Тоғынҷаң оңдайлар паза оборудование амғы тусха килiстiре
15.10.2025
Хабарлар
Устағ-пастағ наа поликлиниканы пайрамни асча
Тоғыс чорығы. Хакасия пазы Валентин Коновалов Боград аймаандағы Тадар Тис аалда наа поликлиниканы пайрамни азыбысхан
Имнег туразын азар алнында республика пазы аймахтағы пӱдiрiглер апарылчатхан орыннарда пол килген. Амғы туста Тадар Тис аалда iкi пӱдiрiг паза пiр объектте тиксi тыхтағ апарылча.
Пастап Валентин Олегович тузаланыл парған суғны арығлап ағысчаң ӧӧн системаның пӱдiриинде пол килген. Ол «Аалларның тиксi тилiзi» хазна программазынҷа пӱдiрiлче. Аның пӱдiрии чуртағҷыларға кирек паза ибiркi чир-чайаанны хайраллирына тузалығ. Ол тимге сых парза, тузаланыс соондағы суғлар ағын суғларны кiрлебестер. Аның пӱдiрии пӱӱл хосхар айында пасталған, iкi чыл пазынаң ол тимде поларға кирек. Пӧгiннер хоостыра подряд организациязы аны 2026 чылның кiчiг хырлас айында тимге сығарыбызарға кирек. Суғ арығлаҷаң система пӱдiриине федеральнай бюджеттең 360 миллион салковай позыдылған, пасха ахча республика паза орындағы бюджеттердең, iдӧк бюджеттегi нимес ахча хозылған. Тиксi 520 миллион салковай хорадылары кӧрiлче. Пӱӱнгi кӱнде объект 36-37 процентке идiл парған, 140 миллион артиинаң салковай хорадылған. Подряд организациязы таныхтапча, прай тоғыстар график хоостыра тузында идiлче.
Iдӧк Хакасия пазы Тадар Тис аалда пӱтчеткен кӧп кӧстеглiг спортзалзар чӧрген. Ол 2026 чылның улуғ хырлас айында тимге сых парарға кирек. Амғы туста каркас турғызылған, фундамент урыл парған, пол идерiне тимнеглiг тоғыстар толдырыл парған, чылығ пирҷең сетьтер салыл парған, iстiндегi паза тастындағы канализация, суғ проводтары, насос станциязы тимде. Сэндвич-панельлернiң монтажы паза ибiркiзiн иптирi тимнелче. Спортзал пiр хадыллығ, аның улии 736 квадраттығ метр полар. Ол Л.А.Гребенниковтың адынаң стадионның чирiнде пӱдiрiлче, аалдағы ортымах школаның хыринда орныхча. Аннаңар олғаннарға андар чӧрерге ырах нимес полар. Анда тренировкалар паза спорт марығлары иртiрiлерi кӧрiлче. Спортзалда аймах спорт кӧрiмнерiнең айғазар оңдайлар полар. Ол пӱдiрiл парза, тренировкалар иртiрҷең, кип-азах алыстырҷаң, чунынҷаң орыннар, имнег паза устағ-пастағ пӧлiктерi пар полар. Проекттiң пӱдiрии 100 миллион азыра салковайға сых парар. Ахча федеральнай, республика паза муниципальнай пӱдiс бюджеттерінең, iдӧк бюджеттегі нимес ахча хорадылар.
Анаң Валентин Олегович «Солнышко» олған садындағы тиксi тыхтағ тоғыстары хайди апарылчатханын кӧрерге кiрген. Подряд организациязы таниинаң, тиксi тыхтағ 75 %-ке толдырыл парған. Сағам iстiндегi тоғыстар иділчелер, тураның тасты иптел парир. Ибiркiзін iдӧк иптирi кӧрiлче: ӧзiмнер одыртылар, ойнаҷаң городок турғызылар, брусчатка салылар, улуғ нимес архитектура формалары турғызылар. Прай ол тоғыстарға 76,3 миллион салковай кӧрiлче, оларның 67,3 миллион салковайы – федеральнай бюджет ахчазы.
Прай ӱс объектте пӱдiрiглер паза тыхтағ тоғыстары «Аалларның тиксi тилiзi» хазна программазы хоостыра апарылча. Республика ол программада 2020 чылдаң араласча. Пу тус аразына региондағы аалларда илееде социальнай паза коммунальнай инфраструктура нааҷылалған. Аалларның тилiзiне мындағ кӧстеглер хайдағ туза ағылчатханын Хакасия пазы таныхтаан.
