Хакасия газтығ полар ба?
12.09.2025
Хабарлар
Хазна Думазының депутады Николай Шульгинов
Тоғазығ. Валентин Коновалов Николай Шульгиновнаң регионны тилітчең ӧӧн кӧстеглерні паза республиказар газ тартар оңдайларны ӱзӱрген
Республика пазы Валентин Коновалов Россияның Хазна Думазының энергетикаҷа комитедінің кнезі Николай Шульгиновнаң, ол парламенттің алтындағы палатазынзар Хакасиядаң сығара табылған, тоғазығ иртірген.
Пу тоғазығда олар республиканың чуртас-экономика киреен, Хакасияны тилітчең ӧӧн кӧстеглерні ӱзӱрібіскеннер, амғы пӧгіннерні тӱзімніг пӧгеріне пірге тоғыстың мыннаң мындархы стратегиязын кӧр салғаннар. Алынҷа хайығ федеральнай хабазығ кирексіпчеткен сурығларға салылған.
Николай Шульгинов Владивостокта ирткен Іскеркі экономика форумына чӧр килгені хоостыра сағыс-кӧрістерінең ӱлескен.
Хакасия пазы Валентин Коновалов Россия президенті Владимир Путин халғанҷы туста Сибирьні паза Ыраххы Востокты тилідерінҷе тӱзімніг чарадығлар кӧп алғанын таныхтаан.
Олар, кӧзідімге, Іскеркі тимір чолларны мыннаң мындар чахсыландырарына теелчелер. Хайди таныхтаан Валентин Коновалов, Хакасияа ол постың продукциязын іскер, Хыдат паза Индия рыноктарынзар, тиксі ӱстӱнзархы-іскеркі Азиязар садар оңдайны асча.
Паза пір ӧӧн чарадығ, хайзын Россия президенті Хыдатнаң хада алған – «Сила Сибири-2» газопровод пӱдірері. Улам хазна пазы иң пастағызын істіндегі газификацияны идерге пӧгін турғысхан, анзы Сибирь регионнарының экономиказын мыннаң мындар тилідеріне наа оңдайлар асча.
– Ол чарадығ кӧңнібіс кӧдірче. Трассировка итчетселер, пістің республика санға алыларына ізенчебіс. Ол кирекче пірге тоғыныбызарға кирек, – таныхтаан Валентин Коновалов. – Пістің, Кимдегі Сибирьні алза, Хызылчар крайында, Хакасияда паза Тывада амға теере газ тартылбаан. Аннаңар ол азылчатхан оңдайлар піске тың киректер. Пӱӱн, хаҷан планнар тимнелче, республиканың кирексіністері санға алылары паза пістің сағыс-кӧрізібісті ис салары уғаа кирек.
Валентин Коновалов Николай Шульгиновха Хакасияның кирек сурығларына тӧреміл хайығ салчатхан, республикаа кирек чарадығларны федеральнай синде аларында ӧткін араласчатхан паза регионның пастағларын, чӧптерін чылдырарына хабасчатхан ӱчӱн алғызын читірген.
Хазна Думазының депутады республиканың устағ-пастаанаң хада Хакасияа паза аның чуртағҷыларына туза ағылҷаң пірге тоғыс мыннаң мындар ідӧк тӱзімніг апарыл турарына ізенізін читірген.
Сом r-19.ru cайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
