Проект араласчызы тоғыс кӧстеглерінең танысхан
25.10.2025
Хабарлар
«Хакасия матырлары» проект. Пу проект араласчызы сағыбаан саайларны полдыртпазынҷа паза оларның салтарын чох идерінҷе республиканың искірiглер кінінде стажировка иртче
Хакасияның ГО, ЧС паза ПБ-ҷа хазна комитедінде стажировка иртчеткен Виктор Тарасов «Сағыбаан саайларны полдыртпазынҷа паза оларның салтарын чох идерінҷе республиканың искірiглер кіні» хазна казённай учреждениенiң (хазна комитедінің холындағы учреждение) тоғыс кӧстеглерiнең танысхан.
Пастап Викторға 112 системаның хығыртығларҷа тоғынчатхан республика кiнінҷе экскурсия иртiрілген. Пу служба позының тоғызын 2017 чылда сыныхтағлығ оңдайда пастаан, 2020 чылда ол тӧреміл тузаланысха кирілген. 112 системаа аймах киректерҷе cығдыратчалар: ӧрт сыхханнаңар, теракттардаңар, газ позыдылчатханнаңар, табырах имнег полызии киректелчеткеннеңер, полицияны хығыртардаңар паза даа пасхазы. 2017 чылдаң амға теере 112 служба 2 миллион 43 муң азыра сығдыратхан киректерҷе тоғынған.
Аның соонда проект араласчызы складтарда полған, хайда транспорт турча паза, сағыбаан саайлар полза, оларның салтарларын чох идерiнде тузаланҷаң аймах техниканың паза тиріглернің республика резерві хайраллалча. Iдӧк резервке кірчелер ас-тамах (консервалар, печенье паза даа пасха чиистер), чей, кип-азах, ӧдіктер, тӧзек-частых, пос гигиеназының ниме-ноозы, палаткалар, узуҷаң хаптар, генераторлар, чылытчаң пушкалар, противогазтар паза даа пасхазы.
Ағаа хоза, Виктор Тарасов гуманитарнай полызығ чығҷаң пірге пунктты кӧріп алған. Пу чыл пасталғаннаң пункттаң СВО зоназынзар гуманитарнай полызығ 11 хати ызылған, аның тиксі сині 200 тонна азыра полған. Пазағы полызығны ызары пӱӱл чарыс айының ікінҷі чардығында кӧрілче. Пункттаң ӧнетін чаа операциязы араласчыларына ай сай имнер, техника, чӱленҷең сетьтер, ас-тамах, суғ, гигиена ниме-ноозы, кӧні адресче посылкалар паза даа пасха фронтта киректелчеткен нимелер.
Автор :
Хакасияның ГО, ЧС паза ПБ-ҷа хазна комитедінің пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
