Хакасия паза Моол чирі палғалыстарын тыытчалар
10.10.2025
Хабарлар
Тоғазығ тузында
Тоғазығ. Хакасия пазы Валентин Коновалов Моол чирінің Увс аймааның губернаторы Сэмжид Батжаргалнаң тоғазығ иртірген
Сэмжид Батжаргал пістің республиказар официальнай чорыхнаң килген. Ол устапчатхан делегацияа Увс аймааның устағ-пастаа, хазна учреждениелері кізілері паза бизнестегілер кірчелер.
Чӧптезіглер апарарында Хакасия пазының экономика сурығларынҷа орынҷызы Михаил Побызаков паза республиканың аал хонии министрі Сергей Труфанов араласханнар.
Тоғазығ араласчылары аймах-пасха сфераларда мыннаң мындар пірге тоғынар сурығларны, ол санда аал хонии киреенҷе – Хакасиядаң Увс аймаанзар малларға азырал апар турарын – ӱзӱрібіскеннер. Инфотурларнаң удур-тӧдір ӱлезер оңдайларны, туризмні тилідер сурығларны, ідӧк культура паза ӱгредіг сфераларындағы палғалыстарны тыыдарын кӧрібіскеннер.
Хакасияның паза Моол чирінің ынағластығ хайызығлары чылдаң чылға тыып ла турчалар. Моол чирі республикаа иң чағын орныхчатхан пасха хан чирі полча. Піcтің арабыста садығ-экономика киреенҷе пірге тоғыс тузалығ апарылча, ол санда тоғынчатхан чӧптезіглерҷе: алынҷа аймахтарнаң хада аймах-пасха ниме-нооҷа экспорт паза импорт апарылча, бизнес-миссияларнаң тӧреміл орназығ парча.
Кӧп чыл аразына пісті экономика хайызығлары ла нимес, че ідӧк наука-ӱгредіг палғалыстары, культураны, науканы паза туризмні тилітчең сурығлар піріктірче.
Валентин Коновалов Сэмжид Батжаргалға ааллап килген ӱчӱн алғызын читірген, Моол чирінең кӧп чылығ палғалыстарның паза аймах-пасха кӧстеглерҷе пірге тоғыс апарылчатханының тузазын таныхтаан. Ол ағаа республикада тӱзімніг тоғыныбызарға алғаан, чорых тузында алылған прай чарадығлар регионнар аразындағы экономика паза культура палғалыстарын тилідеріне хабазар тіп ізенізін читірген.
Сэмжид Батжаргал пос саринаң Хакасиянаң пірге тоғыс мыннаң мындар ідӧк тӱзімніг апарыларына, садығ-экономикаҷа паза культура-пос киреенҷе удур-тӧдір тузалығ хайызығлар кӧптелеріне ізенізін читірген. Ол Валентин Коноваловты Увс аймаанзар нандырығ оңдайнаң ааллап килерге хығырған.
Чӧптезіглер тоозылчатханда, олар танығлығ сыйыхтар удур-тӧдiр читiргеннер.
Моол делегациязының Хакасияда пай программа иртер тіп кӧрілче. Олар агропромышленность предприятиелерінде паза туризм объекттерінде пол килерлер. Хакасия правительствозының экономика блогының кізілерінең хада тегілек стол иртірілер. Аал хонии, культура, ӱгредіг паза хазых хайраллиры сфераларда пірге тоғынарын тыыдар сурығларҷа алынҷа министерстволарда тоғазығлар иртер паза чӧптезіглер апарылар.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
