Олғаннарны имнирiне прай оңдайлар тӧстелген
10.10.2025
Хабарлар
Диагностика кінінде Хакасия пазы Валентин Коноваловха наа рентген аппарады хайди тоғынчатханнаңар чоохтааннар
Тоғыс чорығы. Пу неделяда Хакасия пазы Валентин Коновалов республиканың олған имнег туразының тиксi нааҷылал парған ӧӧн поликлиниказында тоғыс чорығынаң полған
Ағбанда пу неделяның пастағы кӱнi палалығ сӧбiрелерге танығлығ полды – 6 чарыстаң республиканың олған имнег туразының тиксi нааҷылал парған ӧӧн поликлиниказы тоғынып пастабысхан. Iдӧк консультация-диагностика пӧлиинің туразы, тиксi тыхталып, нааҷылалған паза лучевой диагностика пӧлии хоза пӱдiрiлген. Чоохтирға кирек, пу наа пӱдiрiг спиральнай компьютер томогравын (СКТ) тоғындырарына кӧрiл парған. Ол олған стационары орныхчатхан туранаң хости пӱдiрiл парған. Республиканың олған имнег туразының корпустарын 2022 чылда тиксi нааҷылап пастааннар.
Нааҷылалған ӧӧн олған поликлиниказы
Алғым пӱдiрiг тоғызы ӱчӱн нандырығлығ полча «Тиксі пӱдіріг устанызы» хазна учреждениезi, ол республиканың пӱдiрiг министерствозының холында тоғынча. Хайди чоохтаан пу устаныстың пресс-секретарьы Оксана Чумак, улуғ тоғыс ӱс чардыхча апарылған. Пастап наа пӱдiрiгнең айғасханнар, анаң iкiнҷi чардығында пастағы педиатрия пӧлиин (поликлиника) нааҷылааннар (ол 1981 чылда пӱдiрiлтiр), ӱзiнҷi чардығында – диагностика пӧлиин (1954 чылда пӱдiрiлген тура). Халғанҷызында пӱдiрiгҷiлер сидiксiнiске урунғаннар. Тура тасты чабылған кiрпистернi хыйа алчатханда, турада чiктер кӧрiн сыххан, аннаңар проекттi хоза тимнирге килiскен. Тура тастын, колонналарнаң паза ригельлернең тузаланып, пӱкӱлее тимiр каркаснаң хурчап тыыт саларға чарадығ алылған, iдӧк полған на кӧзенек паза iзiк ойымнарын тыытханнар. Пӱдiрiг-монтаж тоғыстарына 500-че миллион салковай хорадылған, имнег паза технология оборудованиезінең тирiндiрерiне – 200-че миллион салковай. Ахча федеральнай паза республика бюджеттерiнең позыдылған. Алында корпустарның iкiзiнде лифт чох полған, амды полғанында ла iкiлер лифт шахтазы хоза пӱдiрiлген. Лифттiң кӱзi 1600 килограммға теере сыдир тiп кӧрiлген.
Ӧӧн олған поликлиниказы тоғынып пастаанда, пазағы кӱнде андар Валентин Коновалов тоғыс чорығынаң килген, ол iдӧк компьютер томогравына кӧрiлген наа пӧлiктiң тоғызын паалаан. Улуғ аалҷыны республиканың олған имнег туразының ӧӧн имҷiзi Татьяна Кузнецова паза имнег тоғынҷылары удурлааннар. Поликлиника иркiнiн алтаанда, аалҷыны пастағы хадылда орныхчатхан ординаторскайзар иртiргеннер. Пу кабинетнең имҷiлер паза медсестралар пiрге тузаланчалар. Имнег тоғынҷыларынаң таныстырып, ӧӧн имҷi Татьяна Григорьевна таныхтаан:
– Пу кӱнде поликлиника Ағбандағы тиксi 15 муң палаа имнег полызиин пирче. Кiчiг палалығ чиит паба-iҷелер дее саны кӧп, хайзы-да иркеҷектер пу поликлиника иркiнiн ам даа алтаалахтар. Мында имнег тоғынҷыларының чиит ӧмезi iстенче, аннаң андар тоғынарға тимде.
