Чуртирға, спортнаң даа айғазарға истіг полар
10.09.2025
Хабарлар
Ӧнетін чаа операциязының ветераны Николай Нарылков
Матырлар тузы. Ағбанда «Ада чир-суубыс арачылағҷылары» хазна фондының Хакасияҷа пӧлиинде ӧнетін чаа операциязында кинек пол парған ветераннарға оларға килістіре тимнелген кип-азах читірілген
Ағбанда орныхчатхан «Ада чир-суубыс арачылағҷылары» фондтың пӧлии туразында илееде чон хайынысчатхан. Анда ӧнетін чаа операциязында, чааҷы пӧгіннерін толдырчадып, кинек пол парған ветераннарға оларның чуртазын нииктиріне киліcтіре тігілген истіг кип-азах читірчеткеннер. Комплектке кирілген: футболкалар, шортылар, кофталар, спорт костюмнары, курткалар, толстовкалар паза даа пасхазы. Пірее ветеран куртканы синеп чӧрчеткен, пасхазы позына килістіре, чарас комплект таллаан.
Амды андағ ӧнетін кип-азах комплектін (аны «адаптивнай кип-азах» адапчалар) СВО-ның 12 ветераны алған. Олар, Хакасиядаң СВО-зар парып, андағы чаалазығда палығладып, кинек пол парғаннар. Республикада СВО ветераннарына ӧнетін, оларға килiстіре тимнелген кип-азах пастағызын на пирілче. Андағ комплект аларға республикадаң прай 24 сурыныс ызылған.
Хайди анда искірілген, «Ада чир-суубыс арачылағҷылары» хазна фонды СВО ветераннарына ӧнетін тимнелген кип-азах пиріп пастапча. Мындағ комплекттер аларға фондсар пастағы 700 сурыныс кірген. Пу чыл тоозылғанҷа 1000-ҷа ветеранға кинек кізілернің оңдайларынҷа тігілген кип-азах пирерге пӧгінде турча.
Полған на ветеранның айланызын «Ада чир-суубыс арачылағҷылары» фондтың эксперт чӧбі алынҷа кӧрче, аның прай оңдайларына килістіре кип-азах тимнелче. Полған на ветеран позына чарас син, ӧң паза модель таллапча.
Россияның президентi Владимир Путиннің хабазии сылтаанда, «Ада чир-суубыс арачылағҷылары» фондтың СВО ветераннарына ӧнетін тимнелген кип-азах пирер оңдай пар пол парды. Президент фонд тоғынҷыларынаң паза СВО матырларынаң тоғазығда Анна Цивилеваның пастаанаң чарасхан.
Фонд специалисттері паза социальнай координаторлар ветераннарға имнег полызиин аларға паза реабилитация иртерге полысчалар, iдӧк пасха профессияа ӱгренерге, тоғыс табарға, юрист полызиин аларға хабасчалар. Кинектернің кирексіністеріне килістiре чуртты идерге полысчалар, ибде дее оларны сыбыра кӧрчелер. Фонднаң устапча Россияның арачыланыс министрiнің орынҷызы Анна Цивилева. Фонд филиаллары Россияның прай регионнарында тоғынчалар.
Хакасияның ветераннарына адаптивнай кип-азах пирер мероприятиеде улуғ нимес чоох тутхан «Ада чир-суубыс арачылағҷылары» фондтың Хакасияҷа пӧлиинiң устағҷызы Оксана Трусова:
– Прайзына мындағ мероприятиее килген ӱчӱн алғызым читіргем. Сірер фондтың координаторларынаң сыбыра палғалыс тутчазар. Ам сірерге постарыңа килістіре кип-азах таллап алар оңдай пирілче, ол чуртазыңарны нииктир, истіг идер. Аны тимнеен производительнең палғалыс тудыңар, кип-азах комплекттерін тимнепче Москвада орныхчатхан «Ортомода» компания, аның филиалы Хакасияда тоғынча. Компания устағҷызы пу мероприятиеде iдӧк араласча. Сірерні фонд иртірчеткен спорт марығларында аралазарға хығырчам, кӧзідімге, «флеш-хоккейҷе», ол уғаа хынығ ойын. Пір дее туртухпин, удур-тӧдiр палғалыс тудыңар, хабарлазыңар. Кип-азахты сыныхтап кӧріңер, арса, аны улам чахсыландырарға чӧптер пирерзер.
