Истiг чуртас тӧстирге
12.11.2025
Хабарлар
Халыхтар палатазындағы чыылығ тузында
Тоғазығ. Хакасиядаң табылған Россияның Хазна Думазының депутады Николай Шульгинов республикада нинҷе-де тоғазығ паза чыылығ иртірген
Хазна Думазы депутадының региондағы тоғыс неделязында республиканың чуртас-экономика тилізі, чылығ пирҷең тусты иртірер паза ӧнетін чаа операциязы араласчыларының сӧбірелеріне хабазар сурығларға чарыдылған тоғазығлар паза чыылығлар ирткен.
Тоғыс республиканың Халыхтар палатазының кiзiлерiнең чоохтазығнаң пасталған. Тоғазығның ӧӧн хайии Хакасияның чуртас-экономика тилізінің стратегиязына айландырылған. Аннаң пасха, араласчылар «Арығ кии» федеральнай проекттің чуртасха кирілчеткенін, туризм кӧстеенің тиліс оңдайларын, ідӧк чонны сағыссыратчатхан пасха сурығларны ӱзӱргеннер.
2025-2026 чылларда чылығ пирҷең тусты иртірер сурығларҷа чыылығ тоғыс чорығының ӧӧн чардығы полыбысхан. Депутат чылығ читірчеткен пірігіcтернің тимде полчатханынҷа акттар аларын тоозарына, килчеткен хысхызын Хакасияның чуртағҷыларына чылығ ізестіг читірілерін тӧстиріне хайығ айландырған.
Регионзар киліп, парламентарий ідӧк Алтай аймаа пазы Ирина Войнованаң тоғасхан. Тоғазығда Хакасияның чуртас-экономика тилізінің алынҷа программазының тоғыстары Алтай аймаанда чуртасха кирілчеткені ӱзӱрілген, Хубачар аалда ізіг суғны читірерінің качествозын кӧдірерінҷе сурығны пӧгерінде алынҷа тохтааннар.
Ӧнетін чаа операциязы араласчыларына паза оларның сӧбірелеріне хабазарына алынҷа хайығ айландырылған. Чааҷылар сӧбірелерінең тоғазығ тузында аймах сидіксіністер искірілген паза чӧптер читірілген. Пу чоохтазығ салтарларынҷа республика Ӧӧркі Чӧбінің депутаттары халыхчыларнаң, ӧнетін чаа операциязы араласчыларының сӧбіре кізілерінең хада-пірге социальнай хабазығларны иптиріне кӧстелген закон проекттерін тимнирлер.
Ідӧк Николай Шульгинов «Конвейерные технологии» ООО-да пол килген. Пу предприятие конвейер тиріглерін сығарча. Депутат компанияның сығарыс кӱзінең танысхан, устағҷынаң хада предприятиенің тиліс сурығларын паза орындағы ниме-ноо сығарчатханнарға хазна хабазығларын ӱзӱрген. Николай Шульгинов «Конвейерные технологии» ООО-ның ниме-ноозын, тоғыс пӱдізін паза тоғынҷыларның узын пӧзік паалаан.
Тоғыс чорығы Саяногорск городтың 50 чылына чарыдылған пайрамында араласханынаң тоозылған. Хазна Думазының депутады город чуртағҷыларын, оларның Хакасияның на нимес, че тиксі хазнаның промышленность паза культура тилізіне улуғ хозымын таныхтап, пайрамнаң алғыстаан.
– Хакасиязар чорых уғаа пай паза тӱзімніг полған. Піс республика тилізінің уғаа кирек сурығларын даа, орындағы алынҷа сидіксіністерні дее тирең ӱзӱргебіс. Ӧнетін чаа операциязының сӧбірелеріне хабазары паза регионның прай чуртағҷыларына истіг чуртас оңдайларын тӧстирі пістің ӧӧн пӧгіннерібіс полып халчалар. Прай искірілген сурығлар паза чӧптер тоғысха алылар, – таныхтаан Николай Григорьевич.
Сом Россияның Хазна Думазының депутады Н.Г. Шульгиновтың полысчызыни
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
