Чуртас-экономика сурығларын ӱзӱрібіскеннер
10.09.2025
Хабарлар
Тоғазығ тузында
Тоғазығ. Хакасия пазы Валентин Коновалов Россияның Хазна Думазының депутады Анжелика Глазкованаң паза халыхтар деятельі Николай Платошкиннең тоғасхан
Анжелика Глазкова Хазна Думазының депутады, хазна пӱдіриинҷе паза законодательствоҷа комитедінің араласчызы полча. Николай Платошкин – тархын наукаларының докторы, дипломат, «Наа социализм ӱчӱн» чӧрімнің лидері. Олар пістің республиказар тоғыс чорығынаң килгеннер.
Валентин Коновалов аалҷыларнаң, тоғазып, чоох алызып алған. Ол республиканың чуртас-экономиказы тилізінеңер паза пар сидіксіністердеңер чоохтап пирген.
– Санкциялар хыза пасчатхан паза экспортха кӧстегліг отрасльларда сидіксініcтер сығысчатхан даа полза, піс холларыбыс пос салып одырбинчабыс, – таныхтаан Хакасия пазы. – Пастағы чарым чылның салтарларынҷа пістің тиліс саринаң хомай нимес кӧзідімнер. Піс промышленность ӧзізінҷе Сибирьде пастағы орынға сығып алғабыс, пістің аал хонии ӧсче, уғаа чахсы ӧзіc хаалағлары пӱдіріг отрасльында – 39,7 процентке, чурт пӱдіриинҷе – 34 процентке.
Валентин Коноваловтың искіриинең, ӧӧн отрасльларның (хара тас паза алюминий) кӧзідімнерін санға албаза, республика прай кӧстеглерҷе алнынзар хаалапча. Хакасия ідӧк национальнай проекттерде паза хазна программаларында ӧткін араласча. Аның сылтаанда республикада чоллар, социальнай объекттер пӱдірілче паза тыхталча, дворлар, парктар паза скверлер иптелче. 2019 чылдаң сығара ол кӧстеглерге федеральнай бюджеттең кірчеткен ахча сині 7,5 хати ӧс парған.
Россияның Хазна Думазының депутады Анжелика Глазкова паза халыхтар деятельі Николай Платошкин федеральнай синде хабазығ кирексiпчеткен сурығларны пӧгерінде Хакасияа прай саринаң полызарға кӱстенчелер. Аның ӱчӱн Валентин Коновалов оларға улуғ алғызын читірген.
Аалҷылар пос саринаң Хакасия правительствозының кӱстенізін таныхтааннар. Николай Платошкин хара тас отрасльынаң палғалыстығ сидіксіністер тиксі хазнада пар тіп чоохтаан.
– Пу сурығҷа, піс пілчебіс, Сірер Россия президентінең паза энергетика министрінең чоохтасхазар, – таныхтаан Николай Платошкин. – Чарыда чоохтаза, Хакасияның устағ-пастаа хара тас отрасльы предприятиелерін, хайда республика чуртағҷылары кӧп істенчелер, ал халар ӱчӱн ӧткін кӱресче. Аның ӱчӱн кізілер сірерге алғыстарын читірерлер.
Хазна Думазының депутады Анжелика Глазкова часхызын Хакасия пазы Валентин Коноваловнаң тоғасхан соонаң Россияның энергетика министрінің орынҷызы Дмитрий Исламовнаң тоғазығ иртіргенінеңер чоохтап пирген. Анда Хакасиядаң хара тасты сығара тартарынаңар чоох партыр.
– Ол андада хара тасты сығара тартары хоостыра чӧптезіглер иділер тіп ізендірген, – чарыт пирген Анжелика Егоровна. – Амды, хайди піс кӧрчебіс, ол тоғыс апарылча, кирек сала оңдайлан парған.
Валентин Коновалов, сидіксіністер пар даа полза, Хакасияда хара тас аныпчатхан предприятиелернің пірдеезі чабылбаан тіп искірген. Хайзы разрезтерде хара тас аниры сала тӧбін тӱс парған, аның сылтаанда тоғынҷыларның чардығы отпускка ызылған. Че піреезі хара тас анирын ӧскірібістір.
– Пастағы чарым чылның салтарларын алза, пістің хара тас анирынҷа тиксі ӧзіс читі процентче полар, – искірген Хакасия пазы.
Россияның халыхтар деятельі Николай Платошкин ідӧк Хакасия правительствозын чылығ паза чарытхы тарифтерін тың ӧскірбинчеткен ӱчӱн махтаан. Валентин Коновалов, тиксі хазнаны алза, піcтің тарифтер иң тӧбіннернің санында полча тіп таныхтаан.
– Тарифтер сын поларға, андар иртіре хорадығлар кирілбеске кирек. Ол Хакасия правительствозының паза минің позымның алыстырылбас сағыс-кӧрізі, – теен регион устағҷызы.
Сом r-19.ru cайттаң
Автор :
Альберт Толмашов
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
