Хакасияның 10 медаль
07.11.2025
Хабарлар
Мирген Чебодаев командаа кӱмӱс медаль ағылған
Спорт. Ағбанда олаңай кӱресче Чарковтың турнирi ирткен. Спортсменнер алты регионның алнын алғаннар
Тиксі Россиядағы арға-мӧрій СССР-ның саблығ тренері В.И.Чарковтың хумартхызына чарыдылған. Кибiр хоостыра анда 21 часха читкелектер кӱс сынапчалар. 1 кiчiг хырласта 2005 – 2007 чылларда тӧреен оол-хыстар кибiске сыхханнар. Ідӧк 2008 чылда тӧрееннерге устарын кӧзiдерге чаратханнар. Спортсменнер 6 регионның алнын алғаннар: Хызылчар крайының, Кемеров паза Новосибирск областьтарының, Якутия, Тува, Хакасия республикаларның. Тиксі алза, 130 кiзi.
Турнирнi пайрамни азарында араласханнар Хакасия пазы Валентин Коновалов, спорт министрiнiң тоғызын толдырчатхан Дмитрий Сафронов, арға-мӧрійнiң ӧӧн чарғыҷызы Дмитрий Митрофанов. Сӧс пирiлген Валентин Олеговичке. Аарлығ аалҷы, чоох тудып, теен:
– Пу марығны иртiрерi – пiске улуғ чеес. Владимир Чарков кӧп оолға улуғ спортсар чол асхан. Ӱгренҷiлернiң аразында iкi хати олимп чемпионы Иван Ярыгиннi алынҷа таныхтирға кирек. Cаблығ спортсмен Владимир Ильичтiң холында харбазарға пастаан. Турнир илбек чир-суғҷыбысты сағысха кирерге, чииттерге кӱc cынирға оңдай пирче.
Кiзi асхынах полғаннаңар, марығ пiр кӱн ирткен. Абахайлардаңар чоохтаза, иң кӧп кiзi 50 кг кӧдiрiмде полған. Медальлар ӱчӱн 11 хыс харбасхан. 19 частығ Ксения Куйрукова Хакасия алнын алған. Пылтыр ол чиңiс тутхан, пӱӱл кӱресчее оң полбады, аның кӱмӱс медаль. Ксения – алтай чонның хызы. Ипчiлер кӱрезiнең алтынҷы чылы айғас парир. Олимп резервi училищезiн (техникумны) тоосхан соонда ол тӧреен чирiнзер айланған. Амды Шебалинода социальнай педагог полып iстенче. Ксенияның сағынған сағызы – Россияның спорт узының нормативін толдырыбызары. Аны чуртасха кирiп, ол Тағлығ Алтайдаң пеер марығларға чӧрче. Пу кӧдiрiмде Карина Токоякова (Хызылчар крайы) чиңiс тутхан. Ол спортсменнер сӧбiрезiнең. Пабазынаң iҷезi Владимир паза Анна Токояковтар Подтёсово посёлокта спорт кӱрезiнҷе секция апарчалар. Оларның тӧрт палазы кибiсте ӧcкен тирге чарир. Улуғлары – 20 частығ Карина, 16 частығ Станислав паза 14 частығ Варвара – кӱреснең айғазып, тӧремiл сыйыхтығ орыннарға сыхчалар. Токояковтар Хакасиязар удаа ааллап килчелер.
Iдӧк Айданаш Кудерек (53 кг), Валерия Карамчакова (55 кг), Софья Агафонова (57 кг), Анна Тюмерекова (59 кг), Анастасия Боргоякова (65 кг) пiстiң республикаа медальлар ағылғаннар. Пастағы iкi cпортсмен чиңiс тутхан, пасхазы iкiнҷi орынға сыххан. Оларның тренерлерi Марат Кичеев, Татьяна Карамчакова, Александр Шилинов, Аржаан Сарыг-оол, Дмитрий Митрофанов, Александр Трушин паза Александр Тогочаков.
Ооллар, хыстар чiли, 10 кӧдiрiмде кӱс сынааннар. Хакасия ӱчӱн 24 спортсмен турысхан. Олардаң азах меетке сыххан Мирген Чебодаев (65 кг). Сынны чоохтаза, анзы пiстiң кӱресчiлерге танығлығ чидiг. 2021 чылдаң Чарковтың турнирiнде оолларыбыс ӱзiнҷi орын на ӱчӱн харбасчалар. Хакас алыптар орай пыс парчалар, таң. Мирген Чебодаев Пии аймаандағы Маткичiг аалдаң. Ағаа 18 час, ол У(Т)ОР-да III курста ӱгренче. Марығ тузында чир-суғҷыбыс тӧрт тоғазығ иртiрiбiскен. Пастағызын ол 4:3 саннаң утып алған, iкiнҷiзiн – 10:0 саннаң, ӱзінҷізін – 5:1 саннаң. Че финалда «ыырҷызы» Ай-Демир Попууға 0:10 саннаң чиңдiр салған. Хакас оол, сағыстарынаң ӱлезiп, теен:
– Чӱреемде улуғ нимес ачырғас пар. Олох туста кӱмӱс медальға ӧрiнчем. Пылтыр мин ӱзiнҷiзi полыбысхам. Аннаң андар тоғынарға кирек.
Аймир Мамышев (79 кг) кӧңнi чох одырчатхан. Тренерлер чиит кiзi хайди даа алтын медаль холға кирер тіп ухаанҷылааннар нооза. Че кибiсте кирек удаа сағыбаан оңдайнаң парыбысча. Аймир пазох ӱзiнҷi орынға сыхты. Пӧзiк сыннығ, сылағай оолның прай ниме алнында. Олох чидiге читкеннер Ай-Белек Билва (65 кг) паза Максим Чебочаков (92 кг). Кӱресчiлернiң тренерлерi – Денис Карамчаков, Леонид Чебодаев, Владислав Барашков, Алексей Ломбу, Владимир Чучунов, Виталий Канзычаков, Александр Трушин, Александр Тодозаков.
Хакасияның командазы 10 медаль утхан: 2 алтын, 5 кӱмӱс паза 3 хола. Чиңiсчiлерге чемпион хурларын паза 15-ер муң салковай читiргеннер, iкiнҷi орын ӱчӱн 10-ар муң cалковай тӧлелген, ӱзiнҷi орын ӱчӱн – 2,5-ер муң салковай. Сыйыхтарға ахчаны Хакасияның правительствозы позытхан.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
