Аал хонии паза туризм сурығлары
29.10.2025
Хабарлар
Чыылығ тузында
Тоғыс чорығы. Чарыс айының 24-ҷi кӱнiнде Хакасия пазы Валентин Коновалов Россия президентiнiң Сибирьдегi федеральнай округтағы полномочиелiг кiзiзi чӧбiнiң чыылиинда араласхан
Ол Омск городта Анатолий Серышевтiң устаанынаң ирткен. Чыылығның ӧӧн сурии Сибирьнiң аал хонии промышленнозы комплексiнiң тилiзi полған.
Чыылығны пастап, Анатолий Серышев таныхтаан:
– Сибирьнiң аал хонии промышленнозы комплексiнiң пик ӧзiзi хазна тилiзiне, аал чуртағҷыларының чуртас синiн чахсыландырарына паза пiстiң алғым чирiбiсте чуртағҷыларны хайраллап халарына улуғ туза ағылча.
Халғанҷы нинҷе-де чыл аразына Сибирьнiң аал хонии промышленнозы комплексiнде чахсы алызығлар таныхталча. 2024 чылның салтарларынҷа округта аал хонии ас-тамаа сығарызы тиксi Россиядағы кӧзiдiглернi ас парыбысхан паза 104,5 процентке тиңнелген, ӧзiмнер паза чир тамаа сығарызы 112 проценттi ас парыбысхан.
Президенттiң полномочиелiг кiзiзi хыраҷыларға паза ӱлгӱ органнары устағҷыларына хада-пiрге толдырған улуғ тоғыс ӱчӱн алғызын читiрген.
Чыылығда хабазығ паза аал хонии ниме-ноо сығарызын алғыдары, экспортха хабазары, аал хонии ниме-ноозын садар наа чырғалларны тiлирі, ас-тамахты хайраллир оңдайларны чахсыландырары, ӱреннер сығарызы паза аал хонии ниме-ноозын тартар транспортты чахсыландырары ӱзӱрiлген. Iдӧк экспорт оңдайларын ӧскiрерiнҷе сурығ кӧдiрiлген.
Чыылығда араласханнар: Россияның аал хонии министрiнiң орынҷызы Андрей Разин, хазнаның транспорт министрiнiң орынҷызы Александр Пошивай, Сибирьдегi федеральнай округ субъекттерiнiң пастары, президенттiң полномочиелiг кiзiзi чӧбiнiң, наука кiннерiнiң паза отрасль пiрiгiстерiнiң кiзiлерi.
Хакасия пазы Валентин Коноваловтың таниинаң, Хакас Республика экология саринаң хорғыс чох поларына паза экономиканың пӧзiк технологиялығ отрасльларына, ол санда аал хонии промышленнозы комплексiне, алынҷа хайығ салча.
– Хакасияның аал хонии ниме-ноозының экспорты iкi хати, теедег, ӧс парған, 2023 чылнаң тиңнестiрзе. Республика экспорт стандартын кирерiнҷе Россияның 25 иң чахсы регионы санына кiрче, – таныхтаан Валентин Коновалов.
Олох кӱн Хакасия пазы Омскта ирткен «Сибирьдегi чӧптезiг» Россия Федерациязы субъекттерiнiң экономика палғалызының регионнар аразындағы ассоциациязының тиксi чыылиинда араласхан (МАСС).
Анда Сибирьдегi федеральнай округтағы президенттiң полномочиелiг кiзiзi Анатолий Серышев араласхан.
Чыылығ тузында Сибирьдегi прай регионнар устағҷылары аалҷыларны удурлир индустрияа чарыдылған сурығны ӱзӱргеннер. Ол Сибирьдегi федеральнай округтың чуртас-экономика тилiзiнiң ӧӧн чардығы полча паза туризмнiң ӧӧн кӧстее чiли 2035 чылға теере СФО стратегиязына кирiл парған. Араласчылар таниинаң, полған на регионның чир-чайааны паза культуразы iстiндегi туризмге ӧзiс пирер оңдайлығ, че отрасльға пiр синнiг норматив-праволығ кӧрiс, сыныхтағ паза сананыс киректелче.
«Сибирьдегi чӧптезiг» ассоциацияның чыылиинда Сибирьнiң турист отрасльын алыстырарынҷа проект чарадыға алылған. Ол Сибирьдегi регионнар аалҷыларны удурлир индустрия урунчатхан ӧӧн cидiксiнiстернi пӧгерiне кӧстелген. Ӧӧн пӧгiн – регионнар аразындағы маршруттарны тӧстирi, пiрге стандарттарны, наа технологияларны паза иң чахсы практикаларны чуртасха киргенi хоостыра регионнар аразындағы маршруттарны тӧстеп, отрасльны тилiдерi.
Проект хоостыра норматив-право базазы тыыдылар: пiр оңдайнаң статистика сананызы иртiрiлер паза туризм киреенде пiчiктер пiр оңдайнаң тимнелер. Онлайн-сервис паза навигациялығ мобильнай приложениелер тилiзiне, виртуальнай турлар паза аудиогидтер тӧстирiне, арған сағыс полызиинаң «хыйға туризмнi» чуртасха кирерiне улуғ хайығ салылча.
Iдӧк пӧгiнде регионнар аразындағы паза чоннар аразындағы маршруттар тӧстирi. Анзы Сибирьнiң турист оңдайларын толдыразынаң азыбызарға оңдай пирер.
Туризм – Хакасия правительствозы тоғызының ӧӧн кӧстеглерiнiң пiрсi. Алты чыл аразына республика бюджедiнең туризмге позыдылчатхан ахчаның синi 15 хати ӧс парған. Ирткен чылда пiстiң регионда 2,2 миллион турист пол парыбысхан.
Сом Валентин Коноваловтың МАХ-тағы каналынаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