– Пӱӱл Тадар Тис аалда программаларны чуртасха кирерiнҷе наа чардых пасталған. Суғны арығлап ағысчаң ӧӧн cистеманың паза спортзалның пӱдiрии парча, олған садында тиксi тыхтағ тоғыстары апарылча. Амғы тусха паза прайзына даа килiстiре инфраструктура – чонның истiг чуртазының ӧӧнi. Андағ проекттер чуртас синiн чахсыландырчалар, ағаа хоза, олар аалларны хайраллап халарға паза оларны тилiдерге полысчалар. Аннаңар прайзына, кем проекттернi тимнирге паза федеральнай синде оларны арачылирға полысхан, улуғ алғызымны читiрчем. Киртiнчем, чуртасха кирiлчеткен чарадығлар Хакасияның аалларына наа чуртас пирерлер, – теен Валентин Коновалов.
Пӱдiрiг апарылчатхан прай орыннарда пол килген соонаң республика пазы Валентин Олегович Тадар Тис аалдағы поликлиниканың пайрамни азылчатханында араласхан. Наа имнег туразы iкi модульлығ корпустаң пӱтче, анда улуғларны даа, палаларны даа имнирi кӧрiлче. Ол пiр сменаа 170 пациентке полызығ пирер оңдайлығ, ол санда 40 палаа. Аның пӱдiриине чарым миллиард азыра салковай хорадылған. Федеральнай бюджеттең 370 миллион салковай позыдылған, 160 миллионға чағын салковай республика бюджедiнең. Пӱдiрiг тоғыстары «Узах паза ӧткiн чуртас» национальнай проекттiң «Пастағы имнег полызиин пирҷең имнег учреждениелерiн нааҷылиры» программазынҷа апарылған.
Хакасия правительствозы регионда хазых хайраллир системаны тилiдерiнҷе улуғ тоғыс апарча. Тадар Тис аалдағы наа поликлиника Федерация Чӧбiнiң кнезi Валентина Матвиенконың паза Россияның хазых хайраллаҷаң министрi Михаил Мурашконың хабазиинаң пӱӱн пайрамни азылча. Тиксi пӱдiрiг тоғыстары апарылчатханда, федеральнай паза регион ӱлгӱлерiнең палғалысты ӧткiн апарған Хакасияның сенаторы Олег Земцов. Имнег туразының пӱдiриин сыбыра хайығда тутхан Федерация Чӧбi кнезiнiң орынҷызы Инна Святенко.
Аалның прай чуртағҷылары имнег туразының пайрамни азыларын паза тоғынарын чидiкпин сахтааннар. Иргi тура 1970 чыллардох пӱдiрiлген, чыллар иртiп, ол тың иргiлен парған. Республикада iкi хати пiлдiрте иде чир тiтiреен соонаң иргi тура изел сыххан. Аннаңар наа поликлиникаа чуртағҷылар даа, имнег тоғынҷылары даа ӧрiнгеннер. Чуртағҷыларны мындағ танығлығ кирекнең Хакасия пазы алғыстаан.
– Пiс сiрернең хада прайзыбыс чахсы пiлчебiс, федеральнай син хабазии чох, Федерация Чӧбiнiң кнезi Валентина Ивановнаның паза Россияның хазых хайраллаҷаң министрi Михаил Альбертовичтiң хабазии чох мындағ наа тура пӱдiрiл парбасчых. Ағаа хоза, амғы тусха килiстiре имнег оборудованиезi алыл парған. Прай пу чахсы киректер хада-пiрге тоғыс апарғанының, пiлiзiп тоғынғанының салтары. Наа поликлиника ол хазыхха паза таңдағы чахсы чуртасха хозым полча, Боград ла аймааның нимес, прай пiстiң регионның, – чоохтаан Валентин Коновалов.
Хакасия пазы пу социальнай проекттi тимнирiнде паза аны чуртасха кирерiнде араласханнарны прайзын алғыстаан. Анаң ол поликлиника тузында тимге сыххан ӱчӱн паза имнег тоғынҷылары чахсы iстенчеткен ӱчӱн оларға Хакасия пазының алғыстазын читiрген.
