Хакасияның таңдағызын СВО Матырлары тӧстирлер
03.09.2025
Хабарлар
«Хакасия матырлары» проекттiң араласчылары паза кӧстегҷiлерi
Проект. Пiлiс кӱнiнде Хакасияның студенттерiнең паза ӱгренҷiлерiнең хада парта кистiне iдӧк «Хакасия матырлары» региондағы проекттiң араласчылары одырғаннар
Россия президентi Владимир Путиннiң чахиинҷа тӧстелген «Матырлар тузы» федеральнай программа хоостыра, хазнаның прай регионнарында ӧнетiн чаа операциязының араласчылары паза ветераннары санынаң устағҷылар тимнир проект чуртасха кирiлче. Олох федеральнай программаҷа республикада «Хакасия матырлары» проект пӱӱл тоғын сыххан. Анда ӧнетiн чаа операциязы зоназынаң айланчатхан чааҷылар араласчалар.
Проекттiң ӧӧн пӧгiнi – СВО араласчылары паза ветераннары санынаң хазна паза муниципальнай устағ системазына, ідӧк регионны тилідеріне кирек пасха даа сфераларҷа чахсы устағҷылар командазын тимнирі.
Ол пӱӱл чыл пасталғанда тимнел сыххан. Анда аралазардаңар 80 азыра сурыныс пiчии кiрген. СВО араласчылары паза ветераннары эссе пасханнар, соонаң интернет пастыра тест ирткеннер, психологнаң чоохтасханнар паза даа пасха сыныхтағлар полғаннар. Олар ам кадрлар резервiнде полчалар.
Ӱгредiг Н.Ф.Катановтың адынаң Хакас хазна университедiнде иртер. Олар «Государственное и муниципальное управление. Герои Хакасии» программаҷа пiлiс аларлар. Программа 514 часха кӧрiл парған. Аны проект араласчылары пiр чыл иртерлер.
Ӱгредiгнi маңнаныстығ тооссалар, диплом аларлар паза республиканың хазна учреждениелерiнзер тоғысха алыларлар.
Ӱгредiг тузында проект араласчылары тӧрт практика модульын иртерлер, полғаны ла 10 кӱнге кӧрiл парған. Пастағызы – «Хазна политиказы паза хазна устанызының системазы»; iкiнҷiзi – «Экономика паза финанстар»; ӱзiнҷiзi – «Региональнай паза муниципальнай устаныс». Пу модульда диплом тоғыстарын тимнирлер, ӱгренчеткен полған на кiзiнiң алынҷа кӧстегҷiзi полар. Тӧртiнҷi модульда амғы наа технологияларнаң тоғыста тузаланарға ӱгренерлер.
Iдӧк пу халғанҷы чардыхта диплом тоғыстарын арачылирлар. Ӱзiнҷi паза тӧртiнҷi модульларда проект араласчыларына министерство-ведомстволарның устағҷылары, специалисттерi чахсы хабазарлар.
Кӧзiдiмге, «Хакасия матырлары» проекттiң араласчызы ӱгредiг кӧстеен таллап алза, ол регионның ӱгредiг организацияларынзар чӧр турар, тоғазығларда аралазар, аал хониин таллап алза, хыраларзар сығар, аал хонии предприятиелерiнҷе чӧр турар паза даа пасхазы. Таныхтирға кирек, ӱгренчеткен туста проект араласчыларына кӧстеглерiн алыстырыбызар оңдай пирiлче. Ӱгредiг очнай, заочнай оңдайларҷа, iдӧк ырахтын апарылар.
Проект араласчыларының кӧбiзiнiң спорт, чурт-коммунальнай хоных, аал хонии кӧстеглерi хайиин тартхан. СВО пасталар алнында кандидаттарның кӧбiзi пу кӧстеглерде iстенген осхастар, аннаңар, улуғ даа полбаза, опыттары пар. Аннаң пасха гражданскай арачыланысча, сағыбаан саайлар киректерiнҷе паза ӧрттер полдыртпазынҷа кӧстеглернi таллап алғаннар парох полғаннар. Кӧп нимес кiзiнiң чир-чайаанны хайраллирында паза ӱгредiг киреенде постарының кӱстерiн сынап кӧрерге сағыстары пар.
Пiлiс кӱнiнде проект араласчыларына пайрамнығ линейка иртiрiлген. Анда оларзар Хакасия пазының орынҷызы Татьяна Курбатова айланған.
– Ӧнетiн чаа операциязы ирткен орыннарда сiрер постарыңны турыстығ кӧзiт пиргезер, ам мында, ӱгредiгде, сiрерге iдӧк сыдамахтарың кирек полар. Ӱгредiг программазын чахсы иртiбiзер ӱчӱн, сiрерге iдӧк чапчаң паза тирең сағыстарың киректелер. Че сiрер ағаа тимдезер тiп сағынчам, – таныхтаан Татьяна Курбатова.
Танығлығ линейкада проект араласчыларына ӱгредiгде киректелчеткен ниме-ноо сыйлалған.
«Хакасияның матырлары» региондағы проект «Матырлар тузы» федеральнай программа хоостыра тӧстелген, хайзы хазна президентiнiң пастаанҷа чуртасха кирiлче. Россияның кӧп регионы ағаа хозылған. Iди «Пӱрӱт чирiнiң матырлары», «Ханты-Мансийсктiң матырлары» паза даа пасха регионнарда проекттер пар.
Сом Станислав Побеляевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
