Хакасия делегациязы Белоруссиязар чӧрген
03.10.2025
Хабарлар
Беларусьтың финанстар министрі Сергей Качан паза Хакасияның тӧреміл кізізі, республика пазының орынҷызы Юлия Исмагилова
Тоғыс чорығы. Хакасия правительствозы паза Беларусьтың финанстар министерствозы чахсы проекттерҷе пірге тоғынарға чӧптес салғаннар паза регионнар аразындағы палғалыстар салтарларын ӱзӱрібіcкеннер
Хакасия пазы Валентин Коноваловтың чахиинҷа республиканың делегациязы, андар регион правительствозының, Садығ-промышленность палатазының кізілері паза бизнестегілер кірген, «ИННОПРОМ.Беларусь» чоннар аразындағы кӧзідігде араласхан. Делегация программа хоостыра Беларусьтың финанстар министерствозында пол килген, пірге тоғыстың салтарларын паза чағынғы чылларға планнарны ӱзӱрерінҷе тоғысчы ӧменің чыылиинда араласхан.
Мероприятие Беларусьтың финанстар министрі Сергей Качанның паза Хакасияның тӧреміл кізізі, республика пазының орынҷызы Юлия Исмагилованың устаанынаң ирткен.
Сарилар пірге тоғынардаңар чӧптезіг чуртасха кирiлер тустағы садығҷа, промышленнай кооперацияҷа, агропромҷа, ағас хониинҷа паза ӱгредігҷе палғалыстарның салтарларын кӧрібіскеннер.
Республикалар аразында садығ-экономика палғалыстары чахсы тиліпчеткені таныхталған: делегацияларнаң орнасханы, кӧзідігліг паза киректіг пірге мероприятиелер иртіргені, 2022 – 2024 чылларда удур-тӧдір садығ 1,5 хати ӧс парғаны. Беларусь пістің республиканың СНГ хазналары аразында тастындағы садығ апарарында ікінҷі орында пол парған.
– Хакасия – пістің экономикадағы чахсы партнерыбыс, пӱӱн піс экспорт синін ӧскірерін кирексіпчебіс, – таныхтаан Сергей Качан.
Хакасия СНГ хазналарынзар экспортха хара тас, алюминий сплавтарын, фольганы паза аның тӧстеенде тимнелген упаковка материалларын, ас-тамах, ідӧк бентониттең иткен ниме-нооны паза ағас промышленнозы комплексінің продукциязын ысча. Андартын пістің республиказар сӱт ас-тамаа, тоңастығлардаң тимнелген чиис, фармацевт ниме-ноозы, ідӧк тағда аныҷаң паза аал хонии техниказы килче.
Пірге тоғыстың чахсы кӧзідімі Хакасия предприятиелерінде Беларусь техниказы тузаланылчатханы полча. Кӧзідімге, регионда карьерде тоғынҷаң 200-че «БелАЗ» автосамосвалнаң тағда аныҷаң промышленностьта тузаланчалар. Оларның 31-ін республиканың хара тас аныҷаң предприятиелері 2022 – 2025 чылларда садызып алғаннар. Карьерде тоғынҷаң техника сайбалбин тоғынарына Тазоба станцияда 2018 чылдаң сығара «БЕЛАЗ» сервис кіні тоғынча. Ідӧк 2024 чылның улуғ хырлас айында Ағбанда «БЕЛАЗ» техникаҷа хабазығ кіні азылған.
Республикалар аразында мыннаң мындархы удур-тӧдір тузалығ пірге тоғыстың ӧӧн кӧстеглері садығ апарарын, инвестицияларны паза экспортты улам ӧскірері, ідӧк культура, ӱгредіг, спорт паза туризм сфераларында палғалыстарны тилідері полчалар.
Чӧптезіглер салтарларынҷа регионнарның пірге тоғызынҷа тоғысчы ӧме чыылииның протоколы алылған. Сарилар 2026-2027 чылларға карьер техниказын садызарынҷа кирексіністерні кӧрібізерге, «Саян-Молоко» ОАО-наң техника садызарынаңар контракт идер сурығҷа читіре тоғыныбызарға чарат салғаннар. Ідӧк ӱреннер, гербицидтер, ветеринар препараттарын паза аал хониинда тузаланылчатхан пасха даа ниме-нооны удур-тӧдір садызарын ӧскірерінҷе пірге тоғысты узарадарға паза Хакасияның аал хонии министерствозына 2026 чылда Белоруссиядағы агропромышленность неделязында араласчаң оңдай пирерге чарадығ алылған.
– Киртінчем, пістің пірге тоғызыбыс мыннаң мындар алғып турар паза регионнар чуртағҷыларына туза ағылар. Удур-тӧдір хабазары уғаа кирек, – таныхтаан Юлия Исмагилова.
Программа хоостыра Хакасия делегациязы «Белэксимгарант» предприятиеде пол килген. Андағы тоғазығ экспорт паза инвестиция проекттерінің страховка саринаң хабазығ сферазында пірге тоғынарын тимниріне, опытнаң ӱлезеріне чарыдылған.
Делегация ідӧк Минсктегі «БЕЛАЗ» ОАО-да пол килген, компанияның устағ-пастаанаң тоғазып, чӧптезіглер апарған. Пірге тоғыстың мыннаң мындархы кӧстеглері ӱзӱрілген. Ӧӧннернің санында – карьер паза аал хонии техниказын садызарын ӧскірері, сервис кіннерін тилідері.
Халғанҷы кӱнде делегациядағылар «Курган Славы» мемориал комплексінде пол килгеннер. Илбек Ада чаа араласчыларының матырын хумартхылап, андар чахайахтар салғаннар.
Хакасия делегациязы Белоруссия ӱлгӱлеріне «ИННОПРОМ.Беларусь» чоннар аразындағы кӧзідіге хығырған ӱчӱн, мемориал комплексінде пол килерге паза чат халған чааҷыларны хумартхылирға оңдай пирген ӱчӱн алғызын читірген. Алынҷа алғыс сӧстері Беларусь Республиканың президентіне паза белорус чонына чылығ удурлааны ӱчӱн искірілген. Хакасия делегациязы белоруссиядағыларны пістің республиказар мындағох чорыхнаң ааллап килерге хығырған.
Сом r-19. ru cайттаң
Автор :
Ирина Истомина
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
