Ӱгредiг чылы алнында пайрамни азылған
03.09.2025
Хабарлар
Нааҷылалған информатика кабинедiнде Вера Власова школада тоғынған чылларны сағысха кирген
Нацпроект. Ирткен неделяда Ағбандағы 30 № ортымах школа тиксi тыхтағ тоғыстары соонаң пайрамни азылған. Ӱгредiг чылы пасталғалах таа полза, школаа толдыра кiзi чыылған
Школаның пайрамни азылчатханында Хакасия пазы Валентин Коновалов, республика Ӧӧркi Чӧбiнiң кнезi Сергей Сокол, регионның ӱгредiг паза наука министрi Анатолий Бутенко паза Ағбан город пазы Алексей Лёмин араласханнар.
Хаҷанох пӱдiрiлген ӱс хадыллығ тура амды саңай пасха, чарых паза иптiг пол парған. 30 № школаның туразы 1957 чылда пӱдiрiлген. Школаның тархыны, тiзең, аның алнындох пасталған, тӱрчедең ағаа 100 чыл толар. 1926 чылда Ағбан станцияда тимiр чолдағы пасталығ школа азылған. Соонаң ол пасталығ школа 30 № ортымах школаа айланған. Амды нааҷылал парған школа прай кирексiнiстерге нандырчатхан ӱгредiг учреждениезi полча. Тураның тастындағы кӧрiмi, хыры, потолок-стенелерi, чылығ пирҷең системазы паза канализациязы, чарытхы проводкалары нааҷылал парғаннар, наа кӧзенектер паза iзiктер турғызылғаннар. Iдӧк школаа наа мебель паза оборудование алылған, ибiркiзi иптел парған. Иргi школаа наа чуртас пирiлген тирге чарир, прай ол тоғыстар, «Ӱгредiг» национальнай проекттең пасталып, соонаң «Саарбахтар паза палалар» национальнай проект хоостыра узарадылып, толдыразынаң идiл парғаннар.
Школа тоғынҷыларын, ӱгренҷiлерiн паза прай килген аалҷыларны ӧрiнiстiг кирекнең алғыстап, чылығ сӧстер читiрген Хакасия пазы Валентин Коновалов:
– Пӱӱл пiстiң пис ӱгредiг учреждениезiнде тыхтағ тоғыстары апарылча, оларның ӱзi Ағбанда орныхча. Национальнай проект полызиинаң тиксi тыхтағ тоғыстары апарылған 30-ҷы школа иң пастағызын тузаланысха кирiлче. Федеральнай программаларны чуртасха кирчеткенi Хакасияның ӱгредiг учреждениелерiн нааҷылирға паза ӱгренҷiлерге амғы тусха килiстiре класстар тимнирге оңдай пирче. Мин город паза ӱгредiг учреждениезiнiң устағ-пастаан, пӱдiрiгҷiлернi толдырған тоғыстар паза тузында идiл парған тыхтағ ӱчӱн алғыстапчам. Мындағ ӧрiнiстiг паза танығлығ кирекнең прайзын алғыстапчам паза ӱгретчiлер ӧмезiне хыйға паза чайаачы ӱгренҷiлернi алғапчам. Олғаннарға, тiзең, школаа хаҷан даа чалахай кӧңнiлiг чӧрерге, наа пiлiстер алып, тилирге.
Ағбандағы 30№ школадағы тиксi тыхтаға 115 миллион салковай хорадылған, ол санда федеральнай бюджеттең – 85 миллион салковай, республика бюджедiнең – 5 миллион салковай паза город бюджедiнең – 24,5 миллион салковай.
Хакасия Ӧӧркi Чӧбiнiң кнезi Сергей Сокол пӱӱнгi кӱнде хазна пiлiстер аларына чахсы оңдайлар тӧстепче тiп таныхтаан. Iдӧк ол ӱгредiг учреждениезiнiң директорына школа тархынын хайраллапчатхан ӱчӱн алғызын читiрген.
– Ағбан городтың кӧзiдiмiнде пiс кӧрчебiс, федеральнай проекттернең орта тузаланза, оларның салтарлары уғаа тӱзiмнiг полчалар. Пӱӱнгi кӱнде хазна ӱгредiг киреен пӧзiк синге кӧдiрерiне чахсы оңдайлар пирче. Таныхтирға кирек, 30 № школаның тархыны уғаа пай, аның тархынын паза атмосферазын хайраллап алғаны чахсы, аның ӱчӱн школа директорына улуғ алғыс, ол тыхтағ тоғыстары тузында дизайн сурығларынҷа чахсы хабасхан. Амды мында ӱгренерге дее, пiлiстер пирерге дее прай саринаң чахсы полар, – теен Сергей Сокол.
Алғыстас сӧстерi читiрiлген соонаң школа ӱгренҷiлерi улуғ нимес концерт кӧзiткеннер. Анаң тиксi тыхтағ тоғыстарын апарарына хабасхан кiзiлернi таныхтааннар. Хакасия правительствозының алғыстас пiчiктерiнең таныхтатханнар: Ағбандағы 30 № школаның директоры Андрей Колоухов, Ағбандағы 2 № школаның директоры Наталья Верпета, «Енисейстройсервис» ООО-ның директоры Евгений Бабухов.
Iдӧк Ағбан город устағ-пастааның алғыстас пiчiктерi читiрiлген: «Агростройсервис» ООО-ның ӧӧн директоры Руслан Ерофеевке, «Агростройсервис» ООО-ның тоғыс производительi Сергей Орленкоға, «Контроль» ООО-ның директоры Антон Журавлёвха. Прай алғыстас сӧстерi паза сыйыхтар читiрiлген соонаң школа директоры Андрей Колоухов, школа тархынынаңар чоохтап, аалҷыларға школаҷа экскурсия иртiрген.
Информатика кабинедiндегi электроннай доскада устағ-пастағ школаа алғыстас сӧстерiн паза чарых сағыстарын артыс салған. Ол школа тархынында халар.
Школаның пайрамни азылчатханына тынаға сых парған школа директоры Вера Власова хығыртылған. Ол школаның ӱчӱн уғаа ӧрiнген, ам даа сағыссырапчатханынаңар чоохтаан.
– Мин пу школада илееде чыл тоғын салғам, аның директоры полып 15 чыл iстенгем. Сағам директор полчатхан Андрей Колоухов минiң уғаа чахсы паза хыйға ӱгренҷiм. Аның тоғызы чахсы паза тӱзiмнiг парча, аннаңар махтабызарға сағынчам. Школа тоғызы чахсы парзын, ӱгретчiлер пӧзiк пiлiстiг олғаннарны сығарзыннар, ӱгренҷiлер хаҷан даа школаа чалахай кӧңнiлiг чӧрзiннер, – чоохтаан Вера Власова.
Школа тиксi тыхтағ соонаң наа ӱгредiг чылына тимде. Олғаннарға наа пiлiстер пирерге паза оларны чайаачы даа чидiглерге читiрерге тимде. Мында школа тархынының наа страницазы пасталча, хайда ӱгренҷiлернiң наа чидiглер паза чиңiстер полар.
Сом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
