Чайаачыларның тоғызында – тілібістің пайы
29.10.2025
Хабарлар
Марығ. 24 чарыста «Читіген» Хакас национальнай драма паза чон сарыннары театрында «Минің тӧреен тілім-2025» марығның чиңісчілеріне сыйыхтар читіргеннер
Тӧреен тілге чарыдылған марығны Хакасияның Чайаачылар туразы национальнай паза территориальнай политика министерствозының хабазиинаң иртірче. Ол марығ пістің республикада кибірге кирiл парған тирге чарир. Чыл сай чир-суубыстағы чайаачы олғаннар, чииттер паза улуғлар, анда аралазып, постың узынаң сынасчалар. Пӱӱл марыға республиканың аймах-пасха пулуңнарынаң 28 чайаачы тоғыс ызылтыр. Иң кӧп тоғыс Асхыс аймаанаң паза Ағбан городтың чуртағҷыларынаң кіртір.
Пу чыл марығ Илбек Чиңістің 80 чылына паза Ада чир-суубыс арачылағҷыларының чылына чарыдылған. Чайаачы чуртағҷыларыбыс ікі номинацияда устарын кӧзіткеннер: «Литература материаллары», «Видео чайаачызы». Полған на номинацияда аймах чайаачы тоғыстарға алынҷа сыйыхтығ орыннар кӧрілген.
Пу кӱннерде, тізең, марығның салтарлары искірілген. Артыхтарның артыхтарына «Читіген» драма театрының пайзаң ибінде дипломнар, ахчалығ сыйыхтар читірілген. Чиңісчiлернің аразында ӱгренҷілер, ӱгретчілер, библиотека тоғынҷылары, культура кіннерінің тоғынҷылары паза воспитательлер полғаннар.
Асхыс аймааның Ӱс чулдағы М.Е.Кильчичаковтың адынаң ортымах школаның 11 класс ӱгренҷізі Эльза Канзычакова «Литература материаллары» номинацияның «Хакас тілінең иң чахсы пазылған чоох» чардығында сыйыхтығ орынға турысхан. Ӱс чулның чиит чуртағҷызы постың чооғын ӧнетін чаа операциязында араласхан харындазы Карим Сарлинге чарыттыр.
– Марығдаңар искіріг килгенде, мин пастап Илбек Ада чаада араласхан алай СВО-дағы чааҷыларға кибеліс чарыт пирерге сағынғам. Че соонаң минің хараам алнында Карим харындазым турыбысхан. Андада мин чайаачы тоғызымда ӧнетін чаа операциязында араласхан харындазымның омазын кӧзіт пирерге чаратхам. Аҷама чарыдылған чоохты пазыбысханда, аны ӱгретчіме кӧзіткем. Ол тоғыс аның кӧңніне кірген, – теен Эльза.
Хакас тілінең пазылған чайаачы тоғыстарын ідӧк Асхыс аймаандағы Калининдегі ортымах школаның ӱгренҷілері Лина Мамышева, Мария Кутукова, Василина Мамышева ысханнар.
Калининдегі ортымах школаның 11 класс ӱгренҷізі Лина Мамышева «Гвардия чааҷызы» істезігліг тоғыстың авторы полча. Ол «Литература материаллары» номинацияның «Хакасияның чааҷы-писательлері» чардығында араласхан. Чиит хыс Михаил Еремеевич Кильчичаковтың «Ікі кинек» кибелізін ӱзӱртір.
– Кибелістi ӱзӱрчеткенде, мин аймах литературанаң тузаланғам. Ол санда «Хакас чирі» газетада Майя Кильчичакованың сыххан статьязынаң. Ідӧк мин тоғызымда саблығ писательнің чуртас чолын істескем,– тоғызынаңар чоохтаан Лина.
Мария Кутукова «Литература материаллары» номинацияның «Хакас тілінең иң чахсы пазылған чоох» чардығында пос кӧрізі хоостыра тимнелген чайаачы тоғыс кӧстеенде узы кӧрінген. Читінҷі класста ӱгренчеткен хызыҷахтың «Хоосхаҷах» узун кибелізін жюри пӧзік паалаан. Хайди таныхтаан Хакас радиозының хабарҷызы ИннаТодинова, Марияның кибелізін хығырчатханда, аның хоосхаҷағы хараам алнында турыбыс турған. Ол чиит поэттің хоос сӧзін пӧзік паалаан.
Василина Мамышева 11 класстың ӱгренҷізі олох номинацияда «Уйа» чооғынаң араластыр.
– Мин чооғымда хайди палалар, хустың уйазын таап алып, анда чатчатхан нымырхаларны холларынаң тутхлап, уйаны сайбабысханнарынаңар пасчам. Анда сын чуртаста полған нимедеңер чарыдылча. Ол ӱгредігліг чоох хайди чир-чайаанда орта тудынарға кирек полчатханнаңар искірче, – чоохтаан Василина.
Ағбандағы «Дашенька» олған садының воспитательі Сарима Асочакова городтың ӧткін чуртағҷызы полча. Ол сыбыра аймах марығларда араласча. Воспитатель марыға СВО араласчыларына чарыдылған кибеліс пас салтыр. Паза «Видео чайаачызы» номинацияда палаларынаң хада хакас тілін хайраллирына паза сабландырарына чарыдылған хысхаҷах видео суурыбыстыр.
– Марығда мин палаларымнаң хада араласхам. Мин палаларым хайди аалда хакастапчатханын паза олар мында городта хайди пос тілінең чоохтасчатханын видеода кӧзіт пиргем. Аның узуны пис минута, – хысхаҷахти тоғызынаңар искірген Сарима Асочакова.
Автор :
Ольга Томочакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
