Олар чон сағызында хаҷанға даа халарлар
29.10.2025
Хабарлар
Асхыс аймааның пазы Абрек Челтыгмашев Евгений Кайлачаковтың Мужество орденін аның ипчізі Анжела Олеговнаа (ол Димитрий Тамбовцевнең хости турча) паза хызы Миленаа читірген
Матырлар тузы. Асхыс аймааның устағ-пастаа туразында, ӧнетiн чаа операциязында аралазып, чуртастарын пир салған чир-суғҷыларыбыстың хазна сыйыхтарын оларның туған-чағыннарына пайрамни читiргеннер
Мероприятиеде араласханнар Асхыс аймааның пазы Абрек Челтыгмашев, Асхыс, Таштып аймахтарынҷа паза Абаза городча чааҷы комиссары Димитрий Тамбовцев паза, ӧнетiн чаа операциязында махачы чаалазып, чуртастарын пир салған чааҷыларның туған-чағыннары.
Хайди анда искiрiлген, Евгений Витальевич Кайлачаков 26 кӱргенде 1995 чылда Асхыс аймаандағы Халарлар аалда тӧреен. 16 № профессиональнай училищенi тоозып, анда тиксi пӱдiрiг тоғыстарының узы специальность алған. Вахта оңдайынаң тоғынған. 2016-2017 чылларда срочнай чааҷы службазында гранатомётчик полған, кiчiг сержант ат алған. Россия президентiнiң Указы хоостыра 2022 чылның ӱртӱн айында чардыхти мобилизацияа хығыртылған, войсколарда атығҷылар отделениезiнiң командирi полған.
Евгений Кайлачаков 6 хосхарда 2025 чылда, ДНР-да чаа пӧгiннерiн толдырчадып, матыр чiли чуртазын пир салған.
Ада чир-суубысты арачылап, махачы чааласхан ӱчӱн, Евгений Витальевич Кайлачаков Мужество орденнең сыйыхтатхан (ӱреен соонда). Абрек Челтыгмашев хазна сыйиин матырның ипчiзi Анжела Олеговнаа читiрген.
Евгений Николаевич Торточаков 10 кӧрiкте 1966 чылда Таштып аймаандағы Мадыр аалда тӧреен. 1984 чылда СПТУ-27 тоосхан, тракторист-машинист специальность алған. Вахта оңдайынаң тоғынған. 19 сiлкерде 2024 чылда чир-суғҷыбыс, контракт идiп, штурмовой ротада водитель-атығҷы полып служба апарған.
Евгений Торточаков 10 отта 2024 чылда, ДНР-да чаа пӧгiннерiн толдырчадып, матыр чiли чуртазын пир салған. Ада чир-суубысты арачылап, махачы чааласхан ӱчӱн, Евгений Николаевич Торточаков Жуковтың медальынаң сыйыхтатхан (ӱреен соонда).Хазна сыйии аның хызы Ольга Евгеньевнаа паза пиҷезi Татьяна Николаевнаа читiрiлген.
Дмитрий Владимирович Туртугешев 6 сiлкерде 1985 чылда Таштып аймаандағы Мадыр аалда тӧреен. 2003 чылда тракторист-машинистке 16 № ПУ-да ӱгренiп алған. 2021 чылда «агрономия» специальностьча пӧзiк ӱгредiг алған. Назаров аймаанда агроном полып iстенген. 2003 – 2005 чылларда срочнай служба ирткен. 2014 чылда контракт идiп, 2017 чылға теере Калининградта чааҷы службазын апарған. 2022 чылда ӱртӱннең улуғ хырласха теере Дмитрий Мариуполь городта пӱдiрiгде тоғынған. 2023 чылда арачыланыс министерствозынаң iкiнҷiзiн контракт иткен. Олох чылда чарыс айынаң сағба чох чiт парғанға саналған. 7 чарыста 2024 чылда чарғы чарадиинаң ӱреенге саналған.
Дмитрий Владимирович Туртугешев махачызы ӱчӱн Мужество орденге турысхан (ӱреен соонда). Хазна сыйиин аның ипчiзi Валентина Ивановнаа, оолғы Алексейге паза хызы Марияа читiрiлген.
Родион Сергеевич Токмашев 17 ӱртӱнде 1983 чылда Асхыс аймаандағы Асхыс посёлокта тӧреен. Школа соонда ол ПУ-18 аал хонии машиналарын паза тирiглерiн тыхтирынҷа слесарь специальнозын алған. Анаң 2017 чылда Ағбандағы политехническай техникумны тоозыбысхан. Грек-рим кӱрезiнең айғасхан, соонаң, олаңай кӱреске кiрiп, спорт узының кандидады полыбысхан.
2001 – 2003 чылларда срочнай чааҷы службазын ирткен. Аны ол, автомобильлер водительi полып, кiчiг сержант аттығ апарған. 2024 чылның орғах айында арачыланыс министерствозынаң контракт идiп, мотострелковай отделениенiң улуғ атығҷызы полып служба иртчеткен.
Родион Сергеевич Токмашев 1 чарыста 2024 чылда, ДНР-да чаа пӧгiннерiн толдырчадып, матыр чiли чуртазын пир салған. Амды аның Мужество орденi iҷезi Ирина Алексеевнаа, ипчiзi Лилия Макаровнаа, хызы Полинаа, оолғы Викторға паза ипчiзiнiң iҷезi Раиса Григорьевнаа читiрiлген.