Имнег тоғынҷылары наа поликлиникаа ӧрінчелер
Поликлиниканың пайрамни азылғанында Хакасияның Федерация Чӧбіндегі сенаторы Олег Земцов араласхан. Ол, поликлиниканың пайрамни азылчатханында аралазарға ӧнетiн килiп, аал чуртағҷыларына илееде чылығ сӧстер чоохтап, пик хазыхтығ поларға алғаан. Паза имнег туразының пӱдiриинде араласханнарны махтап алғыстаан, ол таныхтаан, пу ӧменең толдырылған тоғыс, аннаңар аның салтарлары даа тӱзiмнiг.
Анаң наа поликлиниканың пайрамни азылчатханына килгеннерге имнег учреждениезiнҷе улуғ нимес экскурсия иртiрiлген. Чарых паза истiг кабинеттерде наа оборудование турча, имҷiлернiң чалахай кӧңнiлерi iле кӧрiнчеткен. Тадар Тис аалдағы поликлиниканың ӧӧн имҷiзi Елена Труфанова аалҷыларға пастап олған пӧлиин кӧзiткен. Наа поликлиникада хазых палаларға паза ағырчатхан палаҷахтарға имнег полызиин алынҷа пирҷең оңдай тӧстелген. Аннаң андар улуғлар пӧлиин кӧзiткен. Полған на кабинетте амғы тусха килiстiре наа оборудование турча: флюорограф, маммограф паза рентгенаппарат, видео кӧзiдiглерiн iстесчең блок паза даа пасхазы.
Iдӧк имнег учреждениезiнде имҷi-специалисттерге хоза ставкалар кирiлген: эндокринолог, олған эндокринологы, олған хирургы, травматолог-ортопед, кардиолог, инфекционист, отоларинголог. Таныхтирға кирек, халғанҷы чыллар аразына имнег учреждениезiнзер 10 имҷi тоғынарға килген. Iдӧк табырах имнег полызиин пирҷең пӧлiкcер фельдшерлер читкiҷе алыл парғаннар. Пӱӱл кiчiг хырлас айында iкi специалист тоғынарға килер – кардиолог паза терапевт. 2026 чылда имҷi-рентгенолог паза ЛОР специальнозынҷа ординатор хозыларлар.
Имҷi акушер-гинеколог Яна Монгуш Боград аймаанзар 2021 чылда тоғынарға килген. Ол «Земскай доктор» хазна программазынҷа Тадар Тис аалдағы поликлиниказар тоғысха кiрген. Хайди таныхтаан специалист, хазна программазынҷа тоғынар тус тоозылза, имнег учреждениезiнде аннаң андар iстенерге сағыс тутча.
– Мин Тыва Республикадағы Хызыл городтаңмын. Хакасиязар прай сӧбiремнең килiбiскебiс. Боград аймаа – истiг чир, пiстiң кӧңнiбiске кiрче. Наа поликлиника уғаа чахсы, ол чарых паза сiлiг. Уламох ӧрiндiрче мында тӧстелген тоғынҷаң оңдайлар, амғы тусха килiстiре оборудование. Андағ оңдайларда тоғынҷаң даа кӧңнiм кӧдiрiлче, – чалахай кӧңнiнең ӱлескен Яна Монгуш.
Iдӧк позының кӧңнiнең паза сағызынаң ӱлескен иргi поликлиникада илееде чыллар iстен салған ӧӧн медсестра Людмила Закатова. Тоғызын тӱзiмнiг апарчатханнаңар ол Хакасия пазының алғыстазынаң таныхтатхан.
– Мин, Ағбандағы имнег училищезiн тоозыбызып, 1983 чылда Тадар Тис аалдағы поликлиникада тоғынып пастаам. Иргi поликлиника изелiп пастабысхан, наа имнег учреждениезiн пiс паза аал чуртағҷылары чидiкпин сахтаабыс. Улуғ ӧрiнiске, наа поликлиниказар кӧзiбiстiбiс, тоғызыбысты чахсы паза истiг оңдайларда толдырарбыс. Ӧрiнчебiс мындағ чидiге, амды пiске наа стационар ит пирген полза, уламох чахсы поларҷых, – сағызын читірген Людмила Закатова.
Наа поликлиникада имҷiлер тоғынып пастабысханнар, амды пациенттерге истiг кабинеттерде имнег полызиин пирер чахсы оңдайлар пар. Амғы тустағы оборудование имҷiлерге, чуртағҷыларның хазиин хайығда тудып, тоғыстарын маңнаныстығ апарарға полызар.
Cомнар Илона Каковани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
