Пiлiс кӱнiне. Чайғы тынағ тузы ирт парды. Ӱгренҷiлер аразында наа ӱгредiг чылы пасталарын пастағы классха парчатхан олғаннар чидiкпин сахтапча поларлар. Евгений Костяков паза Арина Тюренёва пӱӱл пастағызын на школа иркiнiн алтирлар.

Женя Ағбандағы 24 № школазар 1 А классха парар. Аның алнында ол «Ивушка» олған садынзар «Смешинка» группазар чӧрген. Оолах школаа парарға тимде, ол iҷезi Татьяна Тютюбееванаң хада ибде сан санирға паза букварьдағы букваларны ӱгренген. Городча пас чӧрчетселер дее, олар саннарны хозарға-аларға ӱгрен турғаннар.

Школаа, наа арғыстарына кӧнiк парыбызарына iкiнҷiлес чоғыл. Женя улуғларның чооғын исче, пасха олғаннарнаң даа оой тiл алызып алча. Олған садындағы воспитательлер аны тӧремiл махтап турғаннар. Iҷезi дее аны ибде позына хаҷан даа полысча тiп таныхтапча. «Iҷең, нименең полыс пирим?» – оолахтың ӧӧн сурии. Ол ибде поллар сыбырча, тӧзектi иптепче, аҷазына даа полысча. Паза ол iҷезiнең хада плине идерге хынча. Тесто идерге кирек ниме-нооны тимнеп салза, Женя аны пилен иде пулғап пирче. Анаң тадылығ чиистi iкӧлең хаарчалар.

Пастағы класс ӱгренҷiзi школаа парчатханына ӧрiнче. Олған садында ол «Ӧрчiлiг пластилин» кружокка хынып чӧрген. Школаа кӧнiгiбiссе, iҷезi аны кӱрес секциязына пирiбiзер сағыс тутча. Ӧткiн оолағас анда даа нанҷылар таап алар.

Арина андағох ӧткiн хызыҷах. Ол Ағбандағы 11 № школазар 1 В классха парар. «Дашенька» олған садын тоосхан хызыҷах спортнаң айғасча – 6 частығдаң сығара кии гимнастиказы секциязынзар чӧрче. Iдӧк ол теелбектенерге паза сарнирға уғаа хынча.

Аринаны iҷезi Сарима Тюренёва школаа тимнир ӧнетiн занятиелерге ал чӧрген. Амды ол санап полча, хығырча – пiр сӧснең, школада пiлiстер аларға тимде. Iдӧк ол англия тiлiне чӧрген, пасха хан тiлiн ӱгренерге ағаа хынығ пiлдiрген. Олған садында хызыҷах аймах марығларда ӧткiн аралас турған, ол санда «Дошколёнок» марығда сыйыхтығ орынға турысхан.

Ибде ол iдӧк iҷе-пабазына полысча. Арғыстарынаң ойнапчатса даа, чапчаң хайыныбысча. Арина, Женяох чiли, таныс таа нимес олғаннарнаң табырах пiр тiл алызып алча. Аннаңар класста пасха ӱгренҷiлернең ынағлазарында сидiксiнiс чох поларға кирек. Позы Арина саңай пистерге ӱгренерге паза школаның чуртазында хайди даа аралазарға кӱстенербiн тiп таныхтапча.

Хакасияда пӱӱл пастағы классха 5,5 муң азыра пала парча. Тиксi 2025-2026 ӱгредiг чылында республика школаларында 78 муң азыра ӱгренҷi парталар кистiне одырар.

Сом Илона Каковани

Сомда: Аринаҷахнаң Женяҷах 1-ғы классха парарға тимделер