Чайаачы ӧмелер улуғ чорыхтарға сығыбыстылар
20.10.2025
Хабарлар
В.Г.Чаптыковтың адынаң Хакас филармониязының «Ӱлгер» паза «Кӱн сузы» ансамбльлары «Пiс – Россия» программаҷа гастрольларнаң чӧрчелер.
Чарыс айының 20-24 кӱннерiнде республика филармониязының ӧӧн национальнай ӧмелерi – «Ӱлгер» паза «Кӱн сузы» – Иркутскта, Читада паза Улан-Удэде концерттер кӧзiдерлер. Гастрольлар Россияның культура министерствозының Тиксi Россиядағы гастрольлар-концерттер кӧстее хоостыра «Пiс – Россия» федеральнай программаҷа иртчелер.
Россияның культура министрi Ольга Любимованың таниинаң, Тиксi Россиядағы гастрольлар-концерттер кӧстегнiң ӧӧн пӧгiнi – хазнаның чуртағҷыларын национальнай ӧмелернiң паза театрларның чайаачыларынаң таныстырары. «Пу проектке чыл сай наа араласчылар хозылчалар, аннаңар пiстiң чайаачы сӧбiре тӧремiл ӧсче. Андағ оңдайнаң хайхастығ культура кибiрлерi, кӧг паза театр школалары хайраллалчалар паза тиксi Россияҷа наа нанҷылар таапчалар», – тiпче министр.
– Хакас филармониязының ӧмелерi «Пiс – Россия» алғым программада араласчатханына поғдархапчабыс. «Ӱлгер» паза «Кӱн сузы» ансамбльлар чахсы ӧмелерге хозылдылар: пӱӱл чарыс айында пiстiң хазнаҷа пӧзiк устығ 22 ӧме гастрольларнаң чӧрче – «Россия» Орыс чон ансамбльы, Омсктағы хор, Калмыкияның «Ойраты» теелбек театры, iдӧк Туваның, Удмуртияның, Дагестанның паза пасха даа регионнарның ӧмелерi, – кӧңнiнең ӱлескен Хакас филармониязының директоры Вячеслав Инкижеков.
«Ӱлгер» паза «Кӱн сузы» Иркутск облазында, Пӱрӱт Республикада, Забайкальскай крайда пастағызын на концерт кӧзiдерлер, че оларның Сибирьҷе чорыхнаң чӧрҷең улуғ опыттары пар. Артисттер нинҷе-де хати Москвада, iдӧк Швейцарияда, Бельгияда, Нидерландыда, Польшада, Францияда, Италияда, Германияда паза пасха хазналарда концерттер кӧзiткеннер. Амғы чорыхтарға чайаачы ӧмелер «Кӧчег» программаны (6+) апарыбысханнар. Аны «Ӱлгер» ансамбльның хоос устағҷызы, Хакасия искусствозының саблығ деятельi, республиканың чон артизi Кучен Ай Чарых Сайын паза «Кӱн сузы» ансамбльның балетмейстер-постановщигi, Хакасия культуразының саблығ тоғынҷызы Наталья Апуневич тимнееннер.
Автор :
Марина Грибкова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
