Кӧстег – табығларны пӧзік синде иртірібізері
03.09.2025
Хабарлар
Штаб чыылиинда ӧӧн сан пиріснең Хакасияның Табығ комиссиязының кнезі Александр Чуманин (ортызында) чоох тутхан
Табығлар-2025. 29 орғахта Хакасия правительствозында Валентин Коноваловтың устаанынаң табығларға тимненерінҷе паза аны иртірерінҷе штабтың чыылии ирткен
Республикадағы орындағы пос устаныс органнарынзар 14 ӱртӱнде 2025 чылда иртер табығларға тимненіс штабының алғым чыылиинда министрлер, республиканың Табығ комиссиязының, Хакасияҷа МВД-ның, Росгвардияның, МЧС-тың, республика прокуратуразының устағҷылары паза видеопалғалыс пастыра муниципальнай пӱдіcтернің кізілері араласханнар.
– Пӱӱл табығлар прай даа муниципальнай пӱдістерде иртерлер, – таныхтаан Хакасия пазы Валентин Коновалов, чыылығның тоғызын пастап. – Оларның аразында иң килкімі – Харатас город пазына табығлар.
Пірге ӱн пирҷең кӱнге тимненіс хайди парчатханынаңар иң пастап Хакасияның Табығ комиссиязының кнезі Александр Чуманин сан пиріс иткен. Аның искіриинең, республикада 123 табығ кампаниязы иртер. 12 табығ кампаниязы, кандидаттар читкіҷе полбаан сылтаанда, соона чылдырылған. Пу табығларда 189 муңҷа табығҷы ӱн пирер праволығ полча тіп таныхтаан Табығ комиссиязының устағҷызы. Табығҷыларға, аарластығ сылтағлар пар полза, азынада ӱн пирҷең оңдай пар – ӱртӱн айының 3-ҷі кӱнінең сығара 13-ҷі кӱніне теере. Андағох право ыраххы паза чидіп аларға сидік полчатхан ааллар чуртағҷыларының пар.
Табығ бюллетеньнерін хығырчатхан комплекстернең (КОИБ-тар) пӱӱл Харатас город пазына табығларда ла тузаланарлар. Хакасияның Табығ комиссиязы чарадии хоостыра КОИБ-тар Харатастың 42 табығ участогында турғызылар.
Участковай табығ участоктарының 77%-інде видео пастыра сыныхтағда тутчаң системалар турғызыл партыр. Табығҷыларны иртер табығларның оңдайларынаң таныстырары кибірли СМИ-лар, Интернет сетьтері пастыра паза чарыдығлығ пічіктер полызиинаң апарылча. Прай даа табығ участоктары Пірге ӱн пирҷең кӱнге тимде осхастар. Олох туста Александр Чуманин 14 табығ кампаниязын иртіреріне ахча табар сурығ пӧгілгелек тiп таныхтаан.
– Прай муниципальнай пӱдіcтернің пастарына паза Хакасияның финанстар министерствозына чахығ – ахча суриин пӧгібізерге, – пӧгін турғыс салған сах мындох Валентин Коновалов.
Алынҷа хайығ – ӱн пирерге килген табығҷыларның чуртазына хорғыс чох поларына. Хайди искіргеннер Хакасияның МВД паза Росгвардия устағ-пастаа кізілері, 10 – 14 ӱртӱнде республикада оперштаб тоғынар. Дежурство тоғызын апарарына кӱс структураларының 1000 тоғынҷызы тартылар, ол санда МВД тоғынҷылары, росгвардиядағылар паза частнай хадағ пірігістерінің кізілері. Табығ участоктары хараа-кӱнӧрте хадағда поларлар.
Ӱн пиріс тузында тимір ниме-нооны таапчатхан приборларнаң тузаланарлар паза кізілерні сыныхтирын тыыдарлар. Росгвардиядағылар ОМОН тоғынҷыларынаң хада табығ участоктарын азынада сыныхтап пастабысханнар – оларда чара чачырас ниме-ноозы чох полары хоостыра. Ідӧк тигірде БПЛА-лар чох поларын сыныхтағда тударлар.
Кізілернің чуртазына хорғыс чох поларына Россияның Хакасияҷа МЧС устаа саринаң ідӧк тоғыс апарылча – ӧрт сығыспас сурығларҷа.
Штаб чыылиинда чарытхы паза палғалыс, ол санда интернетче, ӱзілбин пирілеріне хайығ салылған. Хайзы муниципальнай пӱдістерде табығлар иртер орыннарда, ӧӧнінде школаларда паза СДК-ларда, алымнар ӱчӱн чарытхы ӱзе пазыларынаң хорғыс пар тіп искірілген. Че прокуратурадағылар табығлар тузында андағ ниме полбас тіп ізендіргеннер, анзына чарытхы пирчеткеннерге сизіндіріглер пиріл парар осхас. Хакасия пазы Валентин Коновалов республика правительствозы саринаң ол сидіксіністі хайығда тударға паза пӧгеріне хабазарға чахығ пир салған.
Штаб араласчылары халыхтар сыныхтаа тоғызын тимниріне алынҷа хайығ салғаннар. Халыхтар сыныхтағҷылары ӱн пиріс сын оңдайнаң паза сайбағлар чох парчатханын кӧрерлер, олар полған на муниципальнай пӱдісте тоғынарлар.
– 14 ӱртӱндегі табығлар пӧзік тимненістіг синде ирт парарға кирек, – салтарлар идіп, пӧгін турғысхан Хакасия пазы Валентин Коновалов. – Хакасия чуртағҷылары истіг паза хорғыс чох оңдайларда ӱн пирерге киректер.
Cом Дмитрий Сунчугашевти
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
