Туризмні тилідерге полысчалар
15.08.2025
Хабарлар
Волонтёрлар лагерьінің араласчылары
Чир-чайаан. Шира аймаандағы «Тастығ арығ» чир-чайаан хумартхызында волонтёрлар лагерьiнің ӱзінҷі сменазы тоғынып пастады
Андағ сменаларның тоғызы Владимир Потаниннiң полызығлығ фондының стипендиялар программазы хоостыра чуртасха кирiлген. Аны хоостыра хазнабыстың саблығ вузтарының иң ӧткін студенттері ікі неделя аразына регионда хайраллалчатхан чир-чайаан паркындағы инфраструктураны иптирлер.
Хазнабыстың центральнай чардығында чуртапчатхан сигіс студент пӱӱл пастағызын на Хакасиязар кил парды. «Тастығ арығ» чир-чайаан хумартхызының тоғынҷылары аалҷыларны чылығ удурлаан соонаң оларға экскурсия иртіргеннер.
– Хакас Республика Владимир Потаниннiң полызығлығ фондынаң паза «Заповедное посольство» чир-чайаанны паза культура хумартхыларын хайраллирына кӧстегліг полызығлығ фонднаң ӱзінҷі чылы хада-пірге тоғын парир. Регион синінде чир-чайаан хайраллалчатхан орыннарзар хазнабыстың аймах регионнарының волонтёрлары кил парчатханы пісті уғаа ӧріндірче. Андағ оңдайнаң олар пістің регионға экология туризмін тилiдерге полысчалар. Мин аалҷыларға тоғыстарын тӱзімніг апарарға алғапчам. Ізенчем, Хакасияның сіліг чир-чайааны сірернің чӱрееңерні аптир паза мында полған соонаң сірер пір хатап нимес пістің чир-суубыссар айланарзар, – теен, волонтёрларзар айланып, «Дирекция ООПТ Хакасии» ГБУ РХ-ның устағҷызы Сергей Бодренко.
Ікі неделя аразына волонтёрлар лагерьінің араласчылары турист маршруттарын иптирлер, туристтер чӧрчеткен чолларны похсахтардаң, ағас салааларынаң арығлирлар. Олох арада волонтёр полчатхан студенттер хайраллалчатхан орындағы ӧзімнерні, аң-хустарны істезерлер паза туристтер аразында сурастырығлар иртірерлер. Андағ тоғыстар апарылған соонаң чииттер, статьялар пазып, экологияа чарыдылған аймах мероприятиелерде аралазарлар.
Паза волонтёрлар лагерьінің араласчыларына Орджоникидзе аймаандағы «Ивановскай кӧллер» чир-чайаан хумартхызында алынҷа экскурсия иртiрілер.
Таныхтирға кирек, пістің республикада хайраллалчатхан чир-чайаан орыннарында волонтёрлар лагерьлері 2023 чылдаң сығара тоғынча. Ол Хакасия Владимир Потаниннiң полызығлығ фондынаң паза «Заповедное посольство» чир-чайаанны паза культура хумартхыларын хайраллирына кӧстегліг полызығлығ фонднаң чӧптезіг алыбысхан соонаң чуртасха кирілген.
Ирткен чылда «Тастығ арығда» ідӧк волонтёрлар лагерьі тоғынған. Аның алнындағы чылда – «Ивановскай кӧллерде». Тиксі ирткен сменалар 300 метр экология чолларын, туристтерге нинҷе-де тынағ орыннарын иптеп салғаннар. Паза волонтёрлар 50 кубометр азыра сӧп-сап теер салғаннар, ідӧк олар тынанарға килген 100 азыра чорыхчыны санға кир салғаннар.
Сом Хакасияның чир-чайаан ис-пайы паза экология министерствозыни
Автор :
Хакасияның чир-чайаан ис-пайы паза экология министерствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
