Сын театр, сын ойын
22.08.2025
Хабарлар
«Читіген» театрның артисттері – Москвада
Культура. Хакасияның «Читiген» национальнай театры Москвада ирткен чоннар аразындағы «Театр бульвары» фестивальда араласты. Анда республиканың артисттерi драматург Илья Топоевтiң «Ахол» ойынын турғысханнар
Пастағызын «Театр бульвары» фестиваль 2024 чылда ирткен. Ол Москва чуртағҷыларының паза аалҷыларының кӧңнiлерiне тың кiрген. Анда читi площадка тоғынған, 480 ойын турғызылған. Фестивальда 600 муң азыра кiзi пол парыбысхан. Ӱндезiглер кӧп полғанда, аның тӧстегҷiзi – Москва городтың культура департаментi – пӱӱл фестивальны алғыдыбызарға чаратхан.
Iди «Театр бульвары» чайғының пастағы кӱнiнең тоғынып пастаан, тоозылар, тiзең, орғахтың халғанҷы кӱннерiнде. Аннаңар пу чайғызын хазнаның ӧӧн городы, Москва, театр кiнiне айлан парған тирге чарир. Пӱӱлгi «Театр бульвары» тилекейде иң ӱр иртчеткен фестиваль пол парған! 92 кӱн аразына 300 театр 14 площадкада 600 ойын кӧзiткен!
Фестивальны иртiрчеткен Москва городтың культура департаментi фестивальда аралазар театрларның аразында таллағ иртiрген. Ойыннар тасхархы сценаа килiстiре полчатханы санға алылған. Фестивальда хазна кiнiнiң театрлары иң кӧп араласханнар. Национальнай театрлардаң Хакасия паза Чечен театрлары ирт парыбысхан. «Читiген» национальнай театр чорыхха чылның пастағы чардығындох тимненiп пастабысхан. Мына ӱр ниместе «Патриаршие пруды» парктағы сценада «Ахол» ойын турғызылған.
Москваның чуртағҷылары хакас театрның артисттерiнiң узын, кибiрлiг кип-азаан, cарыннарын, ойында кӧзiдiлген хакас чонның культуразын пӧзiк паалааннар. Аннаң пасха, ГИТИС-тың ректоры Григорий Анатольевич Заславский ойын соондағы ӱзӱрiгде «Читiген» театрға пӧзiк паалағ пирген.
– Кӧрiгҷiлер пiстiң ойынға морсынғанынаң «Читiгеннiң» артисттерi Хакас чирiн сабландырчалар тирге чарир. Олар пiстiң театрны сын театр тiп таныхтааннар, хайзы пос кибiрлерiн тут парча.
Кӧрiгҷiлер аразында, тiзең, Москвада чуртапчатхан чир-суғҷыларыбыс кӧп полғаны ӧрiнiстiг. Олар хакас тiлiн, кӧӧн истiп алар ӱчӱн ӧнетiн килгеннер. Оларның кӧңнiлерi тол парғанға тӧӧй полған, – чоохтапча театр директоры Ирина Чустугешева.
«Ахол» ойынның режиссеры – Саяна Ултургашева. Иң пастап пу ойын 2008 чылда турғызылған. Пу тусха теере Хакасияның артисттерi аннаң ӱсче хати Москвазар чӧр килгеннер. Критиктернiң сӧстерiнең, «Читiген» театр орта чолҷа парча. «Ахолда» хакас сарыннары, теелбектерi, костюмнары прай пар, аннаңар ол сыбыра критиктернiң махтаана турысча.
Чуртас алысчатханда, режиссер Саяна Ултургашева, кӧрiгҷiлер хайиин тартып алар ӱчӱн, ойынзар пiрее-пiрее алызығлар кирiп одырча. Улуғ нимес алызығлар пол парчатса даа, ӧӧн сағызы халча паза ӧӧн рольларны ойнапчатхан артисттер алыспинча. Ахолны, Кунаринi паза Сарығ Хысты толдырчатхан артисттер Хакасия искусствозының саблығ деятельi Олег Чебодаев, Евгения Костякова паза Хакасияның чон артизi Степанида Саможикова пастағызынаң пасти амға теере пу рольларны толдырчалар.
– Пiстiң театр – кибiрлiг театр. Пiс хаҷан даа позыбыстың кибiрлерiбiске, тайығларыбысха тудынчабыс, аннаңар ойыннарыбыста iдӧк сын ойнапчабыс. Тиктең нимес «Театр бульвары» фестивальның критиктерi пiстiң ойыныбыс ӧнетiн турғызылғанға тӧӧй полбаан тiп таныхтааннар. Пасха сӧснең, сын театр, сын ойын, – чарытча Хакасия искусствозының саблығ деятельi Олег Чебодаев.
Ойыннаң пасха, хакас театрның «Айланыс» ансамбльы мастер-класстар иртiрген. Олар фестивальның аалҷыларын хакас кӧг тирiглерiнең, сарыннарынаң таныстырғаннар.
Сом «Читiген» театрни
Автор :
Оксана Котюбеева
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
