Чон фронтының волонтёрларына улуғ аарлас
21.08.2025
Хабарлар
Чиит волонтёрларны хумартхылапчатхан мероприятиеде Кирилл Жибинов чоох тутча
Хумартхылас. Хакасияның чуртағҷылары Чон фронтының волонтерлары полған чиит оолларны хумартхылааннар. Николай Ковалёвнаң Давид Соколов Донецк Чон Республиказынаңнар. Олар чаалазығ парған орыннарның паза Россияның наа регионнарының чуртағҷыларына полысханнар
Чапай паза Тюр
Николай Ковалёв (позывной «Чапай») 2001 чылда Донецкте тӧреен. Сидiк хылыхтығ саарбах полып ӧскен, школа соонаң техникумзар ӱгренерге кiрген, че ӱгрен полбаан – тастабысхан, хомай тудыныстығ саарбахтарнаң удаа палғалыс парчатхан. 17 частығда чуртазы алыс парыбысхан, аның хыринда орта кiзi пол парған. Ол Николайны спортха тартхан, соонаң саарбах спорт-патриот ӧмезiнзер алылған. Аннаң сығара чиит оолның пасха чуртас пасталыбысхан.
2021 чылда Николай Ковалёв МЧС-та ӧнетiн ӱгредiг ирткен. Аның пiлiзi ӧнетiн чаа операциязында кирек пол парған. СВО пасталыбысханда, аның ӱлӱзi пасха кiзiлерге полызары тiп пiлiп алған Николай.
Пастағы кӱннең пасти Чапай Донецкте эвакуацияда тоғынған, соонаң – Мариупольда. Ол килген гуманитарнай таарлағларны тазыҷаң, суғ ағылҷаң, улуғ частығларға полысчаң. Пiр хати полызығ тузында совет тузында сығарылған имҷiнiң сумказына орта пол парған, ол ағаа тиктең нимес тоғас парған тiп сағын салған Николай Ковалёв. Iди чиит оол палығлат салған кiзiлерге пастағы имнег полызиин пирерге сағыныбысхан.
Тӱрче полғанда, аның сағызы тол парған – пастағы имнег полызиин пирерге ӱгренiп алып, ол, чаалазығлар парчатхан орыннарзар сығып, палығлат салған кiзiлерге полызып, оларны аннаң сығарып пастаан. Пiр хати ол, бронежиледiн суурып, аны нанҷызына пирерге иткен, ол туста пилiне осколок учух килген. Николай мындағ даа туста хормачыланарын узаратхан. Осколок пилiне хазал парғанда, ол кофтамны айастығ тiптiр. Андағ полған Николай. Андада ол хазых халған, аның хыринда полған Никита нанҷызы ағаа пастағы имнег полызиин пирген.
Николай cӧбiрелiг полған. Хонғанынаң Мариупольда танызып алған. Ол iдӧк волонтер полчатхан. Ирепчiнiң хызыҷах тӧреен. Чапай паба пол парғанына матап поғдархаҷаң. Пiреезiнең танысчатса, позывнойын адабин, «Чиит паба» тiп аданҷаң осхас.
Сӧбiрелiг дее полғанда, ол волонтер поларын тохтатпаан: Херсонда, Запорожьеде чонны чаалазығ парчатхан орыннардаң сығарҷаң. Cоонаң тактика имнегҷе инструктор полыбысхан. Пiлiстерiнең чииттернең ӱлесчең, чуртастар арачылирға ӱгретчең.
2024 чылда Николай Ковалёв Воронеж городта ирткен «Рубеж» форумда араласхан. Анда ол iдӧк чииттернi пастағы имнег полызиин пирерге ӱгреткен. Азынада таныхтирбын, анда Хакасияның чииттерi Чапайнаң танызып алғаннар паза пу тоғазығ хай пiреезiнiң чуртазын, сағызын алыстырыбысхан.