Чебочаковтар сӧбірезі нааҷылалған поликлиникада пол килген
Хайди чоохталған, поликлиникада имҷi-педиатрларға, специалисттерге ал-алынҷа кабинеттер кӧрiл парған, анализтер алҷаң, физиотерапия, прививка кабинеттерi дее пар. Анда тиксi 15 участок саналча, тоғыс имҷi тоғынча. Поликлиниканы паза диагностика пӧлиин iкiнҷi хадылда коридор пiріктiрче. Диагностика пӧлии нааҷылалған соонаң азылғалах, андар ам на кӧзiп пастапчалар. Ол пӧлiкте специалисттернiң имнег полызии прай Хакасиядағы олғаннарға пирiл турар. Республиканың олған имнег туразында, тiзең, региондағы тиксi 116 муң палаа имнег полызиин кӧп кӧстегҷе пирче тiп чоохтааннар.
Валентин Олегович iдӧк поликлиниканың iкiнҷi хадылында пол килген. Анда ағаа педиатр кабинедiн кӧзiткеннер. Ол туста кабинетте имҷi-педиатр Рита Тохтобина тоғызын апарчатхан.
– Нааҷылалған турада пiс уғаа ӧрiнiп тоғынчабыс. Пациенттерiбiс тее мындағ часкаа ӧрiнчелер, олар ам мында прай ниме сiлiг паза уғаа чарых тiп сағыстарынаң ӱлесчелер,– теен Рита Николаевна.
Паза регион пазы лучевой диагностика пӧлиин кӧрiп алған. Анда улуғ кабинетте спиральнай компьютер томографы турғызыл парған, ол Хакасияда сағам андағ чалғыс ла аппарат полча. Рентген iдӧк алынҷа кабинетте орныхча. Валентин Олегович пу имнег аппараттары хайди тоғынчатханын тӱптестiрген. Пу аппараттар полызиинаң олғаннарға флюорография паза рентген iстезiглерi иртiрiлер. Рентген кабинедінде аны чиит ординатор имҷiнең таныстырғаннар. Ирина Идимешева, ординатураны рентгенологияҷа иртiбiзiп, пӱӱл республиканың олған имнег туразынзар iстенерге килген. Тоғыста чиит имҷiнің кӧңнiне прай ниме кiрче, чахсы ӧмеде позына полызарға кӱстенчелер, амғы имнег оборудованиезiнең тоғынарға морсыныстығ теен.
Валентин Олегович тоғыс чорығының халғанҷызынзар имнег туразының ӧӧн имҷiзiне олғаннарға ойнаҷаң орыннар тимнеп пирерге кирек тiп чӧп пирген. Паза ол таныхтаан, нааҷылалған соонаң кiчiг пациенттернi имнирiне паза оларның хазиин сыныхтирына прай оңдайлар тӧстелген. Имҷiлер амды истiг кабинеттерде iстенчелер, амғы тустағы оборудование имнег полызиин чахсы читірер оңдай пирче. Иптел парған коридорларда паза холларда паба-iҷелер паза палаҷахтар истенчелер. Ол имҷiлерге тӧстелген наа оңдайларда ырыс-часкалығ поларға паза маңнаныстығ тоғынарға алғаан.
Нааҷылалған ӧӧн поликлиника, iзиин азып, iкiнҷi кӱні тоғынчатханда, Ағбанда чурттығ Чебочаков ирепчi олған имҷiзiнзер иркеҷектерiн хазиин сыныхтирға чидiн килген. Чиит паба-iҷе Георгий Герасимовичнең Римма Александровна iкi пала ӧскiрчелер. Тун пала Глеб – ӱс частығ оолағас. Очызы – София, хызыҷағас пiр час сигic айлығ. Чиит ирепчi олған поликлиниказының, чахсыландырып, иптел парғаны чӧпсiндiрче тiп сағызынаң ӱлескен.
Сомнар Илона Каковани
Автор :
Инора Боргоякова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
