Ӱлгӱ. Хакасия пазы Валентин Коновалов паза Ӧӧркi Чӧп кнезi Сергей Сокол чыылығ иртiргеннер.

Хакасияда туризм – ӧӧн cфераларның пiрci. Аның тилiзiн республика ӱлгӱлерi 2019 чылдаң улуғ хайығда тутчалар. Тоғыс тикке парбады. Республикада чорыхчылар саны пiлдiрте хозыл парған, инфраструктура нааҷылалча, чоллар тыхталчалар. Пiр сӧснең, поғдархаҷаң ниме пар. Олох туста наа сурығлар сығысча. Чуртас пiр орында турбинча нооза.

27 орғахта Хакасия пазы Валентин Коновалов паза Ӧӧркi Чӧп кнезi Сергей Сокол, тоғазып, чыылығ иртiргеннер. Алында устағҷыларға хада-пiрге тоғынарға килiспеен. Че Хакасия экономиказында пӧгiлбеен сурығлар кӧп. Ол сылтағнаң наа оңдайлар тiлирге килiсче. Мероприятиеде iдӧк Хакасия пазының орынҷызы Юлия Исмагилова, экономика тилiзi министрi Роман Ковтун, аның орынҷызы Ольга Кузьмина паза пасхазы араласханнар. Аның тузында туризм сферазындағы чидiглердеңер паза сидiксiнiстердеңер чоох парған, таңдағызына пӧгiннер турғызылған.

Пастап чоох тутхан Валентин Олегович. Хайди таныхтаан Хакасия пазы, орындағы туризмнiң тилiзi ӧрiндiрче. Пылтыр мында iкi миллион артиинаң чорыхчы пол парыбысхан. Пӱӱл, азынада сананыстарҷа, туристтернiң саны 2,5 миллионға чит парарға айабас. Тӧлелчеткен налогтарның синi ӧсче. 2024 чылда ла туризмнең айғасчатхан предприятиелердең республика бюджедiнзер чарым миллиард артиинаң салковай кiрген. Амғы туста инвесторларнаң тоғыс ӧткiн апарылча. Ол сылтағнаң илееде проект чуртасха кирiл парған. Сидiкciнiстердеңер чоохтаза, туристтер саны ӧс сыхханда, хонҷаң орыннар чидiспинiбicкен. Культура паза чир-чайаан хумартхыларына хорғыс поларынаң чочыныс пар.

Cергей Сокол Валентин Коноваловтың чооғынаң чарасхан. Пӱӱнгi кӱнде хара тас аныпчатхан разрезтернiң паза металлургия заводтарының парыстары тӱс парған. Россиядаң тоғыр кирiлген хатығластар харығ полчалар. Туризм Хакасияның тиксi экономиказын кӧдiр парыбызар оңдайлығ. Пiстiң республика туристтернiң хайиин тартчатханда, авиарейстер санын хозарға, аэропортты нааҷылабызарға киректелче. Ӧӧркi Чӧп правительстваа хабазарға тимде. Наа законнар туризм сферазында iстенчеткеннернiң тоғызын нииктирге киректер.

Iдӧк чыылығ тузында 2022 чылда алылған Туризмнi тилiдерiнҷе стратегиязар алызығлар кир саларынаңар, музейлерге хабазарынаңар, турист кiннерiнiң тоғызын чахсыландырарынаңар, Хакасияда иртчеткен культура пайрамнарына хайығ тартарынаңар чоох парған. Тоғазығ тӱзiмнiг ирткен. Валентин Коновалов паза Сергей Сокол аннаң андар, хада-пiрге тудынып, тоғынарға пӧгiнчелер.

Cом Дмитрий Сунчугашевти

Сомда: Сергей Соколнаң Валентин Коновалов