Следж-хоккей – иреннернің cпорт кӧрімі
13.08.2025
Хабарлар
Хакасияның СВО ветераннарының командазы тренер Евгений Тудвасовнаң чӧптесче
Хазых чуртас. Ағбанда следж-хоккейҷе кӧзідігліг ойын ирткен. Пуссар СВО ветераннары паза «Хызыл чалын» команда (Хызылчар) сыххан
Пістің республикада хазии уйан улустың спорты хомай нимес тиліпче. Чидіглернең тӧреміл ӧріндірчелер теннисисттер паза ниик атлетиканаң айғасчатхан улус. Кӧзідімге, пу наада Григорий Исаков стол теннизінҷе чоннар аразындағы турнирде кӱмӱс паза хола медальлар холға кирген. Спортсмен тренер Ирина Мордакинаның холында узын таптапча. От айында, тізең, сыйыхтығ орынға сыхханнар Даниил Кашин паза Мария Шадрина. Даниил, 1500 метрні тобырып, чиңіc тутхан, Мария олох дистанцияда кӱмӱс призер полыбысхан. Кашин паза Шадрина – тренер Михаил Хоботовтың ӱгренҷілері.
Кинектернең Республиканың паралимп резерві спорт школазы тоғынча. Учреждениеде читі секция: ниик атлетика, стол теннизі, шахмат, шашка, охчаадаң атары, бочча паза футбол. Ідӧк хазии уйан улустың следж-хоккейде кӱс сынир оңдайы пар. Следж-хоккей – паралимп спорт кӧрімі. Анда хоккеисттер, конькиліг нимес, ӧнетін саналарға одырып, ойнапчалар. Ойынҷыларның холларында ікі хысхаҷах клюшка. Хоккеисттер, тиріглерге тайанып, пуста чыл чӧрчелер паза меспекті хаалхаа кире саапчалар. Наа секцияның тӧстегҷізі – СВО ветераннарының ассоциациязы.
8 орғахта пірігістегілер чонны следж-хоккейҷе кӧзідігліг ойынға хығырғаннар. Турнир ЦСКА-ның Самарадағы пӧлиинің Ағбан городтағы спорт кінінің пустығ ачығында ирткен. Мероприятиенің алнында хабарҷыларның сурығларына нандырған СВО ветераннары ассоциациязының устағҷызы Виктор Гайкин. Хайди таныхтаан Виктор Владимирович, проекттің ӧӧн пӧгіні – ӧнетін чаа операциязында кинек пол парған чааҷыларға хабазары. Cекцияны азарынҷа тоғыс нинҷе-де ай апарылған. Ӧӧн сидіксініс – ӧнетін оборудованиені садызары. Ахчанаң спонсорлар полыс пиргеннер. Хакасиядағы командазар 11 кізі кірче. Оларнаң тоғынча меспектіг хоккейҷе «Саяны» спорт школазының тренері Евгений Тудвасов. Тренировкалар неделяда ӱс хати иртчеттірлер. Иреннер Хызылчардағы «Хызыл чалын» команданаң ойнирлар. «Ыырҷы» – следж-хоккейҷе тиксі Россия фестивальының 4 хати чемпионы. Пілдістіг, пістіңнерге андағ кӱстіг команданаң тиңнезерге сидік полар. Аннаңар Хакасиядағы ӧме турнирні мастер-классха санапча.
Ідӧк сағыстарынаң Владимир Молчанов ӱлескен. Ветеранға 41 час, ол Ағбаннаң. Хоккеист чоохтаан:
– Мин 2017 чылдаң армияда контрактча служба ирткем. Ӧнетін чаа операциязы пасталыбысханда, тыл тоғынҷызына саналғам. Итсе, фронтсар командировкаа чӧрҷеңмін. 2024 чылдаң штурм отрядында чааласхам. Покровсксар чолда кинеп парғам. Минаа пазыбызып, сола чодам чох халдым.
Владимир Молчанов – ачых-чарых кізі. Кинеп тее парза, пос салынминча. Ол сӧбіреліг, ікі паланың часкалығ пабазы. СВО ветеранының чооғынаң, ағаа туған-чағыннары хабасчалар. Ибдегілер сӧбіре пазы хазых айланғанына ӧрінчелер. Амғы туста Молчанов тайахтығ пас чӧрче, протезті чахып салған. Арған чодазы тимге сыхса, протезтiг чӧрерге ӱгренер паза тоғыс тiлир. Чир-суғҷыбыстың таниинаң, ағаа «Ада чир-суубыстың арачылағҷылары» фонд чахсы полысча. Аның куратор пар. Ол чааҷыны следж-хоккей ойнирға чӧптеп алтыр. Володя саналарға кӧніккелек, аннаңар ағаа ойнирға сидік арах пілдірче. Хайди таныхтаан ветеран, следж-хоккейде ойынҷыларның ӧӧнінде холлары тоғынчаттыр.
Кӧзідігліг турнирге кізілер чахсы чыылысханнар. Аарлығ аалҷылар санында полғаннар Хакасия пазы Валентин Коновалов паза Ӧӧркі Чӧп кнезі Сергей Сокол. Валентин Олегович, чоох тудып, теен:
– Россия президенті Владимир Путин следж-хоккейнің тилізін улуғ хайығда тутча. Анзы тиктең нимес. Ол пик хуйахтығларға кӧрілген нооза. Амды пуста піс ветераннарны кӧрчебіс. Олар Россия ыырҷыларынаң тоғыр махачы чааласханнар, спортта даа чидіге чидерге тимделер. Піс чир-суғҷыларыбысха поғдархапчабыс, олар піске чахсы кӧзідім полчалар.
Сергей Михайлович, чылығ сӧстер читіріп, спортсменнернің пик хылиина морсынған. Ол чоохтаан:
– Ооллар, сірер сын матырзар. Ӧнетін чаа операциязында аралазып, ыырҷаа маң пирбеезер, пуста даа прайзын чабыра пазарзар. Сірерге чиңіс алғапчам.
Ідӧк чоох тутханнар СВО ветераннары ассоциациязының устағҷызы Виктор Гайкин, «Ада чир-суубыстың арачылағҷылары» фондтың республикадағы пӧлиинің устағҷызы Оксана Трусова, ЦСКА-ның Самарадағы пӧлиинің Ағбан городтағы спорт кінінің пастығы Виталий Мордакин.
Ойыннаңар чоохтаза, ол пір тыныснаң ирткен. Следж-хоккейде матч ӱс чардыхтаң пӱттір. Полған на таймға 15-ер минута пирілче. Кӧзідігліг турнирзер алызығлар кирібіскеннер. Матч 20 минута парған, хоккеисттер ікі тайм ойнааннар. Таныхтирға кирек, пӱӱнгі кӱнде Россияда следж-хоккейҷе 15 команда тӧстелген.
Сом Хакасия пазының пресс-службазыни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
