Чонны имнепчеткен улус – хаҷан даа аарласта
29.10.2025
Хабарлар
Хакасия пазының пастағы орынҷызы Татьяна Курбатова медсестра Зарина Коковаа республика пазының алғыстас пічиин читірген
Сыйыхтас. Г.Я.Ремишевскаяның адынаң республиканың ӧӧн имнег туразының 65 чыллығ пайрамын таныхтап, иң чахсы имҷiлернi паза имнег тоғынҷыларын сыйыхтааннар
Кӱннiң пастағы чардығында пу пайрамға чарыдылған «Опыт, кибiрлер паза имнег киреендегi амғы технологиялар» наука-практикалығ конференция имнег туразының актовай залында иртiрiлген. Анда араласханнар имнег учреждениезiнiң специалисттерi, Хызылчардағы имҷiлер паза студенттер.
Олох кӱн пайрамнығ чардығы концерт кӧзiдiлiп иртiрiлген. Махтаға паза улуғласха турысчатхан, тiспен iстенчеткен имҷiлернi, имнег тоғынҷыларын алғыстирға С.П.Кадышевтiң адынаң чон чайаачызының национальнай кiнiнде чыылысханнар. Пайрамнығ чардығын видеофильмнең пастааннар, анда имнег туразы чуртас ағынында хайдағ тустар паза алызығлар тобырғаннаңар, пӱӱнгi чидiглерiнеңер кӧзiдiлген. Анаң имнег туразындағыларға чылығ, алғыстас сӧстерi кӧп чоохталған. Иң пурун Хакасия пазы Валентин Коноваловтың алғыстазы читiрiлген. Андада Валентин Олегович тоғыс хоостыра «Сибирьдегi чӧптезiг» субъекттернiң экономикаҷа пiрге тоғынарынҷа регионнар аразындағы ассоциацияның (МАСС) тиксi чыылиинда араласчатхан, аннаңар аның видеоға азынада пазылған алғыстазы полған:
– Ремишевскаяның адынаң республиканың ӧӧн имнег туразының тоғынҷыларын прай чӱреемнең алғыстапчам имнег учреждениезiнiң 65 чылынаң! Имҷiлерге, медсестраларға, фельдшерлерге, санитарларға паза пасхазына, хайзылары постарын имнег киреене, чуртағҷылар хазиин хайраллирына пир салғаннар, алғызым читiрчем. Сiрерге тоғыста уғаа нандырығлығ паза паарсах хылии-оңдайлығ, пӧзiк устығ поларға паза посха сыбыра ӱгренерге киректелче. Ол – олаңай ла тоғыс нимес. Ол – кiзiлерге сыбыра полыс турғаны, халых паза социальнай чуртасты чахсыландырҷаң кирекнең айғасханы. Алынҷа таныхтирға сағынчам имнег туразы ветераннарының улуғ хозымын, олар чиит специалисттернең илбек опыдынаң паза пiлiстерiнең ӱлесчелер. Аарлығ арғыстар, сiрерге оой нимес тоғызыңарда профессияҷа чидiглерге чидерге, пик хазых, часка алғапчам, позыңар паза сӧбiреңер дее пай чуртастығ полыңар.
Хакасия правительствозының паза Ӧӧркi Чӧбiнiң, Хакасияның хазых хайраллаҷаң министерствозының паза имнег туразының устағ-пастааның Аарластығ паза алғыстас пiчiктерiнең 50 азыра имнег тоғынҷызы сыйыхтатхан. Хакасияның правительствозы адынаң чоох тутхан республика пазының пастағы орынҷызы Татьяна Курбатова. Махтағлығ чооғында чонны имнепчеткен улусха алғызын читiрген соонаң ол правительство сыйыхтарына турысханнарны чеестеен. «Хакас Республиканың саблығ имҷiзi» аарластығ атха турысхан поликлиникадағы имҷi-сурдолог-оториноларинголог Алла Назарова, «Хакас Республиканың хазых хайраллирының саблығ тоғынҷызы» атха – наркотическай ӧӧн посттағы улуғ медсестра Надежда Иваненко. «Хакасияның iстенiс сабланызы» медальнаң поликлиникадағы имҷi-кардиолог Андрей Чучунов паза табырах имнег полызии службазындағы медсестра-анестезиолог Екатерина Афонина сыйыхтатханнар. Правительствоның Аарластығ пiчиинең – тӧрт кiзi, Хакасия пазының алғыстазынаң – 11 кiзi.
Хакасия пазының алғыстазынаң таныхтатханнарның санында полған 3-ҷi терапия пӧлииндегi палата медсестразы Зарина Кокова. Ол имнег туразында 30-ха чағын чыл iстен парир.
