Иң кӱстiг шахматисттер – Хакасияда
12.09.2025
Хабарлар
Хакасияның iкi командазы удур-тӧдiр ойнапча
Спорт. Пiстiң республикада шахматча Россия чемпионады иртче. Анда хазии уйан улус узын сынапча
Амғы марығ Хакасияның тархынына кiр парар тiп iкiнҷiлес чоғыл. Шахматча Россия чемпионадын республика пастағызын на удурлапча нооза. Турнир уйан кӧрчеткеннерге, харах оды чохтарға кӧрiлген. Арға-мӧрій 9 – 15 ӱртӱнде парар. Анда 8 команда араласча. Пӧзiк уcтығ шахматисттер Москва, Алтай крайы, Кострома, Самара, Новосибирск паза Москва областьтары, Дагестан, Хакасия республикалары ӱчӱн турысчалар. Пiстiң регион 2 ӧме арға-мӧрійге сығарыбысхан. Полған на командада ӱзер кiзi.
Хакасияда улуғ турнир иртчеткенiн чидiге санирға чарир. Анда орындағы спортсменнернiң хозымы улуғ. Пiстiң шахматисттердең ӱс кiзi – Руслан Драганов, Евгений Суслов паза Владимир Малецкий – Россияның пiрiктiрiлген командазынзар кiрче. Олар ӧмелер мариинда читi хати хазна чемпионнары атха турысханнар.
Руслан Михайлович пу спорт кӧрiмiнде «чылтысха» саналча. Анзы тиктең нимес. Чир-суғҷыбыс ФИДЕ-ның узы, Европа чемпионадының кӱмӱс призеры, 16-ҷы Тиксі тилекейдегi Олимпиаданың чиңicчiзi паза ӱс хати тилекей чемпионы. Саблығ спортсмен амғы туста Республиканың паралимп резервi спорт школазында тренер полып iстенче. Марығ пасталар алнында ол, хабарҷыларның сурығларына нандырып, чоохтаан:
– Чемпионатта кӱстiг шахматисттер чиңiс ӱчӱн харбазарлар. Удур-тӧдiр чахсы таныспыс. Пiр ле хати нимес чарды кистiнде хыйға пыласхабыс. Арға-мӧрій ибде иртчеткенде, утырарға чарабас, аннаңар чӱрексiпчем.
Ағбанда улуғ турнир иртiрiп, хайдағ пӧгiн турғысчабыс? Сибирьде пу спорт кӧрiмi хомай тилiпче. Анзын араласчылар санынаң даа сизiнерге чарир. Россия чемпионадына командаларны Алтай крайы, Новосибирск облазы паза Хакасия ла сығарғаннар. Хызылчар миллион чуртағҷылығ городха саналча. Ноға оларның шахматисттерi арға-мӧрійде араласпинчалар? Кемеров облазы – хонҷых регион. Cпортсменнернi ыс полбааннар ба? Пу чемпионат соонда сибирьдегiлер хыймыран сығарына iзенчебiс. Россияның шахматча федерациязы хабазарға тимде.
Республика ӱчӱн алтолаң турызарбыс. Пастағы ӧмеде Владимир Малецкий, Евгений Суслов паза мин ойнирбыс. Iкiнҷi командазар кiрчелер Владимир Самбурский, Юрий Тодинов паза Иван Шпет.
Россия чемпионадын 9 ӱртӱнде пайрамни асханнар. Шахматисттер «Анзас» гостиницада хыйға пыласчалар, андох чуртапчалар. Аарлығ аалҷылар санында полғаннар спорт министрiнiң тоғызын толдырчатхан Юлия Ворошилова, тиксi Россиядағы харах оды чохтар пiрiгiзiнiң (ВОС) орындағы пӧлиинiң кнезi Cветлана Лукина паза ВОС-тың Кострома облазындағы пӧлиинiң кнезi, шашкаҷа Россия гроссмейстерi Дмитрий Андреев. Олар чыылысхан улусха чиңiс тударға алғааннар.
Марығ оңдайларынҷа прай командалар, удур-тӧдiр ойнап, саннар чыыпчалар. Пiр кӱнде пiр тур иртче. Ол 2-2,5 час парчаттыр. Шахматтарны кӧргенде, cпорт тирии пасхалалчаттыр. Чарды хыдыртпах. Хара клеткалар 3-4 миллиметрге пӧзiктер. Полған на клетка ортызында тизiк, шахматтарның пiр cаринда, тiзең, ӧргеҷектер. Спортсменнер шахматтарны чардыҷа чылдырбинчалар, клеткаларға хазапчалар тирге чарир.
Юрий Тодиновнаң чоохтазып алғабыс. Ол Асхыс аймаандағы Полтах аалдаң. Олған тузында хараанаң кинеп партыр. Аның ӱчӱн уйан кӧрчеткеннерге школаны тоосхан. Ағбандағы ӧдiк тiкчеткен фабрикада тоғынған. Шахмат чииттең ойнапча.
Iдӧк cағыстарынаң ӱлескен Дмитрий Андреев. Аның таниинаң, Хакасияда арға-мӧрійнi иртiрер пастағнаң сыхханнар Руслан Драганов паза Владимир Малецкий. Тоғыс пис чыл парған. Чиңiсчiлерге паза призерларға чахсы сыйыхтар тимнел парған. Амғы чемпионатта 5 спорт узы араласча. Тиксі Россияда 10 на регионда шахматча чахсы командалар пар. Хакасия кӱстiглернiң санында.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
