар кӧстегнең мал ээлерін сыныхтағда тударын тыыдыбызарға чарадығ алылған. Сидіксініcті пӧкчең оңдайларның пірсі – малны хадарар правилоларны сайбааны паза чиптер турғызарына тоғырланғаны ӱчӱн административнай нандырығ тударынҷа хатығласты тыыдары.
Сом r-19.ru сайттаң
Автор :
Тимнеен Альберт Толмашов
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
