СВО араласчызының адын хумартхылап
15.10.2025
Хабарлар
Марығ тузында
Спорт. 11 чарыста Ағбанда армиядағы хол-азахнаң тудысча республика марии ирткен
Хакасияда ӧнетiн чаа операциязында арығ тынын пир салған чааҷыларның хумартхызына чарыдылған аймах мероприятиелер тӧремiл иртче. Кӧзiдiмге, 8 чарыста Харатаста Хумартхы аллеязы одыртылған. Чӧрiмде Хакасия пазы Валентин Коновалов паза СВО ветераннары араласханнар. Спортсменнер пу киректең оортах турбинчалар. Волейболисттер Роман Шулбаевтiң турнирiне чыылысчалар. Хакас гимназияны тоосхан чир-суғҷыбыс 2023 чылда чат халған. Ӱртӱн айында грек-рим кӱрезiнең айғасчатханнар Константин Ракчеевке чарыдылған марығны иртiргеннер. Чааҷы пӱӱл Курск облазында дроннарға чох иттiр салған. Тынағ кӱннерде, тізең, армиядағы хол-азахнаң тудысча республика турнирi полған. Аның тузында полиция прапорщигi Евгений Мирошниченконы сағысха киргеннер.
Чиит кiзi Cаяногорсктаң полтыр, 2016 чылдаң Росгвардияда служба ирткен. 2023 чылда орғах айында Евгений Мирошниченко, палығлатхан ир кiзiнi миналығ орыннаң сығарып, чуртазын пир салған. Махачызы ӱчӱн чир-суғҷыбыс Мужество орденiне турысхан. Хакасияҷа Росгвардияның устанызы паза республиканың армиядағы хол-азахнаң тудысча федерациязы 2024 чылдаң Евгений Юрьевичке чарыдылған марығ иртiрчелер. Ол саарбахтарға паза улуғларға (18 час толдыр салған) кӧрiлген. Пӱӱл кибiске Алтай паза Хызылчар крайларының, Томск облазының, Тува паза Хакасия республикаларның спортсменнерi сыхханнар. Тиксі алза, 108 кiзi. Олар 13 клуб ӱчӱн турысханнар.
Арға-мӧрійнi пайрамни азарында араласханнар Хакасия пазының орынҷызы, полицияның отставкадағы генерал-майоры Владислав Мингела, Ағбан пазының орынҷызы, милицияның отставкадағы полковнигi Владимир Крафт, спорт министрiнiң тоғызын толдырчатхан Дмитрий Сафронов, Хакасияҷа Росгвардияның устанызының пастығы, полицияның полковнигi Вячеслав Васильев, чоннар аразындағы класстығ спорт узы, «Динамо» пiрiгiстiң Хакасиядағы пӧлиинiң кнезiнiң орынҷызы Пётр Макарчук, чааҷының паба-iҷезi Юрий паза Татьяна Мирошниченколар. Аарлығ аалҷылар спортсменнерге кӧп чылығ сӧстер читiргеннер. Олар саарбахтарға паза чииттерге чиңic тударға, СВО араласчызы Евгений Мирошниченконың чуртазын кӧзiдiмге аларға алғааннар. Че сынап Женяның пабазын Юрий Емельяновичтi истерге чӱрексiнiстiг полған. Аның чооғынаң, оолғы аллығ чӱректiг, кiзее паарсах полған. Чонға полызарға харазып, ол Росгвардиязар тоғысха кiрiбiскен. Женя Мирошниченко кiзiлернi сайбағҷылардаң арачылирға сағынған. Пабазы чоох тутхан соонда чыылған чон, махачы чааҷыны хумартхылап, пiр минута сым турған.