Хайди таныхтаан пу мероприятиее Москвадаң ӧнетін килген «Ортомода» компанияның устағҷызы Владимир Подлесный, компания кинектерге кип-азах тимнирінең 25 чыл айғас парир. Олар кип-азах, ӧдiк, аймах протезтер тимнепчелер, коляскалығ чӧрчеткеннерге дее килістіре оборудование итчелер. Компания тастына даа, істіне дее кисчең кип-азах тікче, анда аймах кнопкалар, липучкалар, молниялар пар, оларнаң тузаланарға оой. Мындағ ӧнетін кип-азах алчатхан пастағы регион Хакасия полча. Кип-азахты кӧріп, сыныхтап, піске постарыңның чӧптерің пиріңер, олар тоғызыбысты чахсыландырарға тузалығ поларлар.
Владимир Подлесный, пiр куртканы алып, аннаң хайди тузаланарын прайзына кӧзіткен.
Ӧнетін кип-азах алчатхан мероприятиеде, СВО-да чаалазып, палығладып, кинек пол парған ветеран, 35 частығ хакас ирен Николай Нарылковнаң чоох алысхабыс. Хайди ол искірген, СВО-зар мобилизация хоостыра 2022 чылда 3 чарыста парған, Луганск облазындағы чаалазығларда, штурмовик полып, ікі хати палығлатхан. Пастап пуды ӧтіре ух парған, ікінҷiзiн пехотадаң тоғыр мина чачыразында (ол чоннар аразындағы чӧптезіглерҷе тузаланарға чарадылбинчатхан тиріг полча. – Авт.) пір азааның тiзегі алты чох халған, ам протезтіг чӧрче. Аны Санкт-Петербургтағы госпитальда имнееннер.
Позы Николай Владимирович Ағбан пилтірі аймаандағы Чарков аалда тӧреен, ӧскен. Школаны анда тоозып, Ағбанда пӱдіріг училищезінде (ам ол колледж полча) тураларны чазапчатхан пӱдіріг тоғыстарының узына ӱгренiп алған. Срочнай чааҷы службазын Армениядағы Гюмри городта автомобиль войсколарында ирткен. Алтын аныпчатхан «Золотая звезда» артельде тоғынған. Хоных хон салғанда, Норильсксер прай сӧбірезінең парыбысхан, анда «Норникель» заводта газ арығлаҷаң аппаратчик полып істенген. Аның 4,5 частығ хызыҷаа пар.
СВО-даң айланып, Ағбанда позына тура пӱдірче, прай тоғыстарны позы толдырча, олох турада iҷезінең чуртапча. Туразын читіре пӱдіргенҷе, сӧбірезі Норильскте халған, хасты-хазинезі оларнаң хада.
Николай Нарылков «Ада чир-суубыс арачылағҷылары» фондтың тоғызын махтапча. Пӱдіріл париған тураа фонд кухня гарнитурын ал пирген, ағаа хоза пылесос паза смартфон сыйлааннар. Протез истіг, азах кизегі чоғылын даа ундут салчам тіпче Николай. Ам хайдағ-да электрическай протезті аларына сурыныс пир салтыр. Прай сурыныстарны толдыр пирчелер. Позын тоғынарға олох артель хығырча осхас. Че пастап тураны читіре пӱдіріп аларға кирек, iдӧк хоза тура пӱдірерге пӧгінче. Палығлатхан ӱчӱн кӧріл парған прай тӧлеглерні тузында пиргеннер. Кинек полчатхан ӱчӱн турыстыра пенсия тӧлелче.
Ӧнетін чаа операциязында махачы чааласхан ӱчӱн Николай Нарылков «За отвагу» медальнаң сыйыхтатхан.
Сом авторни
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
