Кӧг искусствозының наа «чылтыстары»
15.10.2025
Хабарлар
Ляо Тинхун, Даниил Коган, Фёдор Освер
Чайаачы иир. Пу тынағ кӱннерде В.Г.Чаптыковтың адынаң Хакас филармониязының сценазынзар Россияның чиит кӧгҷiлерi сыхтылар
Филармонияның улуғ залында классика кӧглерiне хынчатхан илееде чон чыылысхан. Хайхастығ концертте аймах тустардағы тилекейнiң илбек композиторларының иң артых кӧглерi толдырылғаннар. Оларны Ағбан городтың чуртағҷыларына паза аалҷыларына чиит «чылтыстар» сыйлааннар. Чайаачы иир Россияның культура министерствозының кӱстенiзiнең «Тиксi Россияның паза чоннар аразындағы марығларның чиңiсчiлерiнiң концерттерi» культура проектi хоостыра ирткен. Пу проекттiң ӧӧн пӧгiнi – академическай кӧг культуразын хайраллиры паза тилiдерi, чиит кӧгҷiлерге хабазары, Россияның регионнары аразында культура палғалызын тыыдары, кӧрiгҷiлернi классика кӧглерiнең таныстырары. Пiстiң республика мындағ алғым мероприятиеде пастағызын на араласты.
Хакасиязар концертнең килген чиит артисттер кӧг искусствозы чолын турыстығ иртчелер. Олар, чоннар аразындағы паза тиксi Россиядағы улуғ фестивальларда паза марығларда аралазып, постарының пӧзiк устарын кӧзiтчелер. Концерттi кӧп чидiглерге читкен гобоист Фёдор Освер асхан. Ол, гобойнаң ойнап, В.А.Моцарттың кӧӧн толдырған.
Фёдор Освер Москвада кӧгҷiлернiң сӧбiрезiнде тӧреен. Гнесиннернiң адынаң музыка школазын маңнаныстығ тоозып, 2021 чылдаң сығара Москвадағы П.И.Чайковскийнiң адынаң консерваторияда ӱгренче. 2023 чылда П.И.Чайковскийнiң адынаң ХVII Чоннар аразындағы марығның кӱмӱс медальының лауреады полыбысхан. Пӱӱл сiлкер айында Прагада «Пражская весна» чоннар аразындағы марығда, тилекейнiң 45 иң чахсы гобоизiн утып, чиңiске сығып алған.
Чиит артист Даниил Коган iдӧк саблығ кӧгҷiлернiң сӧбiрезiнең сыххан. Оолах кiчiгдең сығара музыкаа тартылған. Москвадағы консерваторияда ӱгредiг алған соонаң ол чоннар аразындағы паза тиксi Россия синiндегi марығларда ӧткiн аралас сыххан. Чиит музыкант, тилекейдегi улуғ сценаларда концерттер пирiп, Россиядағы паза хырығ озариндағы ӧӧн оркестрлернең хада тоғынып, кӧг искусствозында чапчаң ӧс парыбысхан. 2023 чылда Даниил Коган П.И.Чайковскийнiң адынаң ХVII Чоннар аразындағы марығның хола медальының ээзi полыбысхан.
Даниил Коган Хакасияда пiр ле хати полбаан. Иң пастағызын 2022 чылда кееркестiг ойынынаң пiстiң кӧрiгҷiлернiң чӱреен аптап алған. Амғы чайаачы иирде ол, скрипканаң ойнап, 19 чӱс чылдағы саблығ немец композитор И.Брамстың кӧӧн толдырған. Кӧрiгҷiлер аның ойынын ситкiп тыңнааннар.
Чиит пианист Ляо Тинхун Хыдатта тӧреен, че музыкаа Россияда ӱгренген. 2017 чылда ол Москвадағы консерваторияның хойнындағы Ӧӧн кӧг школазынзар ӱгренерге кiрiп алған. 2021 чылдаң сығара П.И.Чайковскийнiң адынаң консерваторияда ӱгренче. Аның кӧг искусствозында улуғ чидиинiң пiрсi – С.В.Рахманиновтың адынаң II Чоннар аразындағы пианисттернiң, композиторларның, дирижёрларның мариинда хола медаль ээзi полыбысханы. Хакас сценада Ляо Тинхун композитор С.Рахманиновтың кӧӧн пианинонаң толдыр пирген.
Чайаачы иир тооза чиит кӧгҷiлернiң хайхастығ ойыннарын филармонияның симфоническай оркестрi чазаан. Аннаң Хакасияның чон артизi, дирижёр Вячеслав Инкижеков устаан.
Концерт соонаң кӧрiгҷiлер постарының кӧңнiлерiнең ӱлескеннер.
– Даниил Коган iкiнҷi хати килдi. Мин аны кӧмес пiлчем. Алындағы концертте ойнаанда, кӧңнiме кiрген. Пӱӱн Брамстың кӧӧн сыйлап пирдi. Гобойнаң ойнапчатхан оол Фёдор Освернiң толдырии iдӧк чӱрееме толды. Аның тынызы ӱбӱрҷең кӧг тириинең ойнирға хандыра читче, аннаңар кӧӧн истерге морсымнығ пiлдiрче. Пу ооллар Чайковскийнiң адынаң марығның лауреаттары полчалар, аннаңар кӧг тирiглерiнең махалығ ойнапчалар. Мин позым кӧг ӱгретчiзi полчам, Хакас олған искусство школазында олғаннарны чатханнаң паза баяннаң ойнирға ӱгретчем. Филармониязар чапсых концерттер кӧрерге сыбыра чӧрчем, – теен Ағбан город чуртағҷызы Роберт Чебодаев.
– Москвадағы артисттер Хакасиязар концертнең кил парчатханына уғаа ӧрiнчем. Чайаачы иир кӧңнiме кiрдi, артисттер хайхастығ ойнадылар. Пеер iҷемнең хада килгем, – ӱлескен Ағбандағы школаның 6-ҷы класс ӱгренҷiзi Наталья Сагалакова.
– Мин музыканаң айғаспинчам. Концертке ӧӧрем Любовь Васильевна Фердинандова ӧнетiн хығырған. Ол Минсуғдағы искусство колледжiнде 45 чыл iстен салған, студенттернi пианинонаң ойнирға ӱгреткен. Пӱӱн Минсуғдаң ӧнетiн килдiбiс, – чоохтаан Наталья Корнеева.
– Пӱӱн уғаа чахсы концерт кӧрiп алдыбыс. Скрипканаң ойнапчатхан оол Даниил Коган Чайковскийнiң адынаң марығда ӱзiнҷi орын алғанында мин киречi полчам, андада Москвада полғам, пӧзiк сыйыхты ағаа читiрчеткеннерiн позымның хараамнаң кӧргем. Аннаңар пӱӱнгi концертке кӧбiзiн Даниил Коганның паза аның ойынын истiп алар ӱчӱн килдiм, – хозылған Минсуғ городтың чуртағҷызы Любовь Фердинандова.
Сом Любовь Халявинани
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
