Тоғазығ. Пу наада Хакасия пазы Валентин Коновалов «Тиксi Россиядағы студенттернiң арачылағҷы корпузы» тиксi Россия чииттерiнiң халых организациязы устағҷызы Евгений Козеевнең тоғасхан.

Евгений Козеев iдӧк Россияның Халыхтар палатазының араласчызы полча. Ирткен тоғазығда Хакасия пазы Евгений Козеевнең чииттер политиказынҷа паза регионда волонтёрларның тоғызын алғыдарынҷа хада-пiрге тоғынардаңар чӧптезiгде хол салыбысханнар.

Чӧптезiг идiл парған соонаң Валентин Коновалов сӧс алған:

– Пӱӱнгi кӱнде студенттернiң арачылағҷы корпузы пiстiң республикада Олимп резервi училищезiнде орныхча. Анда сағыбаан саайларны чох идерiнең айғасчаң, ӧрттернi ӱзiрҷең специалисттернi тимнепчелер. Ол корпустың араласчылары республика паза хазна синiнде иртiрiлчеткен чӧрiмнерде, мастер-класстарда сыбыра араласчалар. Iдӧк олар ӧрт ӱзiрҷеңнерге полысчалар паза волонтёрлар полып тоғынчалар. Пӱӱл кӧрiк айында пiстiң студенттерiбiс тиксi Россиядағы студенттернiң арачылағҷы корпузынаң хада Хара талай хазын мазуттаң арығлааннар.

Хакасия пазы чоох тутхан соонаң Евгений Викторович чыылған улуссар айланған:

– Пӱӱнгi чӧптезiг идiл парғаны региондағы волонтёрларның тоғызына наа тыныс пирер тiп сағынчам.

Чоохтирға кирек, тиксi Россиядағы студенттернiң арачылағҷы корпузы хазнабыстың 88 регионында орныхча. Прай 260 андағ отряд тоғынча. Олар пӧзiк паза профессиональнай ӱгредiг учреждениелерiнде орныхчалар. Прай сигiс муң азыра волонтёрны пiрiктiрчебiс. Пiс саннарны сӱрiспинчебiс. Пiстiң корпуссар чииттер чуртас кӧрiзi хоостыра килчелер. Пӱӱнгi кӱнде пiс тиксi хазнаҷа пастағы полызығ пир полчатхан пiр муңа чағын специалист тимнеп салғабыс. Олар сағыбаан саай тузында МЧС-ха хабас поларлар. Ростов городта орныхчатхан базабыс, СВО наа ла пасталғанда, чонға гуманитарнай полызығ пирерiнде ӧӧн кiн пол парған. Анда пiстiң волонтёрларыбыс Чон фронтынаң хада тоғынғаннар. Ол кiнде ам даа 200 кiзi хараа-кӱнӧрте улуғ тоғыс апарча.

Хайди таныхтаан Евгений Козеев, Хакасиядағы арачылағҷы корпузының чииттерi тиксi хазна синiндегi ӱгредiглерде аралас турарлар. Паза аның араласчылары аразында республиканың чииттер политиказына, МЧС-ха наа кадрлар таап аларға чарир.

Хакасияның спорт министрiнiң тоғызын толдырчатхан Дмитрий Сафронов, сӧс алып, пӱӱнгi кӱнде Олимп резервi училищезiнiң (техникумының) 58 студентi арачылағҷы корпузына кiрче тiп искiрген. Аның чооғынаң, арачылағҷы корпузында аралазып, чииттер пiлiстерiн алғытчалар. Iдӧк ГО, ЧС паза ПБ-ҷа хазна комитедiнең пик палғалыс тутчалар. Кадрлар алысчатханы студенттернiң ӱгренiзi тоозылғанынаң палғалыстығ.

Iдӧк Дмитрий Валентинович чыылығ тузында арачылағҷы корпузының араласчылары СВО-зар гуманитарнай полызығ ызарына сыбыра хабасчалар тiп искiрген. Ооллар, гуманитарнай полызығ чыылчатхан пунктсар пос кӧңнiнең килiп, чон тимнеен прай ниме-нооны улуғ фуразар тазыпчалар. Амды идiл парған чӧптезiг республикада орныхчатхан корпусха наа чоллар азарға полызар.

Сом Дмитрий Сунчугашевти

Сомда: Валентин Коновалов паза Евгений Козеев хада-пiрге тоғынардаңар чӧптезiгде хол салыбысханнар