– Имнег тоғынҷызы профессиязын таллап алғаныма пiр дее хомзынминчам, тоғызым кӧңнiме кiрче. Хазии уйан кiзiлерге полызарға, оларнаң чоох алызарға хынчам. Пiлчем, пiстiң тоғызыбыс пiр дее оой нимес – ағырчатханнарны имнирге, оларның соонҷа кӧрерге. Че кемге-де пациенттернең тоғынарға кирек нооза, оларға имнег полызиин пирiп. Пiрееде най сидiк полча, че пасха чирзер тоғынарға парардаңар сағыс хаҷан даа тутпаам. Мин Асхыста тӧреем-ӧскем, школа соонаң Душанбедегi имнег училищезiнзер медсестраға ӱгренерге кiрiп алғам. Душанбе ада чирi полча. Минi iҷем, пабамның хайиинда ползын тiп, андар ӱгренерге ызыбысхан. Че училищенi тоозыбысхандох, Хакасиязар айланғам, iҷемзер матап тартылғам. Хормачыланып чоохтанадырбын, мин хакас мусульманка полчам. Республиканың имнег туразынзар тоғынарға килгенiмде, минi 3-ҷi терапия пӧлиинзер ысханнар, аннаң пеер пiр ле пӧлiкте iстен парирбын. Хада тоғынчатхан арғыстарымны пу пайрамнаң алғыстап, ӧменең iдӧк ле ынағ тудынарға, прайзына пик хазыхтығ, часкалығ поларға, аннаң андар тiспен iстенiп, кiзiлерге туза ағыларға алғапчам, – сағызынаң ӱлескен Зарина Николаевна.
Хакасияның хазых хайраллаҷаң министрi Олег Ананьевский имнег туразы республикада пiр муң азыра кiзi iстенчеткен иң не улуғ организациялар санына кiрче тiп таныхтаан. Анда саблығ имҷiлернiң, имнег тоғынҷыларының ӧмезi тӧстел парған, имнег наукаларының докторлары паза кандидаттары, Россияның паза Хакасияның кӧп саблығ имҷiзi, ветераннар iстенчелер. Пу кӱнде имнег туразында пӧзiк технологиялығ имнег полызии муңарлап кiзее пирiлче. Ол санда чӱрекке сидiк операциялар идiлче. Амғы тустағы аймах-пасха имнег технологияларынаң чиит имҷiлер дее ӧткiн тузаланчалар. Олег Васильевич министерствоның Аарластығ пiчиин тӧрт имҷее паза пис имнег тоғынҷызына читiрген, алғыстас пiчиин – алты кiзее.
Хакасияның хазых хайраллаҷаң министерствозының Аарластығ пiчиинең сыйыхтатханнарның пiрсi полча чӱрек-тамырлар хирургиязы пӧлиинде тоғынчатхан улуғ медсестра Полина Баинова:
– Республиканың имнег туразында 1997 чылдаң iстенчем. Мин, тӧреен Райковтар аалыҷаамдағы школаны тоозыбызып, 1994 чылда Ағбандағы имнег училищезiнзер ӱгренерге кiргем. Медсестраға ӱгренiп алғанда, пу имнег туразының iкiнҷi хирургия пӧлиинзер тоғысха алылғам. Палата медсестразы полып тоғынғам. 2007 чылда Сибирьдегi имнег хазна университедiнзер кiрiп алып, Томскта медсестраларның пӧзiк ӱгредиин алғам. Пу вузты 2013 чылда тоосхам. Ӱс чыл пазынаң мин чӱрек-тамырлар хирургиязы пӧлиинiң улуғ медсестразына турғызылғам, ол 2017 чылда азылғанда. Уғаа нандырығлығ тоғыс. Ортын паза кiчiг персоналның тоғызын сыныхтағда тудып, iдӧк пӧлiксер киректелчеткен имнер паза имнег оборудованиезi тузында пирiлер ӱчӱн нандырчам. Мин уғаа ынағ ӧмеде тоғынчам. Прай тоғынҷыларны пу пайрамнаң алғыстап, ӧмее мыннаң мындар iдӧк ле ынағ тудынып iстенерге алғапчам.
Пу пайрамда чонны iдӧк алғыстаан имнег туразының ӧӧн имҷiзi Максим Максимов. Ол имнег учреждениезiнiң устағ-пастааның Аарластығ пiчиинең кӧп имҷiнi паза имнег тоғынҷызын таныхтаан. Андағ сыйыхха 20 азыра кiзi турысхан. Сценазар сығып, пасха даа пастыхтар имнег туразындағы улусха чылығ сӧстер чоохтааннар. Хакас филармониязының чайаачы устары паза ӧмелерi концертнең ӧрiндiргеннер.
Сом Дмитрий Сунчугашевти
Автор :
Инора Боргоякова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