Форумда Николай Ковалёв, Курск облазында киректер аар парчатханын пiлiп алып, андар парарға сағыныбысча. Нинҷе-де ле кӱн пазынаң чиит оол пасха волонтерларнаң хада Курск облазындағы аға-ууҷаларға ааллардаң сығарға полысхан, чиис, суғ ағыл турған. 16 орғахта теестегi хати чонға полысчатханда, ыырҷының уғы ағаа тееп парған...
Давид Соколов (позывной «Тюр») 2003 чылда Макеевка городта тӧреен. Николайнаң тиңнестiрзе, Давид ибдегi пала. Кiчiгдең ала тоғынҷаң, иб аразында кӧп хайынҷаң. Городтағы школада ӱгренген, анаң Донецктегi хазна университедiнзер политологка ӱгренерге кiрген. Ол пабазы чох ӧскен.
СВО пасталыбысханда, Давидке 18 час полған. Пос кӧңнiнең военкоматсар парған. Атығҷы, гранатометчиктiң полысчызы полған.
Ол позының телеграм-каналын апарған. Хайда ниме полчатханын суур турҷаң, чааҷылардаң интервью пасчатхан. Ниме кӧрҷең, аны суурҷаң. Соонаң ДНР-дағы Чон фронтының ӧмезiнең танызып алған, анда СМИ-ҷа координатор полыбысхан.
Давид Соколов позының фильмiн суурыбызарға сағынған. Курск облазында материаллар чыып таа пастабысхан полған. Ол пасха кiзiлер кӧрбеен нимелернi кӧзiт пирерге пӧгiнген, че маңнанмаан. Ирткен чылда орғах айында аның чуртазы ӱзiл парған, Николай Ковалёвнаң хада.
Амды Чапайның паза Тюрның нанҷылары паза Чон фронтының волонтерлары оларның тоғыстарын узаратчалар. Олар пастағы имнег полызиин пирчелер паза пасхаларын ағаа ӱгретчелер, чаалазығ полған орыннардаң кiзiлернi сығарчалар. Николай Ковалёвтың хонғаны амды волонтер полча. Ол полызығ соонҷа айланған чуртағҷыларның сурыныс пiчiктерiнең айғасча.
Волонтёрларны хумартхылап...
16 орғахта хазнаның прай регионнарында Николай Ковалёвты паза Давид Соколовты хумартхылир мероприятиелер ирткеннер. Волонтерларға чарыдылған кӧзiдiглер, имнег киреенҷе мастер-класстар, марафоннар ирткеннер паза кинолар кӧзiдiлгеннер. Ӧӧн мероприятие, тiзең, Донецкте ирткен. Анда волонтерларға мурал пайрамни азылған.
Хакасиядағы Чон фронты iдӧк хазнаның хумартхы чӧрiмiне хозылған. Ирткен тынағ кӱнде Ағбандағы Ада чир-суубыс арачылағҷызының монументi хыринда сомнар кӧзiдии азылған.
– Чаада кiзi хырылчатcа, уғаа хорғыстығ, че мылтых чох кiзiлер ӱрепчетселер, улам аар. Волонтерларны пiс пос аразында «Ангелы добра» тiп адапчабыс. Олар тирiг чох полчалар, ыырҷаа хорғыс ағылбинчалар. Холларында имнер ле полча. Че ыырҷылар волонтерларға, гуманитарнай полызығны ағылчатханнарға, санитарларға пiр дее айабинчалар, олар чонға полыспазыннар тiп, оларны ӧнетiн атчалар.
Че регионнардағы Чон фронтының волонтерлары чорыхтарын тохтатпинчалар. Олар чааҷыларға гуманитарнай полызығны сыбыра апарчалар. Хакасиядағылар ӱр ниместе гуманитарнай полызығны апарғаннар, ам кӱскӱзiн iдӧк чорыхха сығарға тимненчебiс. Олар андар полызығ апарарынаң, анда орындағы чуртағҷыларға полызарынаң пасха, чорыхха сығар алнында гуманитарнай полызығны чыырында улуғ тоғыс итчелер. Ол тоғыс, тiзең, ниик нимес.
