Ус ӱгретчiлернiң олғаннары пӧзiк чидiглерге читчелер
10.09.2025
Хабарлар
Турчалар (сол саринаң) Ксения Николаева, Анна Сагалакова, Владимир Идимешев, Татьяна Куюкова, Елена Боргоякова, одырчалар: Татьяна Медведева, Людмила Сагоякова, Нелли Сунчугашева
Хакас гимназиязының 80 чылына. Хакас облазындағы национальнай школада пасха хан тiллерiнiң кафедразы 70 чыллар пасталчатханда тӧстелген
1963 чылда школазар англия тiлi ӱгретчiзi Светлана Трошкина килгенде, ӱгредiг организациязында англия тiлi уроктары хатап иртiрiл сыхханнар. Ол тустаң пасти методика пiрiгiзінiң, соонаң кафедра устағҷызы полып ӱр чыллар Светлана Фёдоровна тоғынған.
Школа директоры П.Н.Кичеев пасха хан тiллерiнің кабинедiнде ӱгредiг пособиелерi, учебниктер, ТСО ползын тіп кӧп кӱс салған. Лингафоннай кабинетке кирек ниме-ноо аларға кӱстенген, ол туста областьтағы школаларда мындағ кабинеттер чох таа полған.
Андада национальнай школада уғаа кӱстiг англия тiлi ӱгретчiлерi тоғынғаннар: Светлана Трошкина, Алла Чаптыкова, Светлана Ивандаева, Наталья Кокова, Ирина Кобежикова, Илона Ивандаева, Елена Кайдаракова, Татьяна Медведева.
Светлана Трошкина 1963 чылда, Хызылчардағы ӱгретчiлер институдының пасха хан тiллерi факультедiн тоозып, национальнай школазар iстенерге килген. Аның устаанынаң «Традиции и обычаи хакасского народа» англия тiлiнең методика пособиезi сығарылған. Ағаа рецензия пасхан специалисттер учебниктi пӧзiк паалааннар, ол улуғ класстағы ӱгренҷiлернiң хайиин тартхан паза Хакасиязар килген туристтерге туза полған. Светлана Фёдоровна «Улуғ ӱгретчi», «Ӱгретчi-методист», «Чон ӱгредиинiң отличнигi», «Хакас Республиканың саблығ ӱгретчiзi» аттарға турысхан паза илееде Аарластығ паза алғыстас пiчiктерiн алған.
Алла Чаптыкова национальнай школада 1969 чылдаң тоғынып пастаан. Олох чыл «Халхин-Гол» совет-моол ынархас клубынаң устап сыххан. «Улуғ ӱгретчi» атнаң таныхтатхан, 1995 чылда ағаа «Чон ӱгредиинiң отличнигi» ат пирiлген.
Светлана Ивандаева 1970 чылда Ағбандағы ӱгретчiлер институдының пасха хан тiллерi факультедiн тооcхан, 1972 – 2003 чылларда школада англия тiлi уроктарын апарған. Тiспен тоғызы ӱчӱн Светлана Иннокентьевна Россия Федерациязының ӱгредiг паза наука министерствозының Аарластығ пiчиинең таныхтатхан.
Наталья Кокова 1974 чылда Ағбандағы ӱгретчiлер институдын «Англия паза немец тiллерi» специальностьча тоозып, олох чыл тоғысха сыххан. Школада ағаа иң пӧзiк квалификациялығ категория пирiлген. Аның пӱкӱлее тоғынған стажы 37 чылға тиңнелген. Наталья Ивановна Хакасияның Ӧӧркi Чӧп Президиумының Аарластығ пiчиинең таныхтатхан.
Ирина Кобежикова национальнай школада 1995 чылдаң тоғынған. 2001-2005 чылларда iдӧк воспитательнай тоғысча директор орынҷызы полған. Аның соонаң Ирина Валерьевна пасха хан тiллерi кафедразының устағҷызына турғызылған. Хада тоғынчатхан ӱгретчi-арғыстарынаң «Солбан» клубты айландырған. Англия тiлi ӱгретчiзi «Ынархас чоллары» (2008 чыл) регионнар аразындағы фестивальның тӧстегҷiзi полча.
Илона Ивандаева 1993 чылда школада воспитатель полып тоғынып пастаан. 2002 чылда англия ӱгретчiзiне алылған. Пу должностьта ол 2013 чылға теере тоғынған.
