Хакасия улуғ аалҷыларны удурлады
26.09.2025
Хабарлар
Хакасия пазы Валентин Коновалов фестиваль араласчыларынаң хада
Чапсых чорыхтар. Неделя тооза Хакасияда тиксi тилекейдегi чииттер фестивальының араласчылары ааллапчалар. Олар республиканың аймах пулуңнарында пол парыбысханнар
Пiстiң регионзар чииттер Нижний Новгородтаң читкеннер. Анда ирткен фестивальда 100 азыра хазнаның оол-хыстары араласханнар. Хакасиязар, тiзең, 11 хазнаның 20 азыра чиит кiзiзi читкен. Олар Бразилия, Намибия, Танзания, Армения, Марокко, Мали, Колумбия, Кот-д’Ивуар, Венесуэла, Ирак паза Нигерия хазналар.
Фестиваль араласчыларын «Ағбан» аэропортта хакас кибiрiнең удурлааннар. Хакас чирiнзер пасхандох, «Айланыс» фольклор ансамбльының паза «Читiген» национальнай театрның артисттерi аалҷыларны айраннаң паза талғаннаң идiлген конфеттернең сыйлааннар.
Хакасиянаң танызарын чииттер 22 ӱртӱнде Л.Р.Кызласовтың адынаң чир-суғ ӱгренҷең музейдең пастааннар. Анда олар, аймах залларҷа чӧрiп, республиканың тархынынаң танызып, мының алнындағы туссар айланғаннар. Соонаң оларны Алтай аймаанда «Изых» шахта-парксар апарғаннар. Анда оларға экскурсия иртiрiлген. Андох чииттер «Ынархас аллеязын» одыртханнар. Хакасияның чииттерiнең хада аалҷылар 30 азыра хорбы ағазын одыртыбысханнар.
Аннаң пасха, Хакасияның чииттер политиказынҷа паза халых тилiзінҷе министрi Евгения Майнагашева паза Марокконың национальнай комитедiнiң устағҷызы Набиль Белькас хада-пiрге тоғынардаңар чӧптезiгде хол салыбысханнар. Анзы iкi хазнаа аймах кӧстеглерҷе проекттернi хада толдырарға оңдай пирер. Таныхтирға кирек, ол – чоннар аразындағы палғалысты тилiдерiнде паза тыыдарында чахсы хаалағ.
23 ӱртӱнде, тiзең, фестиваль араласчылары республиканың ӱлгӱ туразында Хакасия пазы Валентин Коноваловнаң тоғасханнар.
– Хакасияа аймах хазналарның таланттығ чииттерiн пос чирiнде удурлирға улуғ ӧрiнiс паза нандырығ. Хакасия – пай тархыннығ, культуралығ чир паза аның сiлии хайхастығ. Iзенчем, сiрернiң чорыхтарың соонаң пiстiң арабыста наа палғалыстар, проекттер тӧрирлер, – айланған залда чыылған аймах хазналарның чииттерiнзер Валентин Олегович.
Хакасияның чииттер политиказынҷа паза халых тилiзінче министрi Евгения Майнагашева аалҷыларға улуғ культура программазы тимнел парғаннаңар искiрген. Ол иң пастап республиканаң танызарына кӧстеглiг.
Чыылығда араласхан полған на аалҷының чоох тудар оңдайы полған. Iди Гор (Армения), Хакасиязар пiрее хайди хатап килiп, одыртхан ағазы хайди ӧсчеткенiн кӧрiп аларға сағынчатханын искiрген, Набиль (Марокко) Хакасияның чииттер политиказынҷа паза халых тилiзінҷе министерствозынаң чӧптезiг иткенi – олаңай нимес пiчiк, ол iкi хазна аразындағы ынағлас пiчии тiп таныхтаан, Хорхе (Колумбия) ағастар одыртханына морсын парғанын чазырбинча паза республикада чир-чайаан хайди хайраллалчатханынаңар сурған, Аллиға (Танзания) регионның экономиказы хайди тилiпчеткенiн пiлiп аларға хынығ полған паза даа пасхазы регион устағҷызына пос сурығларын пир турғаннар. Че олар прайзы даа чоохтарында Хакасия пазын паза республика чииттерiн постарынзар ааллап хығырған.
Ӱлгӱ туразында ирткен тоғазығ соонаң улуғ делегация республиканың поғдархазынзар, Сойан-Сус ГЭС-сар, чол тутхан. Че андар чидер алнында аалҷылар Нымырттығ поселоктағы Сибирьдегi федеральнай университеттiң Сойан-Сустағы филиалының студенттерiнең тоғазып алғаннар. Анаң на олар РусГидрозар читкеннер. Аның музейiнде чииттер гидроэнергетиканың тархынынаң, наа технологияларнаң танысханнар паза аның хазнаа кирексiнiзiн пiлiп алғаннар. Нымырттығда аалҷыларға республикада ӱгредiг, наука паза энергетика хайди тилiпчеткенiнеңер чоохтааннар.
ГЭС-таң айланчатханда, фестиваль араласчылары «Тортуга» парксар чӧргеннер. Олар, аның ӧӧн чардыхтарында пол парыбызып, Ким суғ хазында паза арығ аразында сiлiг сомнар итклеп алғаннар.
Аалҷылар «Хуртуйах тас» музейде пол килгеннер
Ӱзiнҷi кӱнiнде оларның программазында Асхыс аймаандағы Оңхак аал хыриндағы «Хуртуйах тас» музей-заповедник полған. Аалҷыларны хакас чиизiнең удурлап, музейнiң наука тоғынҷызы Леонид Горбатов оларға экскурсия иртiрген.
Таныхтирға кирек, Нижний Новгородта ирткен ӧӧн фестиваль соонаң пасха хазналарның 200 азыра оол-хызы Россияның регионнарынҷа тарасхлап парыбысхан. Хакасия 10 регион санына кiр парған, кемге аалҷыларны удурлирға ӱлӱс тӱскен. Чорыхтың ӧӧн пӧгiнi – Россиянаң паза аның регионнарынаң танызары. Хайди тоғазығда таныхтааннар аалҷылар, пу чорых соонаң Хакасиядаңар прай тилекейде пiлерлер паза пеер туристтер кӧп кил сығарлар.
Улуғ фестивальның тӧстегҷiзi – чииттер киректерiнҷе федеральнай агентство. Ол «Чииттер паза олғаннар» национальнай проект хоостыра иртiрiлген.
Сомнар Илона Каковани паза r-19.ru сайттаң
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
