Чарыс тооза харбазығ парған
19.11.2025
Хабарлар
Чииттер марығласчалар
Спорт. Хакасия кубогында 324 кiзi кӱзiн сынаан. Спортсменнер спринтті классика оңдайынаң чӱгӱргеннер
Кибiр хоостыра кiчiг хырлас айында Тӧӧ пазында саналығ чарысча пастағы марығлар иртче. Олар чӱгӱрiкчiлернiң чайғыдағы спорт тимненiзiн сыныхтир оңдай пирчелер. Итсе, пӱӱл Хакасия Россия кубогын удурлабас. Федерация чарадиинаң арға-мӧрійнiң пастағы чардығы Кировскта иртер. Анда хазнабыстың иң кӱстiг спортсменнерi устарын кӧзiдерлер. Тӧӧ пазында, тізең, пу кӱннерде Россияның чииттерiнiң пiрiктiрiлген командазы марығласча. Ідӧк пас меетке аймах регионнар ӱчӱн турысчатхан спортсменнер сыхханнар.
Республиканың физическай культура паза спорт министерствозы СМИ тоғынҷыларын пресс-турға 17 кiчiг хырласта ал чӧрген. Ол кӱн спринтче арға-мӧрій ирткен. Азах мееттер пасталар алнында «Тӧӧ» республиканың спорт школазының директоры Евгений Авдонин хабарҷыларға улуғ нимес экскурсия иртірген. Евгений Геннадьевичтiң чооғынаң, Тӧӧ пазында пастағы хар 5 кічiг хырласта чаап парған. Олар сах андох трассаларны тимнирге чапсыныбысханнар. Чӱгӱрiс чолларын ӧнетiн комиссия сыныхтаан. Специалисттер, идiлген тоғысха пӧзiк паалағ пирiп, мында Олимп ойыннарын иртiрерге чарир тееннер. Амғы туста поселокта 700 артиинаң кiзi спорт тимненiзiн иртче.
Ідӧк сағыстарынаң ӱлескен спорт министрiнiң тоғызын толдырчатхан Дмитрий Сафронов. Ол таныхтаан:
– Хакасия кубогы – тиксі Россия марии. Аның тузында 40 чарғыҷы тоғынча. Чарысты пӧзiк синде иртiрiп, пiс прай кӱзiбiстi салчабыс. Ол спортсменнерге ле нимес, пiске хатығ сыныхтағ. Азығ айында мында Россия ӱгренҷiлерiнің спартакиадазының iкiнҷi чардығын удурлирбыс.
Чарыстаңар чоохтаза, арға-мӧрійде 324 кiзi араласхан: 187 ирен паза 137 ипчi. Прайзы 1,6 километр тобырған. Марығ оңдайларынҷа азах мееттің тӧртінҷі чардығына 30-ар спортсмен сыхча, чарым финалға – 12-ер кізі, азах меетке – 6-ар чӱгӱрікчі.
Олимп чемпионнары марығласпинчатханда, чарыс амыр иртер тiп cағыс полған. Хайдаң! Полған на секунда ӱчӱн харбазығ парчатханда, стадионға толдыра хысхырыстар турған. Ипчiлернiң аразында чиңic тутхан Алёна Плечёва. Ол Челябинск облазындағы Златоуст городтаң. Абахайға 19 час. Иң улуғ чидии – Россия первенствозында чиңiс тутханы. Хазнабыстың пiрiктiрiлген командазынзар iкi чыл мының алнында таллағны иртібiстір. Классика оңдайлығ спринт Алёнаның ӧӧн дистанциязы полтыр. Iди дее полза, чарыс ағаа най сидiк ирткен.
Ооллардаң оң полған Матвей Кетовха. Чиит кiзi Ханты-Мансийск автоном округынаң. Пӱӱл спортсмен Россия первенствозында алтын медаль холға кирген. Ол чидiг Кетовха пiрiктiрiлген командазар чол асхан. Спортсменнiң таниинаң, Тӧӧ пазында ол пастағызын на марығласты. Хар мында хуруғ арах полтыр, ол сылтағнаң чӱгӱрерге оой нимес. Чемпион, спринттердең пасха, 10 километрнi конёк оңдайынаң, 15 километрнi классика оңдайынаң чахсы чӱгӱрче. Прай спортсменнернiң узы пӧзiк, аннаңар чарыс тооза харбазығ парған.
Хакасия кубогында ідӧк пiстiң чир-суғҷыларыбыс кӱстерiн сынааннар: Владислав Хамидулин, Олег Бубенчиков, Дарья Зворыгина, Алёна Сипкина паза Валерия Канзычакова. Хамидулин Ағбаннаң, ол 2001 чылда тӧреен. Чиит кiзi – спорт узына кандидат, ол ӧрт ӱзірҷең полып iстенче. Аның тренерi – Анастасия Давыдова. Олег Бубенчиковнаң Дарья Зворыгина – Палыхтығ суғ аалның чуртағҷылары. Саарбахтар тренер Сергей Соколовтың холында устарын таптапчалар. Бубенчиков Хакасия кубогында 70-ҷы орынға сыххан. Анзы иң чахсы салтар. Алёна Сипкина паза Валерия Канзычакова – тренер Александр Карачаковтың ӱгренҷiлерi. Iкiзi дее Таштыптаң, 10-ҷы класста ӱгренчелер. Хайди таныхтаан Александр Иванович, прай хызыҷахтар тиксі Россия мариинда пастағызын на кӱстерiн сынааннар. Оларның чахсы чӱгӱрiбiзерiне пiрдеезi ізенмеен, че арға-мӧрій усты тилiдер чахсы оңдай пирче. Амды ӧӧн пӧгiн – Россия ӱгренҷiлерiнің спартакиадазында турыстыра чӱгӱрiбiзерi.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
