Чиңістерге кӧстегліглер
20.08.2025
Хабарлар
Тренировка тузында
Меспектіг хоккей. 15 орғахта «Саяны» команданың азых тренировказы ирткен
Пу кибірліг мероприятие. Азых тренировканы команда чыл сай иртірче. Ол хабарҷыларға паза «ағырчатхан» улусха кӧрілген. Пӧгін – тренернең чоох алызары, хоккей ӧмезінде пол парған алызығлардаңар піліп алары. Итсе, алында азых тренировка от айының ортызында иртчең. Пӱӱл «Саяны» орайға кір парды тирге чарир. Сынны чоохтаза, илееде тус «Саяны» Суперлигада ойниры ікінҷілестіг полған. Ӧӧн сылтағ – ахча чоғылы. Кӧрігҷілер Хакасияның хоккеисттері Пӧзік лиганың ойыннарында даа араласпастар тіп чочынғаннар. Республика правительствозы кӱстенізінең ахча сурии пӧгіл парған. Ӱлгӱдегілер командаа спонсор таап пиргеннер. Аннаңар иcкіргеннер 15 отта.
«Саяныда» танығлығ алызығлар пол партыр. Ӧӧн тренерге 54 частығ Николай Коноваловты турғысханнар. Николай Васильевич Новосибирсктең, меспектіг хоккейҷе Россияның спорт узы. «Сибсельмашта» ойнап, ол 1995 чылда Россияның чемпионы атха турысхан. Наа устағҷы ідӧк «СКА-Нефтяник», «Старт», «СКА-Забайкалец» командаларда ойнирға маңнантыр. Тренер чіли, ол Ильяс Хандаевнең (амғы туста Россияның піріктірілген командазының паза «Динамоның» ӧӧн тренері. – Авт.) хада меспектіг хоккейҷе Россия студенттерінің командазын Хысхы Универсиадаа тимнеен. Пістіңнер андада чиңіс тутханнар. Халғанҷы туста «Сибсельмашта» істентір.
Пілдістіг, азых тренировка тузында хабарҷыларның даа, кӧрігҷілернің дее прай хайии наа ӧӧн тренерде ле полған. Николай Васильевич, сурығларға нандырып, теен:
– Команда 50 процентке нааҷылал парар. Ӱр ниместе ӧмее Владислав Рябухин, Кирилл Кулаев паза Григорий Федоров хозылғаннар. Хоза тӧртче-писче кізі кирек. Капитан тоғызын толдырар хаалха хадағҷызы Владислав Атапин, ағаа полызар Андрей Осипенков. Мин Евгений Ткачукнаң тоғынарбын.
Тоғыс хоостыра Ағбанда пір ле хати полбаам. Мындағы пуста ойнирға киліскен, олғаннарны турнирге ағылҷаңмын. Пілчем, Хакасияда меспектіг хоккейге хынчатхан чон чуртапча. «Саянызар» тоғысха хығырғаннарында, сах андох орындағы кӧрігҷілерні сағысха киргем. Олар хоккеисттерге хаҷан даа хабазарға тимделер. Анзы махтағлығ. Пӱӱнгі кӱнде тренировкалар чирде иртчелер. Пуссар Кемеровта сығарбыс. «Саяныны» ӱс сбор сағыпча. Ооллар чиңістерге чидерге кӧстегліглер. Хомзынысха, Суперлигада 12 ле команда халды. «Байкал-Энергия» паза «Мурман» ахча чохтаңар Пӧзік лигада ойнирлар. Пасха командаларнаң тиңнестірзе, тренировкаларны орай арах пастадыбыс. Іди дее полза, ӱрӱкчең ниме чоғыл. Тренерлер паза хоккеисттер прай кӧңнілерін салып тоғынарлар.
Піс наа ойынҷылардаң Кирилл Кулаевті таныхтирҷыхпыс. Ноғадаңар? Аның пабазы Олег Кулаев ікі сезон «Саяныда» турыстыра ойнаан. 2006/2007 чылларның cезонында Олег Кулаев, Хакасия ӱчӱн турызып, Россия чемпионадында «ыырҷыларның» хаалхаларынзар 37 меспек кире сабысхан. 24 частығ Кирилл «СКА-Нефтяник-2» паза «Родина» командаларда ойнаптыр.
Амғы туста «Саяны» Россияның кубогына тимненче. Марығның пастағы чардығы 5 – 12 ӱртӱнде иртер. «Кидеркі» ӧмеде ойнирлар «Динамо» (Москва), «Ак Барс-Динамо» (Хазан), «Старт» (Нижний Новгород), «Уральский трубник» (Первоуральск), «Волга» (Ульяновск), «Родина» (Киров). «Iскеркi» ӧмеде чиңіс ӱчӱн харбазарлар «СКА-Нефтяник» (Хабаровск), «Сибсельмаш» (Новосибирск), «Енисей» (Хызылчар), «Саяны» (Ағбан), «Кузбасс» паза «Кузбасс-2» (Кемеров). Халғанҷы искіріглердең, «Iскеркi» ӧмеде ідӧк «Байкал-Энергия» (Иркутск) аралазар. Полған на ӧмеде пастағы тӧрт орынға сыххан команда Россия кубогының ікінҷі чардығында кӱс сынир.
2023 чылда «Саяны» Суперлигазар айланғанда, прайзы оңарып алған: сағынған сағыстар толча. Пӱӱл, тізең, пасха сағыс: чуртас хайхастарға пай. Хайхастарның пірcі – республика пазох меспектіг хоккейҷе Россия чемпионадының ойыннарын удурлир. Кӧрігҷілерге «Саянының» ӱчӱн «ағырарға», ағаа хабазарға паза киртінерге кирек.
Сом Дарья Слабкони
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
