«Саянының» iкi чиңiзi
17.09.2025
Хабарлар
«Саяны» команда ойын тузында
Спорт. Тынағ кӱннерiнде меспектiг хоккейҷе Россия кубогының пастағы чардығының халғанҷы ойыннары ирткеннер
Cынны чоохтаза, пастағы салтарлар «Саяны» команданың кӧрігҷiлерiнiң кӧңнiн тӱзiргеннер. Хакасияның ӧмезi соон сӱрістіре «Кузбассха», «Сибсельмашха» паза «СКА-Нефтяникке» утыр салған нооза. Андағ оңдайларда ӧменің таңдағызына киртінерге сидік. Пазох чоохтар пар сыххан: Хакасияа меспектiг хоккейҷе команда кирек пе? Кирек. Спорт кiзi хылиин тыытча. Меспектiг хоккей ӧмеде тоғынарға, удур-тӧдiр пiлiзерге ӱгретче. Ағаа хоза «Саяны» утырыстарға пос салынмаан. Оолларыбыс пуста сын хоккей кӧзіт пиргеннер. Аннаңар алғыда.
9 ӱртӱнде «Саяны» команда «Кузбасс-2» ӧменең тоғасхан. Санны асхан «ыырҷы». Пiстiңнер нандыр пиргеннер. Аннаң сығара iкi ӧме пинг-понг ойнааннар тирге чарир. 33-ҷі минутада сан 3:3 пол парған. Пастағы тайм тоозыл париғанда, хоккеисттерiбіс пус ээлерiн азып алғаннар. Таблода сан 4:3 пол парған. Тӧртiнҷi меспектi «Кузбасс-2» хаалхазынзар Кирилл Кулаев кире сабысхан. Ідӧк Егор Бердниковты, Аркадий Сыраевтi, Григорий Фёдоровты махтирға кирек. Ойынның ікінҷі чардығы хайди парыбызар ни? 50-ҷі минутада пазох Аркадий Сыраев ӧрiндiрдi. Сан – 5:3. «Саяны» алнында. Команданың хоза пiр сан тоғынып алар оңдай полған. Ачырғасха, Андрей Осипенков пенальти саап полбаан. Iди чӱрексiнген полар чи? 64-ҷі минутада «ыырҷының» пiстiңнерге хоза пiр меспек сабызар кӱзi читкен. Ойын 5:4 саннаң тоозылған. Піреезi чоохтир: «Саяны» чииттернең ойнаан. Анзы андағ. Че «Кузбасс-2» пос чазызында чиңic ӱчӱн харбасхан. Ибде, тізең, стенелер дее полысчалар. Чарғыҷылар даа пус ээлерiне чылығ хайарға хынадырлар.
10 ӱртӱнде оолларыбыс «Байкал-Энергия» команданаң ойнааннар. Чир-суғҷыларыбыстың алнындағы чиңiске кӱс хозыл парған, таң. Олар пастағы минутадаң «ыырҷыны» чабыра пас сыхханнар. «Байкал-Энергияның» хаалхазынзар ӱс меспек учухча. Оларның авторлары – Артём Варламов, Михаил Лисюк паза Григорий Фёдоров. Сан – 3:0. «Саяны» кӧзiтчең ниме кӧзiтче. Иркутсктағылар – пик хуйахтығ чон. Чарым час пазынаң олар удурлас сыхханнар. Кӱстенiс тикке парбады. 47-ҷі минутада сан 3:3 пол парды. Кирек сағыбаан оңдайнаң парыбызарға итче. Анзынаң меспектiг хоккей хынығ. «Саяныға» чиңic кирек. Кирилл Кулаев арғызы Григорий Фёдоровтың полызиинаң «Байкал-Энергияа» меспектi кире сабысты. Иркутсктағылар 10 минута пазынаң нандыр пиргеннер. Сан – 4:4. Iкi команда тиңни ойнабызар ба? Хоккеисттерiбiс аннаң чараспинчалар. Матч 6:4 саннаң тоозылған. Пӧзiк устарынаң Кирилл Кулаев паза Сергей Дёмин ӧрiндiргеннер.
«Енисей» команданаң ойын уғаа хынығ ирткен. Iкi команда 11 ӱртӱнде тоғасхан. 11-ҷi минутада сан 1:1 полған. Анаң пiстiңнер хызылчардағыларға утыр сыхханнар. Че 41-ҷi минутада «Енисейнiң» хаалхазынзар Кирилл Кулаев гол сабысхан, арғызына хозылған Григорий Фёдоров. Пастағы тайм 3:4 саннаң тоозылған. Ікінҷі тайм киречілеен: «Саянының» амғы ӧмезi матч тоозылғанҷа ойнирға тимде. Я, хакасиядағылар утыр салғаннар. Сан – 5:7. Че олар харбасханнар. Ойынның матырына Кирилл Кулаевтi санирға чарир. Хоккеист позының адына ӱс меспек пас салған.
«Саяны», 6 сан тоғынып алып, турнир таблицазында пизiнҷi орында парча. Ол Россия кубогының азах меедiнде аралас полбас. «Кидеркi» ӧмедеңер чоохтаза, анда пастағы орында парча «Динамо» (Москва), iкiнҷi орында – «Уральский трубник» (Свердловск облазы). Ӱзінҷі орынға «Волга» (Ульяновск) сых парыбысхан, аның соонда ла «Водник» (Архангельск). Пус ээзi «Волга» архангельсктегiлерні 9:7 саннаң чиңiп алтыр.
Кибiр хоостыра Россия чемпионады кічіг хырласта пасталча. Сизiнгенде, аның тузында хоккей ӧмелерi кӧрiгҷiлернi пiр ле хати нимес чапсыдарлар.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