– Пiрдеезi мындағ кирекче чыыларбыс тiп сағынмаан. Полған на сӧбiре чағыннарынаңар сағысты чӱреенде ал чӧрче. Кем-де ӧнетiн чаа операциязынзар пос кӧңнiнең парыбысча, кем-де – мобилизацияҷа. Хаҷан пiстiң хазнаа ыырҷы хорғыс ағылча, пiстiң иреннер хыйа тур халбинчалар. Палаларны паза пархаларны ӧскiрерге кирек. Олар постарының матырларын ундубазыннар. Ӧнетiн чаа операциязы табырах тоозылзын, паза пiстiң чуртазыбыс амыр ползын, – таныхтаан Лилия Токмашева.
Виталий Петрович Чертыков 9 хосхарда 1979 чылда Асхыс аймаандағы Паза аалда тӧреен. 1994 чылда Пуланнығ кӧлдегi школада 9 класс тоосхан, анаң фермада чабан полып тоғынған. 19 ciлкерде 2024 чылда ол, арачыланыс министерствозынаң контракт идiп, СВО-зар парыбысхан. Анда позына «Тадыр» сола ат алып алған. Чааҷы службазын штурмовой взводтың атығҷы радиотелефонизi полып иртчеткен. Виталий Петрович Чертыков 3 отта 2024 чылда, ДНР-да чаа пӧгiнiн толдырчадып, чуртазын пир салған. Чир-суғҷыбыс, махачы чааласхан ӱчӱн, Жуковтың медальынаң сыйыхтатхан (ӱреен соонда), матырның хазна сыйии пиҷезi Виктория Петровнаа читiрiлген.
Владимир Валерьевич Торточаков 2 хосхарда 1980 чылда Хызылчар городта тӧреен. 11 класс тоозып, ДОСААФ-та «С» категориялығ водительге ӱгренiп алған. Вахта оңдайынаң тоғынған. 1998 – 2000 чылларда Россияның Тирiглiг кӱстерiнде срочнай служба ирткен. Ол улуғ сержант аттығ мотострелковай батальонның взвод командирi полған. СВО-да «ТОР» сола ат позына алған. 2025 чылның 19 кӱрген айынаң cағба чох чiт парған. Арғыстары аны профессионал чiли, iзестiг арғысха санапчалар. Махачы чааласхан ӱчӱн Владимир «За отвагу» медальнаң cыйыхтатхан. Хазна сыйии ипчiзi Алёна Ивановнаа, хызы Айселиге паза харындазы Сергейге читiрiлген.
– Владимир минiң улуғ харындазым полған. Паба-iҷем аны патриотха ӱгреткеннер. Мин позым 2018 чылдаң контрактча чааҷы полчам. Владимир СВО-зар парарға чарадыбысханда, мин iдӧк Чир-суубысты арачылирға иткем. Че ол минi парбасха чӧптеен, хайраллирға сағынған. Ӱр нимеске ле ол взвод командирiне теере ӧс парыбысхан, офицер ат аларға кирек полған, че чуртас пасха оңдайнаң парыбысты. Аның арғыстары Владимир кiзi кистiне чазынмаҷаң, сыбыра алнында поларға кӱстенҷең тiпчелер. Ол Ада чир-суубыстың турыстыра оолғы полған, – сағысха кирген Сергей Серафимович.
Андрей Владимирович Лихачевский 7 азығда 2003 чылда Асхыс аймаандағы Асхыс аалда тӧреен. Пииде ПУ-15 тоозып, столярға ӱгренiп алған. Футбол ойнирға хынҷаң. 1 улуғ хырласта 2024 чылда арачыланыс министерствозынаң iкiнҷiзiн контракт идiп, СВО-зар парыбысхан. Анда ол пулемётчик полған. Чир-суғҷыбыс, махачы чаалазып, 31 кӱргенде 2025 чылда матыр чiли чуртазын пир салған. Ол Мужество орденге турысхан. Хазна сыйии ипчiзi Алёна Петровнаа, пиҷезi Ксенияа, харындазы Михаилге паза чаҷазы Наталья Павловнаа читiрiлген.
Пу хомзыныстығ мероприятие араласчыларынзар Абрек Челтыгмашев айланған:
– Пылтыр аймахтың устағ-пастаа ӧнетiн чаа операциязында чуртастарын пир салған чир-суғҷыларыбысха хумартхы тас турғысхан. Аны пiс «Ӧлiмi чохсар хаалабысханнар» адап салғабыс. Пiстiң чир-суғҷыларыбыс хаҷанға даа чонның сағызында чуртирлар.
Хайди таныхтаан Димитрий Тамбовцев, Асхыс аймаанаң сыххан чир-суғҷыларыбыс прайзынаң кӧп сыйых алчалар. Анзы оларны сын ӧскiрчеткеннеңер киречiлепче. Туған-чағыннары матырларны сағыссыраснаң ибiрчелер, оларға таңдағы кӱнге киртiнiс пирчелер.
Ада чир-суубыс арачылағҷыларының махачы тудынызы чонның сағызында хаҷанға даа халар. Сыйыхтар пайрамни читiрiлгенi пiстiң аарлазыбысты, алғызыбысты кӧзiтче. Олар хазнаа службаны турыстыра апарғаннар. Матырларыбыснаң поғдархапчабыс, оларның чарых омалары пiснең хада халчалар, оларны пiс алнындағы тӧллерге пир турарбыс.
Мероприятие араласчылары, матырларны сағысха кирiп, пiр минута сым турғаннар.
Сом авторни
Автор :
Асхыс аймааның устағ-пастааның пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
