Алтай аймаанда – сӱт цеғы
17.09.2025
Хабарлар
«УТРО» сӱт цеғында тоғыс хайнапча
Танығлығ кирек. Пу наада Хубачар аалда «УТРО» аал хонии потребительлер кооперативi сӱт сығарҷаң цех азыбысхан. Алтай аймаандағы кооператив 2021 чылдаң сӱт паза сӱттең тимнелген ас-тамах сығарызынаң айғасча
Хакасия пазы Валентин Коновалов, Алтай аймаа пазы Ирина Войнова, республиканың аал хонии паза ас-тамах министрi Сергей Труфанов сӱт цеғының пайрамни азылғанында араласханнар.
«УТРО» аал хонии потребительлер кооперативi сӱттi орындағы хоныхтардаң садысча. Iдӧк «Алтай» ООО-наң хада-пiрге тоғынча, хайзы саалчатхан iнектернi тутча. 2022 чылда кооператив тилiске 7 миллион салковай грант утып алған. Ол ахчаа рефрижератор паза сӱт тарт чӧрҷең УАЗ ПРОФИ машина садызып алған. 2023 паза 2024 чылларда субсидия алған.
– 2023-2024 чылларда региондағы аал хонии паза ас-тамах министерствозы аал хонии потребительлер кооперативiне 121341,77 салковай субсидия пирген. Пу хабазығ материально-техническай базаны тыыдыбызарға полысхан, – теен Алтай аймаа пазы Ирина Войнова.
Аал хонии потребительлер кооперативi «Алтай» ООО-наң пик палғалызып тоғынчатхан сылтаанда, андар сыбыра сӱт пирiлче.
– Пiстiң кӧрiзiбiснең, сӱт сығарызы – парыстығ тоғыс. Сӱт паазы сыбыра алысча. Хысхыда ол аарлығ арах турча, чайғыда паазы тӱсче. Аннаңар сӱт сығарызынаң айғасчабыс. Iнектернi чайғыда даа, хысхыда даа саапчабыс.
Кӱнде 6,5 тонна сӱт сығарчабыс. Амды сӱттi республикада ла сатчабыс. Мыннаң мындар Хакасия тастында даа садарға пӧгiнчебiс.
Тура полған. Пiс аны тыхтабыcхабыс, оборудование садызып алғабыс. Тиксi 35 миллион салковай хорат салғабыс. Сӱт сығарҷаң цехта iкi технолог, управляющай, тӧрт тоғысчы машинист, iкi слесарь паза iкi полысчы тоғынча. Пiстiң улуғ нимес модульлығ цех полған. Ол «Алтай» ООО-ның чирiнде, Хойбал аалда, орныххан. Пiс аны iкi-ӱс ай мының алнында чабысхабыс, амды пу цехты асчабыс.
Кӱнде цехта 7 муң тонна сӱттең ас-тамах тимнир оңдай пар. Пiс сӱт, ах хайах, эҷiгей, ӧрiңме сығарарбыс. «Алтай» ООО-да мал санын ӧскiрерге пӧгiнчебiс, – теен «Алтай» ООО-ның ӧӧн директоры Ларион Тороков.
«УТРО» сӱт цеғының управляющайы Михаил Топоев сӱт сығарызынаңар хысхаҷахти чоохтап пирген:
– Пiс 2,5 паза 3,2 проценттiг паза хойығ сӱт сығарчабыс. Сӱт хайнадылча, гомогенизация иртче. Анаң ол бункерлерзер урылча, насос полызиинаң триблоксар парча. Триблокта ПЭТ бутылка чайылча, андар сӱт алай кефир урылча, чабығ кизiртiлче. Анаң триблоктаң сӱттiг паза чабығлығ бутылка сыхча. Этикетировка иртче, оператор, бутылканы алып, аны орирға турғысча.
Закон хоостыра пiс бутылказар куаркодтығ этикетка чапсыр саларға кирекпiс. Анда сӱт хаҷан урылғаны паза нинҷе тус хайраллалчатханы пазыл парарға кирек.
Пiс пiр часха пiр тонна сӱт сығар полар оңдайлығбыс. Амды сӱттең пасха, эҷiгей, сливка сығарчабыс. Мыннаң мындар iсчең йогурттар паза снежок сығарарға пӧгiнчебiс. Ӧрiңме итчең станок алып аларға сағынчабыс. Алтай аймаандағы прай даа олған садтарынзар сӱт, кефир паза ах хайах сатчабыс. Ах хайахты коробкаларнаң сатчабыс. Кефирнi ӱр ниместе сығар сыххабыс.
Прай оборудование 30 миллионҷа салковайға тур парған. Школаларзар даа сӱт садарҷыхпыс. Че школаларға читiрiлчеткен сӱт тетрапакта поларға кирек, пiс, тізең, сӱттi бутылкаларға урчабыс. Пiс сығарчатхан сӱт чахсы тiп санапчам, мин палаларыма аны алчам.
Ирткен неделядаң сығара Абазаның садығ тураларынзар сӱттi сат сыххабыс. Пу чағында сӱттең тимнелген ас-тамах Ағбандағы садығ тураларында полар.
Сӱт цеғында пастеризатор, гомогенизатор, триблок, этикетировщик, бутылкалар ораҷаң паза суғны арығлаҷаң оборудованиелер пар. Сӱттi, кефирнi бутылкаларзар ур салза, пiс прай оборудованиенi чуупчабыс, анаң арығ суғнаң чайчабыс. Суғ пастағы категориялығ.
Цехта пiр ле смена тоғынча. Мыннаң мындар 12-ер час iкi смена тоғынар.
Таныхтирға кирек, «УТРО» сӱт цеғы орныхчатхан тура iкi чыл тиксi тыхталған. Мының алнында анда «Алтайское» ЗАО-ның столовайы полған.
Пӱӱл чарыс айында «УТРО» кооператив сӱт цеғынаң хости садығ туразын азыбызарға пӧгiнче. Ол iдӧк иргi iкi хадыллығ турада орнығар. Амғы туста турада тыхтағ тоғыстары апарылча. Садығ туразында улуғ нимес пекарня полар, халас, тыдылығ халазахтар, «УТРО» цехта сығарылған сӱттең тимнелген ас-тамах паза ит садылар. «Алтай» ООО пу проекттiң ӧӧн тӧстегҷiзi полча.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