Пiс ам имнер, ас-тамах алчабыс. Аннаң пасха, пiстiң оолларға тактика чаа тирiглерi кӧп кирек. Улуғ алғыс республика чуртағҷыларына, олар пiске чахсы ӱндесчелер. Че чаа тирiглерi ниик турбинчалар. Пiр ле тирiг 100 муң салковайдаң аарлығ сых парча.
Я, хазна чааҷыларға полысча. Че оларға пiс ле, хазна чуртағҷылары, полысчабыс, тiгi сариндағыларға, тiзең, сала прай тилекей нимес. Аннаңар пiске ол саринаң аар пiлдiрче. Хазнаа ниик нимес. Чааҷыларға полызарынаң пасха, iдӧк тылдағылардаңар ундутпасха кирек. Ол пособиелернi, iҷе капиталын тӧлирi, чолларны тыхтиры, имнег полызиин пирерi паза даа пасха кӧстеглер. Оларға iдӧк кӧп хорадығ парча. Анзын ибдегiлер чахсы пiлерге киректер паза пiстiң оолларға полызарын тохтатпазыннар.
Хатап чоохтирға сағынчам, волонтерларның хозымы, полызии СВО-да улуғ. Кӧзiдiмге, Хакасияның чииттерi мына ӱр ниместе ле андар чӧргеннер. Чорыхнаң ОНФ-тың «Молодежказының» устағҷызы Кирилл Жибинов устаан. Чииттер, анда iкi неделя чуртап, тигiрибде тыхтағ иртiргеннер, орындағы чуртағҷыларға гуманитарнай полызығны таратханнар, аға-ууҷаларға тураларын иптееннер, – чоохтаан Хакасиядағы Чон фронтының кнезi Ксения Буганова.
Полызығлығ чорых
Кирилл Жибинов – спортсмен, гиря спортынҷа тренер, Харатастағы спорт школазының директоры. Iдӧк Кирилл халых тоғыснаң айғазарына тус таапча.
Ирткен чылда Кирилл Жибинов Воронеж городта «Рубеж» форумда араласхан. Анда ол Донецктегi волонтер Николай Ковалёвнаң танызып алған. Николай волонтерларны пастағы имнег полызиин пирерге ӱгреткен, Кирилл аны искен.
– Форумда мин ОНФ-тың гуманитарнай миссиязы парын пiлiп алғам, хайда регионнардағы чииттер, хазнаның наа регионнарынзар парып, андағы чонға полысчалар.
Пу сағыс мағаа тирең сиип парған. Iди пу чыл пасталғанда, мин чииттернi чыып пастаам. Республиканың прай даа техникум-колледжтерiн ибiр салғам. Чол, азыранары, чуртиры паза ӧнетiн кип-азах прай тикке полған. Кӧп ӱндезiг полған, че улуғлардаң. Мағаа чииттер кирек полғаннар, хайзылары пик хазыхтығ паза аар тоғысты толдыр поларлар.
Чорыхха сыхханнарның чарымы гиря кӧдiрчеткен спортсменнер, кикбоксерлар, чиит ӱгретчiлер полғаннар. Улуғ алғыс ХГУ-ның ректоры Татьяна Красноваа. Ол чииттернi чыып аларға полыс пирген, – чарытхан Кирилл Жибинов.
Наа регионнарда Хакасиядағы ооллар Николай Ковалёвтың паза Давид Соколовтың тоғызын узаратханнар. Iдӧк чонға полысханнар, туралар тыхтааннар.
Ӧнетiн чаа операциязында чааҷылар ла нимес палығладып ӱрепчелер, хабарҷылар, операторлар iдӧк тыннарын пир салчалар, ол санда волонтерлар. Волонтерларның СВО-да ӧӧн пӧгiнi – чонға полызары. Олар ыырҷаа хорғыс ағылбинчалар, оларның тирiглерi дее чох полча. Тиктең нимес оларны «Ангелы добра» тiп адап салғаннар.
Россия президенті Владимир Путин Чон фронтының волонтёрлары Николай Ковалёвты паза Давид Соколовты ӱреен соонаң Махачыланыс орденнернең таныхтаан.
Сом ОНФ-тың сайтынаң
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
