Социальнай инфраструктураны нааҷылирына хайығ салылған
19.11.2025
Хабарлар
Россия президентінің СФО-дағы полномочиеліг кізізі Анатолий Серышев, Хакасияда полып, Тадар Тис аалдағы наа имнег туразын кӧрче
Тоғыс чорығы. Хакасияда тоғыс чорығынаң Россия президентiнiң CФО-дағы полномочиелiг кiзiзi Анатолий Серышев полған. Ол Хакасия пазы Валентин Коноваловнаң хада Ағбандағы аэропортсар паза iкi имнег туразынзар чӧр килген
Президенттiң полномочиелiг кiзiзi Хакасия пазы Валентин Коноваловнаң тоғасхан, анда iдӧк араласхан «Аэропорт Абакан» акционерлер пiрiгiзiнiң директоры Вячеслав Рожков. Олар аэропорттың тоғыс салтарларын паза аны аннаң андар тилiдер оңдайларны ӱзӱргеннер. Учухчаң-одырҷаң полосаны тиксi тыхтиры сурығларның пiрсi полған, хайзы аэродром инфраструктуразы объекттерiн тиксi тыхтир мероприятиелер планының проектiне кирiлген. Хайди таныхтаан Валентин Коновалов, Ағбанның аэропорты тӧремiл тилiпче, халғанҷы алты чылда отрасльға республика бюджедiнең ахча позыдары 15 хати ӧс парған. Хакасияның ӧӧн городынаң сигiс кӧстегҷе рейстер толдырылча, оларның iкiзiне республика бюджедiнең субсидия пирiлче.
– Кирексiпчеткен кӧстеглерҷе субсидиялар пирер программаларны алғыдары пассажирлер тартарын мыннаң мындар ӧскiрерiне паза регионда туризмнi тилiдерiне хабазарҷых, – таныхтаан Валентин Коновалов.
Аалларда имнег полызиин пирер инфраструктураны тӧстирi президенттiң полномочиелiг кiзiзiнiң алынҷа хайиинда тудылча. Анатолий Серышев Боград аймааның Тадар Тис аалындағы наа имнег туразын кӧрерге чӧрген, хайзы пӱӱл чарыс айында пайрамни азылған.
1976 чылда пӱдiрiлген иргi тура 2011-2012 чылларда полған чир тiтiрестерiнде сайбалған, иңзерiлчеткенге саналған. Боград аймааның Т.И.Ануфриеваның адынаң имнег туразының базазында «Узах паза ӧткiн чуртас» национальнай проект хоостыра наа имнег туразын пiр чылға ла пӱдiрiбiскеннер. Ол Федерация Чӧбiнiң паза Хакасияның хазых хайраллаҷаң министерствозының хабазиинаң пӱдiрiлген паза анда нап-наа имнег оборудованиезi турғызылған. Пу проекттi чуртасха кирерiне чарым миллиард азыра салковай позыдылған, аның 370 миллионы – федеральнай ахча.
Амғы наа стандарттарҷа пӱдiрiлген имнег туразында алғым коридорлар, истiг мебельлiг cағыҷаң орыннар пар, олар килген кiзiлерге истiг оңдайлар тӧстепчелер. Пациенттерге диагностика идерге паза имнег полызиин пирерге прай кирек техника пар. Анда имнирге кирек прай ниме пар, ол санда «аар» тирiглер – флюорограф, маммограф паза рентген-аппарат.
Амды наа имнег туразынаң хости модульнай стационар пӱдiрии пасталыбысхан. Андағ оңдай Федерация Чӧбiнiң, позы Валентина Ивановна Матвиенконың паза Россияның хазых хайраллаҷаң министерствозының хабазии cылтаанда пирiлген.
Пӱдiрiлчеткен объекттiң тиксi улии 1490 квадраттығ метр полар. Комплексте операциялар итчең блоктығ хирургия пӧлии, интенсивнай терапия палатазы, ургентнай зал – пала тӧрiтчең, терапевтическай чардых, педиатрия пӧлии, чиис тимнеҷең блок, аптека паза пасха даа полызығлығ пӧлiктер поларлар.
Наа имнег комплексi 2026 чыл тоозылғанҷа пӱдiрiл парар.
Пу пӧгiннерге республикаа федеральнай бюджеттең 200 миллион салковай позыдылған. Орын тимнирiнҷе, коммуникациялар тартарынҷа, чирнi иптирiнҷе паза кирек тирiглер аларынҷа хорадығларны республика позына алып алған.
Анатолий Серышев регионға хазых хайраллаҷаң объект уғаа кирек полчатханын таныхтаан паза социальнай инфраструктураны нааҷылир тоғыстар толдырылчатханын тӧбiн тӱзiрбеске хығырған.
Хакасия пазы полпредке республикаа хайығ салчатхан паза полысчатхан ӱчӱн алғызын читiрген паза Федерация алнында позына алған прай тоғыстарны регионның правительствозы хайди даа толдыр салар тiп iзендiрген.
Чорых тузында президенттiң полномочиелiг кiзiзi iдӧк нааҷылалған республиканың олған имнег туразын кӧрген, хайзында тиксi тыхтағ Россияның «Хазых хайраллиры» хазна программазының «Хазых хайраллирының инфраструктуразын тилiдерi» федеральнай проектi хоостыра 2022 чылдаң сығара апарылған паза 2025 чылда тоозылған.
Объекттiң паазы 707,6 миллион салковайға тиңнелген, ол санда аның 87 процентi – федеральнай ахча, ол 556,4 миллионҷа салковай. Хоза пӱдiрiг-монтаж тоғыстарына, технология пiрiктiрiстерiне паза оборудование аларына республика бюджедiнең 139,9 миллион салковай позыдылған.
Тыхтағ тоғыстары стационар туразында (ағаа хоза спиральнай компьютер томографын турғызар чардых пӱдiрiл парған), олған поликлиника туразында (ол 1981 чылда пӱдiрiлген полған) паза консультация-диагностика кiнiнде (ол 1954 чылда пӱдiрiлген полған) апарылған, тиксi алза, 4 муң 747,7 квадраттығ метрде.
Имнег туразы Ағбан городтың 46 муң палазын кӧрче, ол сменада 200 пала иртiрерiне кӧрiл парған.
– Тыхталған соонда мында кiчiг пациенттерге диагностика иртiрерiне паза оларны имнирiне прай кирек оңдайлар тӧстел парғаннар. Улуғ кабинеттер паза наа оборудование имҷiлерге пӧзiк квалификациялығ полызығ пирер оңдай тӧстепче, нааҷылалған холлар паза коридорлар паба-iҷелерге паза палаларға истiг ибiркi тӧстепчелер, – таныхтаан Валентин Коновалов.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
