Хысхы тусха прайзы тимде нимес
31.10.2025
Хабарлар
Видеоселекторҷа чыылығ. Киҷее Хакасия пазы Валентин Коновалов город-аймахтар пастарынаң чылығ пирҷең тусха чарыдылған чыылығ иртiрген
Муниципальнай пӱдiстер хысхы тусха тимненiс пiчiктерiн алчатханы чыылығның ӧӧн сурығларның пiрсi полған.
Хакасияның ЖКХ паза энергетика министрi Максим Виноградов республикада чылығ пирҷең тус хайди иртчеткеннеңер искiр пирген.
Федеральнай сыныхтағ системазы сананыстарынҷа, ӱртӱн айынаң сығара чарыс айының 30-ҷы кӱнiне теере Хакасияның чурт-коммунальнай комплексiнде 15 сағыбаан кирек сығысхан, ол санда – ӱс саай. Пылтыр пуох тусха 20 кирек сығысхан.
Халғанҷы неделя аразына Абаза, Ағбан паза Харатас чуртағҷыларынаң сигiс хоп кiрген, олар чылығ паза iзiг суғ чахсы пирілбинчеткеніне теелгеннер. Айланыстар хоостыра тоғыс апарылча. Хакасияның чурт-коммунальнай хоных паза энергетика министерствозында ЖКХ сурығларынҷа «iзiг линия» 8(3902)22-10-75 номерҷе тӧстелген, хайзынзар чуртағҷыларға сурығларҷа айланарға чарир.
Город-аймахтарның котельнайларында тиксi 50 муң тонна хара тас чыындызы тӧстел парған, ол хара тастың синминчеткен чыындызының 200 азыра процентiне тиңнелче. Ағбандағы ТЭЦ-та хара тас чыындызы 100 процентті асча. Боград аймаандағы Тадар Тис аалдағы «Эко Стандарт» чылығ пирҷең организацияда хара тас чыындызы алты ла кӱнге чидер.
Чарыс айының 28-ҷi кӱнiне Хакасияда чылығ пирҷең 49 организациядаң 41 организациязы чылығ пирҷең тусха тимнен салғаннаңар акт алып алған. Ағбанда, Харатаста, Абазада, Саяногорскта чылығ пирҷең организациялар тимненiс пiчiктерiн алып алғаннар. Сорығ городха, Таштып аймаана, Асхыс аймаандағы Пилтiр аалға тимненiс акты «готов с условиями» пирiл парған. Алтай, Пии, Ағбан пилтiрi аймахтарының чылығ пирҷең прай организациялары хысхы тусха тимнен салғаннаңар акттар алып алғаннар.
Боград аймаандағы Сон пазы, Сарығ хас, Тадар Тис аалларға, Орджоникидзе аймаандағы Копьёв паза Приисковай аалларға, Шира аймаандағы Жемчужнай, Тойым, Тустығ кӧл аалларға тимненiс пiчiктерi пирiлбееннер. Муниципальнай пӱдiстердегi котельнайлар хысхы тусха тимненмеенiнің ӧӧн сылтағлары санында хара тас чыындызы саналбааны, котельнайлар тоғынҷылары ӱгредiг иртпеенi, котельнайдағы ниме-ноо инвентаризация иртiрiлбеенi полча. Хакасияның ЖКХ паза энергетика министерствозы город-аймахтар пастарынаң хысхы тусха тимненіске чарыдылған видеоселектор палғалысча чыылығларны кӱннiң иртiрче. Хакасияның чурт-коммунальнай хоных паза энергетика министрi Максим Виноградов хысхы тусха тимненiс пiчiктерiн ал полбаан муниципальнай пӱдiстер пастарынаң кӱннiң палғалысча.
Сом r-19.ru сайттаң
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
