«Пірсікӱн» проекттің тузазы улуғ
13.08.2025
Хабарлар
Хакасия пазы Валентин Коновалов тоғазығ араласчыларынаң хада
Тоғазығ. Хакасия пазы Валентин Коновалов «Пірсікӱн» проектте тоғынған психолог-ӱгретчілернең паза вожатайларнаң тоғасхан. Ол проект хоостыра СВО араласчыларының сӧбірелеріне пӱӱл Пілӧ кӧлдегі «Большой плёс» тынағ базазында пастағызын на тынағ сменазы ирткен
Тоғазығ республика правительствозының туразында ирткен, анда ідӧк Хакасияның пала праволарынҷа уполномоченнайы Ирина Ауль, республиканың іcтеніс паза социальнай арачыланыс министрі Татьяна Раменская араласханнар.
– Пістің оолахтар паза хызыҷахтар пу программада араласханына ӧрінчем, – таныхтаан Валентин Коновалов, тоғазығны азып. – Сірер, ӱгретчілер паза кӧстегҷілер, оларға чӧлег полғазар, полысхазар. Сірернің пӧзік узыңар, паарсазыңар сылтаанда пу проект олаңай реабилитация орны полбаан, ол чылығ хайызығлар паза ынархас орны пол парған. Ӧнетін чаа операциязы араласчыларының сӧбірелеріне хабазары ол пістің прайзыбыстың пірге пӧгінібіс полча. Піс анзын итчебіс. Мин улуғ алғызым читірчем сірерге пу тоғыс ӱчӱн.
Анаң Хакасия пазы Валентин Коновалов «Матырларның палалары» регионнар аразындағы сӧбіре сменазы хоостыра «Пірсікӱн» проектте тоғынғаннарны сыйыхтаан. Ӧнетін чаа операциязы араласчыларының сӧбірелеріне адаптация, реабилитация иртірер тоғысха улуғ хозым иткен паза пӧзік узын кӧзіткен ӱчӱн Хакасия правительствозының алғыстас пічиине турысханнар:
Оксана Гарева – «Фрегат» паланың сағыс-кӧрізін тилітчең школа директоры;
Галина Басманова – «Фрегат» паланың сағыс-кӧрізін тилітчең школаның психологы;
Ольга Замалдинова – Ағбандағы 32№ школа директорының воспитаниеҷе паза олғаннарның халых пірігістерінең палғалыс тударынҷа чӧпчізі;
Анастасия Понамарева – Ағбандағы 5№ школа директорының воспитаниеҷе паза олғаннарның халых пірігістерінең палғалыс тударынҷа чӧпчізі;
Анастасия Макарова – Ағбандағы 1№ школа директорының воспитаниеҷе чӧпчізі;
Валерия Шумихина – Харатастағы 15№ школа директорының воспитаниеҷе паза олғаннарның халых пірігістерінең палғалыс тударынҷа чӧпчізі.
Хакасияның пала праволарынҷа уполномоченнайы Ирина Ауль сӧбіре сменазында тоғынған психолог-ӱгретчілерге паза вожатайларға ідӧк алғызын читірген. Паза Хакасияның социальнай арачыланыс министерствозына улуғ алғызын читірген, ол тоғысты тимнирінде ӧткін араласхан ӱчӱн.
– Сағынған сағыс чуртасха киріл парған ӱчӱн сірерге прайзыңарға улуғ алғыс, – теен ол. – Пу аарлығ опыт, ол Россиядағы пастағы смена полған, хайзы ӧнетін чаа операциязы араласчыларының сӧбірелерінең палғалыстығ полған. Минің кӧрізімнең, ол пӧзік синде ирт парған, сірернің чахсы тоғызыңар сылтаанда.
Ирина Ауль мындағ тынағ сменаларын иртіреріне халых чонда кирексініс пар, аннаңар аны хайди даа узарадарға кирек тіп таныхтаан. Тоғазығ араласчылары ідӧк пос сағыс-кӧрістерінең ӱлескеннер, ӧӧн танығ – СВО араласчыларының сӧбірелеріне кӧрілген сменаны узарадарға кирек. Паза олар 10 кӱн асхынах полғанын таныхтааннар, палалар смена соонзар ла чахсы танызып пастабысханнар.
Ідӧк СВО араласчылары сӧбірелерінең тоғысты смена пасталар алнындох апарарға чӧп пирілген – психологтар азынада пілерге киректер: хайдағ пала пабазын чідір салған, хайдағ паланың пабазы СВО чирінде алай госпитальда. Че тиксі алза, олар прайзы пу сменаның улуғ тузазын таныхтааннар. Ӧӧні – сӧбіредегілер удур-тӧдір чағыннас парғаны. Кӧзідімге пір сӧбірені ағылғаннар, пабазы СВО чирінде чат халғанда, оолах іҷезінең чоох алыспин сыхтыр. Смена тузында, іҷенің таниинаң, палазы хайди полза аннаң чоохтас сыхтыр – оларның хайызығлары оңдайлан сыхтыр. Паза мындағ сменада тоғынар кізілерге ӧнетін ӱгредіг программазын тимнеп иртірерге киректелчеткені таныхталған.
Хакасия пазы Валентин Коновалов ол чӧптернең чарасхан паза ол кӧстеглерҷе тоғыс апарарға чахығ пирген. Тоғазығны тоозып, регион устағҷызы пу проект чахсы пастағ полғанын, ол хайди даа узарадылар тіп таныхтаан паза анда араласханнарға хатабох алғызын читірген.
Сом Дмитрий Сунчугашевти
Автор :
Альберт Толмашов
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
