Законның кӱзi – аны толдырчатханында
07.11.2025
Хабарлар
Хакасия пазы Валентин Коновалов сыйыхтар алған приставтарнаң хада
Пайрам. 1 кiчiг хырласта Россияның чарғы приставтарының кӱнi алғым таныхталған
Россияның чарғы приставтарының федеральнай службазының Хакасиядағы пӧлии iдӧк ол пайрамға хозылған. Россияның чарғы приставтарының службазына пӱӱл 160 чыл толған нооза.
Аннаңар Ағбанда Тимiрчолҷыларның культура туразынзар чарғы приставтарын алғыстирға, туған-чағыннарынаң пасха, кил парғаннар Хакасия пазы Валентин Коновалов, Хакасияның Ӧӧркi Чӧп кнезi Сергей Сокол, Россия Федерациязының Хакасиядаң сенаторы Олег Земцов, Хакасияның Арбитраж чарғызының кнезi Валерий Ципляков паза даа пасха аарлығ аалҷылар.
Россиядағы чарғы приставтарының тоғызы 1865 чылдох Россия императоры II Александрның чарадии хоостыра пасталған. 1917 чылда, Cовет ӱлгӱзi турыбысханда, чарғы приставтарын чох иткеннер. Оларның тоғыстарын Советскай милиция толдырған. 1990 чыллардағы алызығлар пол сыхханда, чарғызар кӧп кiзi айлан турған. Iди 1997 чылда чарғы приставтарының службазын хатап айландырғаннар. Че андада ол Россияның юстиция министерствозының хайиинда полған.
Хакасияда чарғы приставтарының службазы 1998 чылда сiлкер айында тӧстелген. Соонаң чарғы приставтарының службазы алынҷа подразделение полыбысхан. 2009 чылда Россия президентiнiң чарадии хоостыра Россиядағы чарғы приставтарының кӱнiн чыл сай кiчiг хырлас айының пастағы кӱнiнде таныхтап турарға чаратханнар.
Пу пайрамнығ кӱнде Тимiрчолҷыларның культура туразынзар чыылған чонны экрандағы видео пастыра алғыстаан Россиядағы чарғы приставтарының федеральнай службазының пастығы Дмитрий Аристов. Соонаң чон алнынзар сыххан Хакасияның ӧӧн приставы, МВД-ның полковнигi Омак Достай. Аның чооғынаң, Россиядағы чарғы приставтары 160 чылны турыстығ ирткеннер. Хазнада хайдағ даа ӱлгӱ алысчатса, чарғы приставтарының пӧгiннерi алыспин турғаннар. Олар чарғы тоғызы тӱзiмнiг парарына кӧп кӧстеглер толдырчалар: ӧдiстерiн тӧлебинчеткеннернең паза алименттердең тис чӧрчеткеннернең харбасчалар, чарғы полчатса, сайбағлар полдыртпазын кӧрчелер, кiзi праволарын арачылапчалар. Пу киректерде чахсы полысчалар сағамғы технологиялар. Алынҷа чылығ сӧстер полған чарғы приставтарының ветераннарына. Олар постарының пiлiстерiнең чииттернең ӱлесчелер.
Ӧӧн пристав Омак Достай тоғыста пӧзiк чидiглерге читкен чарғы приставтарын федеральнай службаның ведомственнай медальларынаң паза Аарластығ пiчiктерiнең таныхтаан. Андағ сыйыхтарға кӧп пристав турысхан. Оларның санында Олег Сандыков. Ол «Тоғыста иң артых» кӧксiне хазанҷаң танығнаң сыйлаттырған. «160 лет основания института судебных приставов» медаль пирiлген Андрей Челтыгмашевке паза Наталья Бурнаковаа. Чарғы приставтарының федеральнай службазының Аарластығ пiчиинең таныхтатхан Людмила Чучунова паза iдӧк алғыстас пiчиин алғаннар Саяна Торбастаева, Елена Канзычакова, Хакасия пазының Аарластығ пi
чиин алған Андрей Чебодаев.
Анаң чарғы приставтары службазының тӧреен кӱнiнең алғыстааннар Хакасия пазы Валентин Коновалов, Хакасияның Ӧӧркi Чӧп кнезi Сергей Сокол, Россия Федерациязының Хакасиядаң сенаторы Олег Земцов паза даа пасхазы. Оларның чоохтарынаң, чарғы приставтары амғы туста оой нимес тоғыс апарчалар. Мында законнарны чахсы пiлерге паза тӧдiр пазынмас хылыхтығ поларға кирек. Чарғы чарадығлары тузында паза толдыразынаң идiлчетсе, полған на кiзi позын арачылирына киртiнче.
Чарғы приставтарын сарыннарнаң паза теелбектернең алғыстааннар хакас филармониязының артисттерi.
Культура туразының алнында cомнар кӧзiдии азылған. Анда чарғы приставтары службазының ветераннарының паза сағам маңат тоғынчатхан приставтарның cомнары чон хайиина сығарыл парғаннар.
Сом Дмитрий Сунчугашевти
Автор :
Илья Топоев
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
