Пiс iстенмезебiс, кем iстенер
11.10.2025
Хабарлар
Николай Токмашев
12 чарыста – Аал хонии тоғынҷызы кӱні. Чиит ус Николай Токмашев аал хониинда 2013 чылдаң сығара. 38 частығ ирен «Нива» ООО-да водитель полып iстенче, позы ол Кiчiг Сии аалдаң сыххан
Иртен трактористтi гаражта таап алғам, Николай Геннадьевич тоғызынаңар чоохтап пирген.
– Сiрернiң ӧмеде техниканаң нинҷе кiзi тоғынча? Тоңастығлар чыырын тоозыбысхазар ба?
– Практика иртчеткен чииттернi санабаза, читiҷе кiзi полар. Тоңастығлар чыырында 3 кiзi араласча. Пу тусха чарымызын на cабысхабыс, пӱӱл кӱскӱде, наңмырлар ла чаап, хыра тоғыстары сӧӧ тартылчалар. Ам кӧрчезiң, хар чабысты, кӱн ортызына читіре сахтирбыс, анаң сығарбыс. Соохтар турыбысса, маңат поларҷых. Пу кӱннерде, тізең, иртен соох, обед соонаң чылығ, анаң палғас пол парыбысча. Пiрее чылларда тирең хар полза даа чығҷаңнар тіп чоохтапчалар ӱр тоғын салған комбайнерлар. Комбайннар оодыларға полчалар, пiрсi наа, iкiзi иргi, тыхтапчабыс.
– Сiрер чи хайдағ тоғыстар апарчазар? Хайдағ техникалығ чӧрчезер?
– Пастап УАЗ-тығ чӧрҷеңмiн, анаң тракторист тоғызын толдырғам, ам ӱзiнҷi чылы комбайнда. Прай хыра тоғыстарын апарчам: часхыда хыра тартчам, ӧзiмнернi салчам, чайғызын хыраларзар удобрение чайчам, от тимнепчем, кӱскӱде, тiзең, аймах тоңастығларны чыыпчам.
– Тоғыстарың кӧңнiңерге кiрче бе?
– Я, кiрче, че сидiксiнiстер парох. Чылығлар пасталыбысса, пiс иртеннең ала орай иирге теере хырадабыс, ибде полбинчабыс тирге чарир. Тынағ кӱннері чох iстенчебiс, аннаңар чииттер тың на тудылбинчалар, чайғы кӱннерде олар тынанарға, кӧллерҷе чӧр пар килерге хынчалар нооза. Пiс, тiзең, кӱннiң сай тоғыстабыс, наңмырлар даа полза, гаражта техника тыхтапчабыс. Кем кӧп чыл тоғын салған, олох кізілер тудылчалар. Парғлапчатхан кiзiлер парох, че олар тынағ кӱннері асхынахтаңар парчалар тіп сағынчам. Чииттер интернетте илееде тус одырчалар, сiлiг чуртас кӧрiп алчалар, чазыт сағыстары «узун» ахчадаңар, мында, тiзең, аар тоғыс.
– Тоңастығларны чыыбысса, нименең айғасчазар?
– Ирткен чылларда мында мал сағҷаң пӧлiк полған, андар кiрiп алҷаңмын, ам аны хыйа алыбысханнар, часхаа теере отпускка парыбызарбын.
– Сiрер водитель ӱгредиин хайди алып алғазар? Ам хайдағ категориялығзар?
– Мин Таштыптағы училищеде ӱс чыл тракторист-машинистке ӱгренгем, анаң армияа парыбысхам. Нинҷе-де чыл городта чуртаам, ипчiм анда психологка ӱгренчеткен, анаң, институт тоозыбысханда, аалзар айлан килгебiс. Ам минiң прай категориялар пар.
– Аалдағы чуртас нименең ӧрiндiрче?
– Мында арығ кии, суулас чох ағырин чуртас. Че мин городта даа сидiксiнic чох чуртап аларҷыхпын, чуртас чолы iди килiс парғанда, ам аалда чуртапчабыс.
– Кiчiг тустарыңда чи хайдағ профессия алып аларға хынғазар?
– Iҷе-пабам мин кiчiгде водитель поларға хынғам тiп ам чоохтапчалар. Олған тустағы сағыстарым чуртасха кирiл парғаннар, неке.
– Ам пу тоғыста халарға сағыс пар ба?
– Я, ӧмемге хынчам, маңат ынағласчабыс. Сiренербiн позымның тоғызыма тудынарға, пiс iстенмезебiс, кем iстенер зе?..
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
