«Хакасия матырлары» программаҷа стажировка иртiбiскен
14.11.2025
Хабарлар
Хакасия матырлары» проект. СВО араласчызы Виктор Тарасовтың Хакасияның ГО, ЧС паза ПБ хазна комитедiнде «Хакасия матырлары» программа хоостыра ирткен пастағы стажировказы тоозыл парды
Программа хоостыра СВО араласчызы Виктор Тарасовтың стажировказы хазна комитедiнде ӱртӱн айының пастағы чардығында пасталған. Пу тус аразына ол Хакасияның ГО, ЧС паза ПБ хазна комитедiнiң, iдӧк аның холындағы учреждениелернiң – республиканың ӧрттердең тоғыр службазының, Хакасияның ГО ЧС-ча ӱгредiг-методика кiнiнiң паза ЧС полдыртпазынҷа паза оларның салтарларын чох идерiнҷе республиканың искiрiглiг кiнiнiң – тоғыс кӧстеглерiн ӱгренерге маңнанған.
Хакасияның ГО, ЧС паза ПБ хазна комитедiнде проект араласчызы чонның аймах категорияларын (организацияларның паза хазна учреждениелерiнiң тоғынҷыларын) ӱгредерге сурыныстарын хайди чыыпчатханын, ӱгренҷiлернi хорғыс чох тудынар правилоларға паза хорғыстарда орта тудынарына ӱгредер кӧстегнең хайдағ тоғыс апарылчатханын, хайдағ киректерде ӧрт ӱзiрерге пос кӧңнiнең тоғынчатхан ӧрт ӱзiрҷеңнерні тартарын, искiрiглер пирҷең региондағы система тӧстелгеннiң паза нааҷылалғанның тархынын паза даа пасха кӧп нименi пiлiп алған.
Хакасияның ӧрттердең тоғыр службазында Виктор Тарасовха учреждениенiң пӱдiзiнеңер, диспетчер службазы тоғызынаңар, ӧрт ӱзiрҷең подразделениелерiнiң оперативнай служебнай тоғызынаңар, аймах кӧрiмнiг ӧрттернi ӱзiрер оңдайлардаңар чоохтап пиргеннер. Алынҷа хайығ салылған ӧрттер полдыртпас сурығларға паза ибде, производствода ӧрт сығарбас правилоларға тудынарына. Ағаа хоза, Викторға Хакасияның ӧрттердең тоғыр службазының 10 № отрядының 101 № ӧрт ӱзiрҷең частьында экскурсия иртiрiлген. Андағы тоғынҷылар проект араласчызына ӧртте арачыланҷаң тирiглернi, автомобильлернi паза ӧрт ӱзiрчетсе паза саайларда арачылағ тоғыстарын апарчатса тузаланчатхан техниканы кӧзiткеннер. Экскурсия тоозылчатханда, Виктор, ӧрт ӱзiрҷеңнернең чоохтазығ апарып, оларның сӧстерiнең пiлiп алған: хайдағдыр ол тоғыс – ӧрт ӱзiрҷең полары.
Iдӧк СВО араласчызына республиканың хығыртығларҷа тоғыс апарчатхан 112 система кiнiнҷе, гуманитарнай полызығ чығҷаң пiрге пунктча, транспорт орныхчатхан паза сағыбаан саайлар полдыртпас паза оларның салтарларын чох идерiнҷе тузаланылчатхан материальнай ресурстарның республикадағы резервi хайраллалчатхан складтарҷа экскурсия иртiрiлген. Хакасияның ГОЧС-ча ӱгредiг-методика кiнiнде Викторға лекция иртiрiлген, хайзы гражданскай арачыланыснаң, ЧС-наң паза сағыбаан саайлар полдыртпас паза оларның салтарларын чох идер пiрге хазна системазының (РСЧС) пӱдiзiнең палғалыстығ алғым сурығларын пiрiктiрген. Алынҷа хайығ айландырылған техногеннай паза чир-чайаандағы сағыбаан саайлардаң, iдӧк чаа тузындағы оңдайларда чонны арачылир сурығларны ӱгренерiне.
Аннаң пасха, стажировка хоостыра Виктор Тиксi Россиядағы «Хорғыс чох тудынар школа» марығларның республикадағы чардығында полып алған, хайзы «Беркут» лагерьде ӱртӱн айының iкiнҷi чардығында иртiрiлген, iдӧк ол ЧС-ча республика комиссиязының чыылиинда полған паза гражданскай арачыланысча Тиксi Россиядағы тренировкада араласхан.
Сом Хакасияның ГО, ЧС паза ПБ хазна комитедiнiң пресс-службазыни
Автор :
Татьяна Кабаева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
