Сергей Шойгу – Хакасияда
03.09.2025
Хабарлар
Сергей Шойгу Валентин Коноваловнаң хада
Ӱлгӱ. 31 орғахта Хакасиязар тоғыс чорығынаң Россияның Безопасность чӧбінің хачызы Сергей Шойгу кил парған
Хакас чирінзер Сергей Кужугетович Саяногорсктағы алюминий заводының 40 чыллығ пайрамы хоостыра килген. Пу танығлығ кирек алюминий отрасльына ла нимес, тиксі РУСАЛ компанияның тархынына танығлығ полча – тилекейдегі алюминий сығарчатхан иң килкім компанияларның пірсі полчатхан РУСАЛ-ның чолы пу предприятиедең пасталған.
Олар Хакасия пазы Валентин Коноваловнаң хада Хакас алюминий заводының электролизнай паза литейнай пӧліктерінде, Саяногорсктағы алюминий заводының опытно-промышленнай комплексінде пол килгеннер, алюминий сығарызының мыннаң мындархы тиліс чолларын паалааннар.
Сергей Шойгу предприятиенің тоғынҷыларын САЗ-ты тузаланысха киргенінең сығара 40 чыл толчатханынаң алғыстаан, металлургтарға республикаа паза Россияа туза ағыларында тіспен істенчеткен ӱчӱн алғызын читірген.
– Пу чыллар аразына завод ӧс парған, аның наа паза амғы тусха килістіре технологиялары пар. Ол технологиялар пістің хазнада ла нимес, тиксі тилекейде иң чахсылар, неке. Завод пос тилізін узаратча, анзы тың ӧріндірче, – таныхтаан Сергей Шойгу.
Ідӧк тоғыс чорығы тузында Россияның Безопасность чӧбінің хачызы регион устағҷызынаң хада Сибирьні паза Хакасияны тилітчең оңдайларны ӱзӱрібіскеннер: чуртас-экономиканаң, национальнай безопасностьнаң палғалыстығ сурығларға паза пасха даа темаларға теелгеннер.
Хакасия пазы Сергей Кужугетовичке пiстiң республикаа хайығ салчатхан, социальнай сурығларны пӧгерінде полысчатхан паза регионның пастағларына хабасчатхан ӱчӱн алғызын читірген.
– Хакасия турғызылған пӧгіннерні толдырарға тимде: пістің регионны тилідеріне, аның чуртағҷылары чахсы чуртирына прай кӱзібіс саларбыс, – таныхтаан тоғазығ тузында Валентин Коновалов.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