Таныхтирға кирек, армиядағы хол-азахнаң тудыс (АРБ) – чааҷыларның спорт кӧрiмi. Тархынын апарча 1979 чылдаң. Аны Кии-десант войсколарында сағын таап алғаннар. Армияда служба иртпеен улусха АРБ-наң 1995 чылдаң на айғазарға чаратханнар. Че амға теере Россияның спорт узына нормативтi чааҷыларға ла толдырарға чарадылча. Хакасияда армиядағы хол-азахнаң тудыстың кiнiне Боград аалны санирға чарир. Анда 2013 чылда тренер Иван Чанчиков пастағы секцияны асхан. Иван Алексеевичтiң кӱстенiзiнең Хакасияда АРБ-да 200 артиинаң пала кӱзiн сынапча. Пӱӱнгi кӱнде секциялар Ағбан городта, Боград, Хубачар, Тепличнай паза Зеленай аалларда тоғынчалар. Чидiглердеңер чоохтаза, тренернiң ӱгренҷiзi Никита Полоротов 2023 паза 2024 чылларда Россия первенствозында чиңiс тутхан. Никитаның нанҷызы Александр Каур олох марығларда алтын паза кӱмӱс медальлар холға кирген. Ооллар Рязаньдағы кии-десант училищезiнде пiлiстерiн алғытчалар. Полоротов паза Каур Россияның устары атха турызарына iзенiс пар.
Iдӧк Иван Алексеевич Юлия Токмашоваа паза Роман Неустроевке поғдархапча. Кӱстiг спортсменнер, тренер чолын таллап, олғаннарны хазых чуртасха тартчалар. Амғы туста Боградта «Аалларның тиксі тилiзi» хазна программазынҷа наа спорт комплексінiң пӱдiрии парча. Ол 2026 чылда тимге сығарға кирек. Спорт объектi пӱдiрiл парза, Иван Чанчиков Боградта армиядағы хол-азахнаң тудысча сборлар иртiрерге пӧгiнче. Тренернiң сағынған сағызы толғадыға тӧӧй.
Арға-мӧрійзер айланза, пу кiзiнi спортсменнернiң узы даа нимес, кип-азаа таңнатхан. Кибiске сығар оолларға илееде ниме кизерге килiсчеттiр: азахтарға – щитоктар, пыхтаа – раковина, кӧксiне – жилет, оларның ӱстӱне кимононы. Спортсменнiң пазын паза сырайын тимiр маскалығ шлем арачылапча, холларын – мелейлер. Кип-азах таа пастыра сизiнерге чарир: армиядағы хол-азахнаң тудыс – пик хуйахтығларның спорт кӧрiмi. Мында кинеп парарға ӱр нимес.
Турнир тӧстегҷiлерi прай араласчыларны частары хоостыра ӱс ӧмее чарыбысханнар: 14-15 частығлар, 16-17 частығлар паза улуғлар. Пастағы ӧмеде 70 кг кӧдiрiмде хакас саарбах Дмитрий Боргояков чиңiс тутхан. Димаа 15 час, ол Сорығдаң, Хакас гимназияда 9-ҷы класста ӱгренче. Армиядағы хол-азах тудыснаң ӱзiнҷi чылы айғас парир. Саарбах секцияа неделяда пис хати чӧрчеттiр. Полған на тренировка пiр час чарым парча. Ағбандағылар «Саяны» спорткомплексте устарын таптапчалар. Пiр айда спортсменнер 2,5 муң салковай тӧлепчелер. Дима Боргояков Хакасияның первенствозында iкi хати чиңic туттыр. Пылтыр Россия мариинда узын сынаан, пастағыох тоғазығда чиңдiр салған. Мында хомзынҷаң ниме чоғыл. Кӧп чиңiстер утырыстаң пасталчалар. Школа тоосхан соонда саарбах тiс имҷiзiне ӱгренiп аларға сағынча. Амғы туста хакас спортсменнiң сағынған сағызы – спорт узына кандидат нормативiн толдырыбызары.
Турнирнiң iкi номинация пар полтыр. Пӱӱл «Иң артых техника» ӱчӱн таныхтаттырғаннар Павел Якушев (14-15 частығлар), Ай-Дамир Монгуш (16-17 частығлар) паза Егор Баша (улуғлар). «Чиңiске кӱстенген ӱчӱн» номинацияда сыйыхтаттырғаннар Егор Марченков (14-15 частығлар), Данил Аверьянов (16-17 частығлар), Егор Елисеев (улуғлар).
Командалар аразында пастағы орынға сыххан «Боград» ӧме, кӱмӱс призёр полыбысхан «Патриот» клуб (Хызылчар крайы), хола призёр – «Хубачар».
Сом Екатерина Третьяковани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 23 | 24 | 25 | 26 | 27 | 28 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
