Сайбағлар полдыртпас ӱчӱн
15.10.2025
Хабарлар
Лев Сафьянов семинар араласчыларын удурлаан
Семинар. Хакас хазна университедiнде пасха хан чирлерiнең килген кiзiлер паза чииттер аразында экстремизм паза терроризм пiлдiрiглерi сығыспазын хайығда тударына чарыдылған наука-практикалығ семинар ирткен
Аны Хакасияның национальнай паза территориальнай политика министерствозы Россияның национальностьтар киректерiнҷе федеральнай агентствозы хабазиинаң иртiрче. Чыл сай иртiрiлчеткен мероприятиеде кибiрли республиканың министерство-ведомстволарының устағ-пастаа паза специалисттерi, УФСИН, МВД тоғынҷылары, национальнай халых пiрiгiстерiнiң, диаспораларның устағҷылары паза араласчылары, пасха хан чирлерiнең килген кiзiлер араласчалар. Чыылығ пасха хан чирлерiнең регионыбыссар тоғынарға, ӱгренерге, чуртирға килген кiзiлернең чарыдығлығ тоғыс апарар, Россияның законнарына, ол санда миграция законодательствозына, тудынарға кирек полчатханнаңар, оларзар кирiлген алызығлардаңар чоохтир пӧгiннең иртiрiлче.
Семинар тоғызын Хакасияның национальнай паза территориальнай политика министрi Лев Сафьянов асхан.
– Пiстiң прайзыбыстың алнында пiр пӧгiн турча – республикада чоннар аразындағы хайызығларға хомай саринаң теелер киректернi полдыртпазы. Пӱӱнгi кӱнде хорғыс чох искiрiглернең палғалыстығ кирек тың сағыссыратча. Прайзыбыс пiлчебiс, хазнабыс хырығлары тастында политика хайызығларынаң палғалыстығ сидiксiнiстер сығыс ла киледiр. Iдӧк ӧнетiн чаа операциязы парчатхан туста тайма искiрiглердең тоғыр кӱрезерге килiсче. Аннаңар даа пасха хан чирлерiнең килген чииттер пу тартыстарға тартылбазын тiп тоғысты ӧткiн апарарға кирек, – таныхтаан ол.
Халых пірігістерінің, диаспораларның кізілері
Семинар араласчылары ӱс ӧмее чарылғаннар, полғанында ла министерстволарның паза ведомстволарның специалисттерi докладтарын хығырғаннар, сурығларға нандырғаннар. Iдӧк тегiлек стол ирткен. Анда чииттернi чир-сууна хынарға кӧнiктiрчеткен, чоннарның пiлiсчеткенiн пиктепчеткен мероприятиелерде араластырар оңдайлар, пасха хан чирлерiнең килген кiзiлернi сайбағлар идерiне тартырбазынаң палғалыстығ паза пасха даа хайығ кирексiпчеткен сурығлар ӱзӱрiлген.
Лев Александровичтiң таниинаң, Хакасиязар чыл сай ортымахти читіҷе муң кiзi кил парча. Оларның кӧбiзi тоғынар пӧгiннең килче. Олар, часхыдаң кӱскее читiре тоғынып, хысхызына тӧреен чирлерiнзер нандыра парғлабысчалар. Пiреезi халча, андада оларнаң миграция органнары тоғынча. Iдӧк национальнай паза территориальнай политика министрi республикабыста пасха хан чирлерiнең килген кiзiлер араласхан сайбағлар синi уғаа тӧбiн тiп таныхтапча. Аннаңар даа пiстiң андағ кiзiлерге тоғынарға чарадылбинчатхан хайдағ-да кӧстеглер чоғыл. Хайди, кӧзiдiмге, Хызылчар крайында алыл парған, анда мигранттарға ӱгредiг киреенде, курьер полып, сас хырыхчаңнарда паза пасха даа кӧстеглерде тоғынарға чарадылбинча.
Тиксi алза, Хакасияның национальнай паза территориальнай политика министерствозы республикабыста чуртапчатхан аймах-пасха чоннарнаң тоғыс апарарына улуғ хайығ салча. Аймах фестивальлар, семинарлар, конференциялар иртiрiлчелер, лекциялар хығырылча. Олар прайзы пасха-пасха тiллiг, культуралығ, кибiрлiг кiзiлернi пiр чирде ынағ чуртирға кӧӧктiрерiне кӧстеглiг.
Сомнар Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
