Комсомол чӧрімінiң наа тынызы
31.10.2025
Хабарлар
Комсомол билеттері читірілген соонаң
Танығлығ кӱн. 29 чарыста Хакасияның ӧӧн музейінде Комсомол кӱніне чарыдылған пайрам ирткен
Совет ӱлгӱзі тӧстелгенде, 29 чарыста 1918 чылда Тиксі Союзтағы Лениннің коммунистичеcкай чииттер чӧбінің (ВЛКСМ) пастағы чыылии ирткен. Ол тустаң 29 чарыста Комсомол кӱні таныхталған. Совет ӱлгӱзі тузында хазнабыстың полған на чиит чуртағҷызы комсомолец поларға сағынған. Андар иң пурун чахсы ӱгренчеткен, ӧткін чиит пионерлерні алҷаңнар.
Пу кӱннерде ңациональнай музейнің ікінҷі хадылындағы улуғ залда чон толдыра чыылыс парған. Сценазар Хакасия пазы Валентин Коновалов сыххан.
– 107 чыл мының алнында Тиксі Союзтағы Лениннің коммунистическай чииттер чӧбі тӧстелген. Ол хазнабыстың иң аар тузында азахха турып пастаан. 1918 чылда Гражданскай чаа пасталған. Олох туста Западтағы хазналарның чааҷылары пістің хазнабыссар кір сыхханнар. Комсомолецтер олардаң тоғыр чаалазығ апарғаннар. Ідӧк олар, Илбек Ада чаа тоозыл парғанда, хазнабысты азахха турғызарына кӧп кӱс салғаннар. Іди олар Хакасияда Сойан-Сус ГЭС-та, ТЭЦ-та паза даа пасха улуғ пӱдіріглерде араласханнар. Пӱӱн мин мының алнындағы комсомолецтерге паза оларның чолын аннаң андар узаратчатхан пӱӱнгі чииттерге алғызым читірчем, – теен Валентин Олегович.
Анаң сӧс пирілген «Афганистанның паза ӧнетін чаа операцияларының Россиядағы ветераннар чӧбі» тиксі Россия пірігізінің республикадағы пӧлиинің кнезі Александр Векшинге:
– Аарлығ комсомолецтер, мин сірерні мындағ танығлығ кӱннең алғыстапчам. Мин хаҷан-да октябрёнок, пионер, комсомолец полғамох. Пістің чиит тузыбыс хынығ ирткен. Хазнабыстың халых чуртазында ӧткін араласчаңмыс. Аға-ууҷаларға полысчаңмыс. Амды ол хатап тӧстеліп тоғынчатханына ӧрінчем. Мин Илбек Ада чаа соонаң хазнабысты азахха турғысхан комсомолецтерге улуғ алғызым читiрчем. Пӱӱнгі комсомолецтерні ӱлӱкӱннең алғыстапчам.
Пайрамның иң танығлығ чардығы – чииттерні комсомолға алғаны. Полған на оол-хысты сценазар хығырып, Хакасия пазы комсомол биледін читірген. Прай 16 оол-хыс комсомолға кірген. Ол санда Алтай аймаандағы Кӧк хайа аалның тоғызынҷы класс ӱгренҷізі Карина Боргоякова.
– Мині комсомолға кiрерге ӧӧрем хығырған. Ол илееде чыл, комсомолец полып, республиканың халых чуртазында араласча. Мин дее тыс пілбес кізібін. Аннаңар ӧӧрем пеер хығырғанда, мин ӱр сағынмаам. Пӱӱн піске комсомол биледі пирілген. Ол уғаа нандырығлығ. Мының алнында мин пу чӧрімнің хай пірее чыылығларында араласхам. Амды, тізең, мин сын комсомолец полчам. Іҷе-пабам даа минің ӱчӱн ӧрінчелер. Олар октябрёнок паза пионер полғаннар, – чоохтаан Карина.
Халғанҷызында Ағбан пилтірі аймааның Тазоба пилтіріндегі школаның ӱгренҷілерін пионерлерге алғаннар. Сценазар сыххан 40 палаа хызыл галстук пайрамни читірілген. Анаң улуғ аалҷылар мының алнындағы тустың кибірі хоостыра ол хызыл галстукты олғаннарның мойныларына палғааннар. Олғаннар пионер атты турыстығ апарардаңар сӧс пиргеннер.
Ол туста хаҷан-да пионер полған улуғ частығ аалҷыларның харахтары частан парған. Олар, чиит тӧлзер поғдархаснаң кӧріп, харах частарын чысхлааннар. Аға-ууҷалар постарының олған тузын сағысха киргеннер, неке.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