Елена Кайдаракова – иң пӧзiк категориялығ англия тiлi ӱгретчiзi, ЕГЭ салтарларын сыныхтирынҷа эксперт комиссиязының араласчызы. 2022 чылда Россия Федерациязының ӱгредiг министерствозының Аарластығ пiчиинең таныхтатхан. Хакас гимназиязында 2009 – 2023 чылларда тоғынған, 2018 чылда гимназияның пасха хан тiллерiнiң методика пiрiгiзінiң устағҷызы полған. 2017 чылдаң пасти профессиональнай марығларда сыбыра сыйыхтығ орыннарға турысхан.
Татьяна Медведева Хакас гимназиязын 2000 чылда тоосхан. Ол ӱгренчеткен тустох пасха хан тiллерiне хынған, соонаң ол аның профессиязы пол парған. Хакас хазна университедiн «Англия паза немец тiллерiнiң ӱгретчiзi» специальностьча тоозыбысханда, Татьяна Юрьевна, iкiнҷiлебин, ӱгренген гимназиязынзар тоғынарға айланған.
Татьяна Медведева – пӧзiк квалификация категориялығ ӱгретчi. Гимназияда 2005 чылдаң тоғынған. Ол пасха хан тiллерiнiң методика пiрiгiзiнiң устағҷызы полған, соонаң наука-методика тоғызынҷа директор орынҷызына турғызылған. Iдӧк ол «Альтаир-Хакасия» чайаачы олғаннарнаң тоғынарынҷа республика кiнiнең устаан.
2021 чылда Татьяна Юрьевнаның ӱгренҷiзi англия тiлiнҷе ЕГЭ-да 100 балл алып алған. Аның ӱгренҷiлерi марығ-олимпиадаларның сыбыра призерлары паза чиңiсчiлерi полчалар.
Амғы туста Н.Ф.Катановтың адынаң Хакас национальнай гимназияда iстенчеткен пасха хан тiлi ӱгретчiлерi аразында улуғ опыттығлар даа, чиит специалисттер дее пар.
Людмила Сагоякова 1979 чылда, ӱгретчiлер институдын тоозып, Абазадағы 5 № ортымах школазар тоғынарға ызылған. Хакаc национальнай школада 1988 чылдаң iстенiп пастаан. Пастап воспитатель тоғызын толдырған, соонаң англия тiлi ӱгретчiзiне алылған. Ол школадаң олғаннарны тӧрт хати сығарған (1994, 2001, 2006 паза 2011 чылларда).
Аның ӱгренҷiлерi англия тiлiнең муниципальнай паза республика синiнде ирткен марығларның призёрлары паза чиңiсчiлерi полчалар. Людмила Гавриловна позының тоғызында наука-iстезiгліг тоғысха улуғ хайығ салча. Аның ӱгренҷiлерi, англия паза хакас тiллерiнiң тӧӧй паза пасха сариларын iстезiп, наука тоғыстарын толдырчалар. Iди 2019 чылда аның 9 класстағы ӱгренҷiзi «Сопоставительный анализ некоторых языковых категорий родного и изучаемых языков» наука-iстезiгліг тоғызын тимнеп, В.И.Вернадскийнiң адынаң чииттернiң тиксi Россия марииның призеры полыбысхан.
Людмила Гавриловна Россия Федерациязының ӱгредiг министерствозының Аарластығ пiчиинең таныхтатхан (2006 ч.), «Россия Федерациязының тиксi ӱгредиинiң Аарластығ тоғынҷызы» ат пирiлген (2012 ч.).
Елена Боргоякова iдӧк пӧзiк квалификация категориялығ ӱгретчi, ОГЭ салтарларын сыныхтирынҷа эксперт комиссиязының араласчызы полча. Хакас гимназиязында 2011 чылдаң тоғынча. 2018 чылда Хакасияның ӱгредiг паза наука министерствозының Аарластығ пiчиинең таныхтатхан.
Елена Петровнаның ӱгренҷiлерi англия тiлiнең республика паза Россия синiндегi наука-практикалығ конференцияларның, марығларның паза олимпиадаларның чиңiсчiлерi полчалар. Гимназияда тоғынчатхан тусха олғаннарны iкi хати сығарған: 2018, 2022 чылларда.
Сом Хакас гимназиязынаң
Автор :
Владимир Идимешев, методика пiрiгiзінiң устағҷызы
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
